08/08/2026
ڈائریکٹر جنرل زراعت (توسیع) پنجاب کا ضلع وہاڑی کا دورہ
وہاڑی (8 اگست): ڈائریکٹر جنرل زراعت (توسیع) پنجاب چوہدری عبدالحمید نے ڈائریکٹر زراعت ہیڈکوارٹر لاہور ڈاکٹر محمد اقبال خان نیازی کے ہمراہ ضلع وہاڑی کا دورہ کیا اور ڈپٹی ڈائریکٹر زراعت وہاڑی رانا محمد عارف کے دفتر میں جائزہ اجلاس کی صدارت کی۔
اجلاس میں کپاس کی موجودہ صورتحال، حکومتی سکیموں اور فیلڈ سرگرمیوں کا جائزہ لیا گیا۔ بریفنگ میں بتایا گیا کہ ضلع میں 1 لاکھ 26 ہزار ایکڑ پر کپاس کاشت ہوئی، جبکہ اگیتی کاشت سے 35 تا 40 من اور مارچ کی کاشت سے 25 تا 30 من فی ایکڑ پیداوار حاصل ہو رہی ہے۔ بائیولوجیکل کنٹرول اور IPM کے استعمال سے کاشتکاروں کے سپرے اخراجات میں بھی کمی آئی ہے۔
وہاڑی سے پنجاب کی منڈیوں میں کپاس کی سب سے زیادہ آمد جاری ہے، پھٹی کا نرخ 8,500 تا 9,300 روپے فی من ہے جبکہ ضلع کی 17 جننگ فیکٹریوں میں اب تک 70 ہزار کاٹن بیلز تیار ہو چکی ہیں۔
ڈی جی زراعت نے مختلف حکومتی سکیموں کے ہیلپ ڈیسک اور اڈاپٹو ریسرچ فارم پر کپاس کے تحقیقی ٹرائلز کا بھی معائنہ کیا۔ انہوں نے محکمہ زراعت توسیع وہاڑی کی کارکردگی اور بائیولوجیکل ماڈل کو سراہتے ہوئے افسران کو کپاس کی پیداوار میں مزید اضافے کے لیے کاشتکاروں کی رہنمائی جاری رکھنے کی ہدایت کی۔
