فلسفہ

22/08/2026

28/07/2026

ایک سمجھدار اور دیانت دار بادشاہ اپنے ملک کے ایک شہر کے دورے پر گیا، لیکن کچھ ہی وقت بعد بہت سارے لوگ شاہی رہائشگاہ کے سامنے جمع ہوگئے، بادشاہ بات سننے باہر آیا تو گورنر کی شکایت کی گئی، کہا گیاکہ گورنر فصلوں کے بیج اور بار دانے وغیرہ کیلئے قرض دینے میں کڑی شرائط رکھتا ہے، کاروبار کے لیے قرض لینا بھی خاصا مشکل ہے لہذا آپ گورنر کو تبدیل کردیں۔
بادشاہ نے تحمل سے بات سنی اور کہا کہ فی الحال میں تھکا ہوا ہوں، معاملہ میرے نوٹس میں آگیا ہے، کل تک گورنر سے متعلق فیصلہ ہوجائے گا اور شام کے اسی پہر سنا بھی دیا جائے گا، ساتھ ہی یہ بھی کہا کہ رہائشگاہ کے سامنے والا تالاب (سوئمنگ پول) کچھ ہی وقت میں خالی کردیا جائے گا، ہر شہری رات میں اس تالاب میں ایک ایک پیالہ دودھ ڈالے گا، اس کے بعد تمام شہری خوشی خوشی گھر چلے گئے کہ اب گورنر سے جان چھوٹ جائے گی۔
رات ہوئی تو شبیر نائی کی بیوی نے مشورہ دیا کہ سب لوگ تالاب میں دودھ ڈالیں گے، آپ پانی کا پیالہ بھر کر لے جائیں، رات میں کسی کو پتہ نہیں چلے گا، اتنے سارے دودھ میں ایک پیالہ پانی کی بادشاہ کو خبر بھی نہیں ہوگی، شبیر نائی کو بات سمجھ آئی اور وہ پانی پیالہ بھر کر تالاب میں ڈال آیا۔
اگلی شام بادشاہ تالاب کے پاس کھڑا تھا، تالاب پانی سے لبا لب بھرا تھا کیوں کہ شہر بھر کے لوگوں نے شبیر نائی والے فارمولے پر عمل کیا تھا، سبھی لوگ رات کے اندھیرے میں پانی کا پیالہ تالاب میں انڈیل گئے تھے۔
بادشاہ نے لوگوں کو مخالب کیا اور کہا: قوم، شہر یا گھر لوگوں کی اپنی دیانت داری سے بہترین بنتے ہیں، مجھے اپنے گورنر پر فخر ہے لیکن مجھے اس شہر کے لوگوں کی بد دیانتی پر افسوس بھی ہے، اگر گورنر آپ پر سختی کرتا ہے تو وہ بالکل ٹھیک کرتا ہے، اگر وہ سختی نہ کرے تو خزانہ خالی ہوجائے گا، لہذا فیصلہ یہ ہے کہ میں گورنر کے اختیارات بڑھا رہا ہوں، جب آپ لوگ ٹھیک ہوجائیں گے تو گورنر کا رویہ بھی ٹھیک ہوجائے گا کیوں کہ میں نے خاصا سمجھدار اور ملک کے ساتھ وفادار پایا ہے۔

19/07/2026

لیجنڈ میسی اور دفاعی چیمپئن ارجنٹینا سے مقابلہ تھا لیکن اسپین کی ٹیم نے دونوں کو ہی اپنے اعصاب پر سوار نہیں ہونے دیا، نپا تلا کھیل، زیادہ دفاع کے بجائے جارحانہ حکمت عملی اپنائی، ہسپانوی کھلاڑی میسی الیون سے پریشان ہونے کے بجائے اسے ڈرانے اور گیند کو مخالف گول پوسٹ کے ڈی میں گھمانے میں مصروف رہے، کئی مرتبہ گول کے مواقع ضائع بھی ہوئے لیکن مسلسل کوشش جاری رہی اورپھر اضافی وقت میں ایک گول داغ دیا گیا۔
میچ کے شروع سے ہی اسپین ارجنٹینا پر بھاری نظر آیا اور یہ سلسلہ کھیل کے ان آخری منٹوں تک جاری رہا، جب اسپین کو ایک گول کی برتری حاصل تھی اور اسے وقت پورا کرنا تھا، ایسے میں پوری ٹیم کو معلوم تھا کہ کرنا کیا ہے، اسی وجہ سے آخری کے منٹوں کا کھیل بہت مزیدار تھا، ہسپانوی کھلاڑی بال کو اپنے پیروں میں روند کر ایک دوسرے کے ساتھ پاس پاس کھیل رہے تھے، وقت کھوٹی کر رہے تھے جب کہ میسی کے لڑکے بال کو للچائی نظروں اور بے بسی سے تک رہے تھے، ہارے ہوئے جذبات لیکن پوری قوت کے ساتھ اس کے پیچھے دوڑ رہے تھے، ایک دو بار انہیں بال ہتھیانے کا موقع بھی ملا لیکن اعتماد کے سامنے بے یقینی کو صرف قسمت ہی جتوا سکتی ہے اور فائنل میچ کے دوران ایسا کوئی معجزہ نہیں ہوسکا، انہیں آخری منٹوں میں ارجنٹائن کیلئے لمحات تیزی سے گزر گئے اور پھر سٹی بج گئی، ہسپانوی کھلاڑیوں نے اِسی لمحے اُس گیند کو بھلادیا جس کے پیچھے وہ پچھلے ایک سو پچیس منٹ سے دیوانہ وار دوڑ رہے تھے اور جشن منانا شروع کردیا۔
ارجنٹینا اور اسپین دونوں ہی فائنل تک کوئی میچ نہیں ہارے تھے، دونوں ہی ورلڈ کپ کی سب سے شاندار ٹیمیں تھیں لیکن آخری مقابلے میں ارجنٹینا کو برتری حاصل تھی کہ اس کے پاس میسی کا خوف، فیورٹ کا ٹائٹل تھا اور سوشل میڈیا پر میمز کے ذریعے بنائی گئی رائے عامہ کا دباؤ تھا، اسپین نے فائنل میں ٹرافی کے ساتھ مذکورہ دونوں چیزیں بھی چھین لیں۔
اعتماد، بھاری بھرکم دشمن کو اعصاب پر سوار نہ کرنا، بہتر حکمت عملی اور آخری وقت تک لڑتے رہنا، یہی چیزیں فتح میں سب سے اہم کردار ادا کرتی ہیں۔
مبشر محمد