13/08/2026
سید محمد علی شاہ باچا کی شرینگل یونیورسٹی میں پی ایس ایف پروگرام پر حملے کی شدید مذمت
پاکستان پیپلز پارٹی خیبرپختونخوا کے صوبائی صدر سید محمد علی شاہ باچا نے شرینگل یونیورسٹی میں پیپلز اسٹوڈنٹس فیڈریشن (PSF) کے حلف برداری پروگرام پر انتظامیہ کی جانب سے مبینہ حملے اور تشدد کی شدید مذمت کرتے ہوئے کہا ہے کہ طلبہ کو اپنے جمہوری، سیاسی اور تنظیمی حقوق کے استعمال سے روکنا کسی صورت قابلِ قبول نہیں۔
انہوں نے کہا کہ سابق وفاقی وزیر نجم الدین خان اور دیگر پارٹی قائدین کی موجودگی میں اس نوعیت کا افسوسناک واقعہ پیش آنا انتہائی تشویشناک اور قابلِ افسوس ہے۔
واقعے میں متعدد طلبہ کے زخمی ہونے اور انہیں ہسپتال منتقل کیے جانے پر گہری تشویش کا اظہار کرتے ہوئے انہوں نے حکومت خیبرپختونخوا سے مطالبہ کیا کہ واقعے کا فوری اور شفاف نوٹس لیا جائے، ذمہ داران کے خلاف قانون کے مطابق کارروائی کی جائے اور زخمی طلبہ کو مکمل طبی و قانونی معاونت فراہم کی جائے۔
سید محمد علی شاہ باچا نے واضح کیا کہ پیپلز اسٹوڈنٹس فیڈریشن کے نوجوان اکیلے نہیں، پاکستان پیپلز پارٹی خیبرپختونخوا ان کے ساتھ شانہ بشانہ کھڑی ہے اور طلبہ کے حقوق کے تحفظ کے لیے ہر آئینی و قانونی فورم پر آواز بلند کرے گی
