Regional Information Office Kohat

06/08/2026

بہ تسلیمات ریجنل آفیسر انفارمیشن اینڈ پبلک ریلیشنز کوہاٹ
ہینڈآؤٹ نمبر: 1225 کوہاٹ مورخہ:6اگست 2026 ء
کوہاٹ: صوبائی وزیر قانون کا سیلاب زدہ پایا جواکی کا دورہ، حفاظتی منصوبے کی جلد تکمیل کی ہدایت، جاں بحق ماں بیٹی کے اہلِخانہ سے تعزیت
خیبرپختونخوا کے وزیر قانون و پارلیمانی امور آفتاب عالم نے بدھ کے روز قبائلی تحصیل درہ آدم خیل کے سیلاب سے متاثرہ علاقے پایا جواکی کا دورہ کیا جہاں انہوں نے زیرِتعمیر حفاظتی دیوار (پروٹیکشن وال) کا معائنہ کیا اور حالیہ سیلابی ریلے میں جاں بحق ہونے والی ماں اور بیٹی کے اہلِخانہ سے تعزیت کی۔ وزیر قانون نے خانہ وات، شاہ کلی میں زیرِتعمیر پروٹیکشن وال کا جائزہ لیتے ہوئے متعلقہ حکام سے منصوبے کی پیشرفت، تعمیراتی معیار اور حفاظتی اقدامات پر بریفنگ لی۔ انہوں نے حکام کو ہدایت کی کہ منصوبہ مقررہ مدت کے اندر اعلیٰ معیار کے مطابق مکمل کیا جائے تاکہ مقامی آبادی، زرعی اراضی اور بنیادی ڈھانچے کو مستقبل میں ممکنہ سیلابی نقصانات سے محفوظ بنایا جا سکے۔بعد ازاں آفتاب عالم نے پایا جواکی میں حالیہ سیلابی ریلے کے باعث جاں بحق ہونے والی ماں اور بیٹی کے اہلِخانہ سے ملاقات کی، ان سے دلی ہمدردی اور افسوس کا اظہار کیا اور مرحومین کے ایصالِ ثواب کیلئے فاتحہ خوانی کی۔انہوں نے دعا کی کہ اللہ تعالیٰ مرحومین کو اپنی جوارِ رحمت میں اعلیٰ مقام عطا فرمائے، لواحقین کو صبرِ جمیل دے اور انہیں یہ ناقابلِ تلافی صدمہ برداشت کرنے کی ہمت عطا کرے۔ وزیر قانون نے متاثرہ خاندان کو ہر ممکن حکومتی امداد اور تعاون کی یقین دہانی کراتے ہوئے کہا کہ صوبائی حکومت متاثرین کی بحالی اور سیلاب سے بچاؤ کے منصوبوں کی بروقت تکمیل کیلئے تمام دستیاب وسائل بروئے کار لا رہی ہے اور مشکل کی اس گھڑی میں متاثرہ خاندان کو تنہا نہیں چھوڑا جائے گا۔
۔۔۔۔۔۔۔۔۔۔۔۔

06/08/2026

بہ تسلیمات ریجنل آفیسر انفارمیشن اینڈ پبلک ریلیشنز کوہاٹ
ہینڈآؤٹ نمبر: 1224 کوہاٹ مورخہ:6اگست 2026 ء
کوہاٹ: ''ایم ڈی کیٹ کے شفاف انعقاد پر کوئی سمجھوتہ نہیں ہوگا''، کمشنر کوہاٹ ڈویژن
کمشنر کوہاٹ ڈویژن سید معتصم باللہ شاہ نے کہا ہے کہ ایم ڈی کیٹ (MDCAT) ایک انتہائی اہم اور حساس امتحان ہے اور اس کے شفاف، منصفانہ اور پرامن انعقاد پر کوئی سمجھوتہ نہیں کیا جائے گا۔ انہوں نے یہ بات اپنے دفتر میں ایم ڈی کیٹ 2026 کے انتظامات کا جائزہ لینے کیلئے منعقدہ اجلاس کی صدارت کرتے ہوئے کہی۔ اجلاس میں ڈپٹی کمشنر کوہاٹ محمد نواز وزیر، ضلعی پولیس افسر رائے مظہر اقبال، کوہاٹ میڈیکل کالج کی پرنسپل اور وائس پرنسپل، کوہاٹ ٹیچنگ ہسپتالوں کے میڈیکل سپرنٹنڈنٹس، ریسکیو 1122، پیسکو، ایف آئی اے اور مختلف انٹیلی جنس اداروں کے افسران نے شرکت کی۔ اجلاس میں 16 اگست کو ہونے والے ایم ڈی کیٹ امتحان کے انتظامی، سیکیورٹی اور طبی انتظامات کا تفصیلی جائزہ لیا گیا۔ شرکاء کو ان کی ذمہ داریوں سے آگاہ کیا گیا جبکہ تمام متعلقہ اداروں کے درمیان مؤثر رابطہ اور باہمی تعاون یقینی بنانے پر زور دیا گیا۔ کمشنر معتصم باللہ نے ہدایت کی کہ امتحانی مراکز پر فول پروف سیکیورٹی، ٹریفک کی روانی، بجلی کی بلا تعطل فراہمی، ایمرجنسی طبی سہولیات اور ریسکیو سروسز سمیت تمام انتظامات بروقت مکمل کئے جائیں تاکہ امیدواروں کو کسی قسم کی دشواری کا سامنا نہ کرنا پڑے۔ انہوں نے ضلعی انتظامیہ اور تمام متعلقہ اداروں کو پیشہ ورانہ انداز میں فرائض انجام دینے اور کسی بھی ہنگامی صورتحال سے نمٹنے کیلئے پیشگی منصوبہ بندی مکمل رکھنے کی ہدایت کی۔ اجلاس کے اختتام پر اس عزم کا اظہار کیا گیا کہ حکومت کی ہدایات اور متعلقہ اداروں کے تعاون سے ایم ڈی کیٹ 2026 کا امتحان شفاف، منصفانہ اور پرامن ماحول میں منعقد کیا جائے گا تاکہ تمام امیدواروں کو مساوی امتحانی مواقع میسر آ سکیں۔
۔۔۔۔۔۔۔۔۔۔۔

06/08/2026