07/10/2026
پاکستان فلاح پارٹی کے چیئرمین محمد رمضان مغل ایڈووکیٹ کا 8 اکتوبر سے پنجاب کا ایک ہفتے کا دورہ، سیاسی، مذہبی، سرکاری و سماجی شخصیات سے ملاقاتیں کریں گے
لاہور/اسلام آباد: پاکستان فلاح پارٹی کے چیئرمین محمد رمضان مغل ایڈووکیٹ 8 اکتوبر سے پنجاب کے مختلف علاقوں کا ایک ہفتے کا دورہ کریں گے، جس کے دوران وہ مختلف اضلاع اور شہروں میں سیاسی، مذہبی، سرکاری، وکلاء، تاجر، صحافتی، سماجی اور عوامی حلقوں سے تعلق رکھنے والی اہم شخصیات سے ملاقاتیں کریں گے۔ دورے کا مقصد ملکی سیاسی و سماجی صورتحال، عوام کو درپیش بنیادی مسائل اور پاکستان کو حقیقی معنوں میں ایک اسلامی فلاحی ریاست بنانے کے لیے عملی جدوجہد کے امکانات پر تبادلہ خیال کرنا ہے۔
پاکستان فلاح پارٹی کے چیئرمین محمد رمضان مغل ایڈووکیٹ نے کہا کہ پاکستان کسی مخصوص طبقے، خاندان یا اشرافیہ کے مفادات کے لیے نہیں بلکہ عوام کی فلاح، آزادی، عزت، مساوات اور بنیادی حقوق کے تحفظ کے لیے قائم کیا گیا تھا۔ قائداعظم محمد علی جناحؒ اور علامہ محمد اقبالؒ کے افکار کی روشنی میں پاکستان کو ایسا ریاستی نظام دینا وقت کی اہم ضرورت ہے جس میں قانون کی حکمرانی ہو، انصاف عام آدمی کی دہلیز تک پہنچے، ریاست اپنے کمزور شہریوں کی ذمہ داری اٹھائے اور وسائل کی منصفانہ تقسیم کو یقینی بنایا جائے۔
انہوں نے کہا کہ پاکستان فلاح پارٹی کا بنیادی مقصد اقتدار کا حصول نہیں بلکہ ایک ایسے سیاسی، معاشی اور سماجی نظام کے لیے جدوجہد کرنا ہے جس میں عام پاکستانی کو عزت کے ساتھ زندگی گزارنے کے مواقع میسر ہوں۔ ملک میں مہنگائی، بے روزگاری، غربت، بدعنوانی، توانائی کے مسائل، تعلیم و صحت کی ناکافی سہولیات، امن و امان کی صورتحال اور نوجوانوں میں بڑھتی ہوئی مایوسی جیسے مسائل نے عوام کی مشکلات میں اضافہ کر دیا ہے، جن کا حل محض دعوؤں، نعروں اور وقتی اقدامات سے ممکن نہیں۔
محمد رمضان مغل ایڈووکیٹ نے کہا کہ پنجاب پاکستان کا سب سے بڑا صوبہ ہونے کے ساتھ ساتھ ملکی سیاست، معیشت، زراعت، صنعت اور سماجی زندگی میں بنیادی اہمیت رکھتا ہے۔ پنجاب کے مختلف علاقوں کا دورہ اس لیے بھی ضروری ہے کہ وہاں کے زمینی حقائق، عوامی مشکلات اور مختلف طبقات کی آراء براہِ راست معلوم کی جائیں اور ان مسائل کو قومی سطح پر اجاگر کیا جا سکے۔
انہوں نے کہا کہ اپنے دورے کے دوران وہ سیاسی و مذہبی جماعتوں کے رہنماؤں، علماء و مشائخ، وکلاء، صحافیوں، تاجروں، سرکاری و سماجی شخصیات، نوجوانوں اور مختلف شعبہ ہائے زندگی سے وابستہ افراد سے ملاقاتیں کریں گے۔ ان ملاقاتوں میں ملکی سیاسی صورتحال، آئین و قانون کی بالادستی، قومی یکجہتی، معاشی استحکام، تعلیم، صحت، روزگار، زراعت، صنعت، نوجوانوں کے مستقبل اور عوامی مسائل کے حل سمیت اہم قومی امور پر تفصیلی گفتگو کی جائے گی۔
چیئرمین پاکستان فلاح پارٹی نے مزید کہا کہ موجودہ حالات میں سیاسی اختلافات کو ذاتی دشمنی میں تبدیل کرنے کے بجائے قومی مفاد کو ترجیح دینا ہوگی۔ ملک کو انتشار، محاذ آرائی اور الزام تراشی کے بجائے سنجیدہ سیاسی مکالمے، برداشت، مشاورت اور آئینی راستے کی ضرورت ہے۔ تمام سیاسی و مذہبی قوتوں، سول سوسائٹی اور باشعور شہریوں کو چاہیے کہ وہ پاکستان کے مستقبل کے لیے اپنا مثبت کردار ادا کریں۔
انہوں نے کہا کہ اسلامی فلاحی ریاست کا تصور صرف ایک نعرہ نہیں بلکہ ایک مکمل ذمہ داری ہے، جس میں ریاست شہریوں کے جان و مال، عزت اور بنیادی حقوق کی حفاظت کرتی ہے، انصاف بلاامتیاز فراہم کیا جاتا ہے، کمزور اور محروم طبقات کی کفالت کی جاتی ہے اور قومی وسائل کو چند ہاتھوں میں محدود رکھنے کے بجائے عوامی فلاح کے لیے استعمال کیا جاتا ہے۔
محمد رمضان مغل ایڈووکیٹ نے کہا کہ پاکستان فلاح پارٹی پنجاب کے مختلف علاقوں میں پارٹی تنظیم کو مزید فعال اور مضبوط بنانے کے ساتھ ساتھ عوام اور مختلف شعبہ ہائے زندگی سے تعلق رکھنے والے افراد کو اپنے منشور اور جدوجہد سے آگاہ کرے گی۔ پارٹی کا پیغام ہے کہ عوام اپنے حقوق اور فرائض دونوں کو سمجھیں، آئین و قانون کی پاسداری کریں اور ملک کی تعمیر و ترقی میں اپنا کردار ادا کریں۔
انہوں نے کہا کہ پنجاب کا یہ دورہ محض سیاسی سرگرمی نہیں بلکہ عوامی رابطے، قومی مشاورت اور پاکستان کو ایک مضبوط، خوشحال، پرامن اور حقیقی اسلامی فلاحی ریاست بنانے کی جدوجہد کا حصہ ہے۔ پاکستان فلاح پارٹی تمام محب وطن، باشعور اور عوام دوست قوتوں کو دعوت دیتی ہے کہ وہ ذاتی و جماعتی مفادات سے بالاتر ہو کر ملک و قوم کے وسیع تر مفاد میں مشترکہ جدوجہد کا حصہ بنیں۔
انہوں نے اس عزم کا اظہار کیا کہ پاکستان فلاح پارٹی عوام کے بنیادی حقوق، آئین کی بالادستی، قانون کی حکمرانی، شفاف نظام حکومت، معاشی انصاف اور اسلامی فلاحی ریاست کے قیام کے لیے اپنی جدوجہد جاری رکھے گی اور پنجاب کے دورے کے دوران سامنے آنے والے عوامی مسائل کو متعلقہ فورمز پر بھرپور انداز میں اٹھایا جائے گا۔
