05/08/2026
پریس کونسل آف انڈیا کے سابق چیئرمین اور سپریم کورٹ کے سابق جج جسٹس مارکنڈے کاٹجو کا ایک مضمون "فراق گورکھپوری کا شعر اور آج کا ہندوستان" کے عنوان سے روزنامہ 'سیاست' حیدرآباد میں شائع ہوا ہے۔
مضمون نگار نے فراق گورکھپوری کے اس مشہور شعر:
ہر ذرے پہ اب کیفیتِ نیم شبی ہے
اے ساقیِ دوراں یہ گناہوں کی گھڑی ہے
کی روشنی میں نہ صرف موجودہ ہندوستان کا المیہ بیان کیا ہے، بلکہ اسے "اردو کا عظیم شعر" بھی قرار دیا ہے۔
اس سے قطعِ نظر کہ یہ شعر کتنا عظیم ہے، یہ جان کر بے حد مسرت ہوئی کہ جسٹس صاحب نہ صرف اردو زبان پر گہری گرفت رکھتے ہیں، بلکہ اردو شعر و ادب سے بھی ان کا ذوق و شغف انتہائی پاکیزہ ہے۔
جسٹس صاحب کا اردو سے یہ والہانہ عشق دیکھ کر حیرت بھی ہوتی ہے اور خوشی بھی۔ انھوں نے بلا خوف و جھجھک ان عناصر کو متعصب اور نادان قرار دیا ہے، جو اردو کو اس کی اپنی ہی جنم بھومی میں دفن کرنے کے درپے ہیں۔ ان کا اردو پریم اور اس کے تحفظ کے لیے جذبہ دیکھ کر بے اختیار یہ شعر یاد آتا ہے:
سلیقے سے ہواؤں میں جو خوشبو گھول سکتے ہیں
ابھی کچھ لوگ باقی ہیں جو اردو بول سکتے ہیں
