04/03/2026
د رمضان مبارکه میاشت او د پنجاب استعمار وحشي پالیسۍ.
»پاکستاني پوځ پرون په تیراه کې څلور بېګناه پښتانه شهیدان کړل او شپږ نور یې ټپیان کړل. بیا یې د دې ظلم پر ضد پر احتجاج کوونکو (اورکزو) برید وکړ، چې پکې د امن او انصاف غوښتونکي څلور پښتانه ټپیان شول.
»پاکستاني پوځ د شپې په بهسود ولسوالۍ کې ۱۷ بېګناه پښتانه افغانان، ښځې او ماشومان شهیدان کړل. دا نه یوازې د نړیوالو قوانینو ښکاره سرغړونه او ترهګري ده، بلکې دا د پاکستاني استعماري ریاست له خوا د ښځو او ماشومانو د وژلو ترهګريز کړنو تسلسل دی.
»څو ورځې مخکې په دروزنده، شوا، شمالي وزیرستان، مبارکشاهي کلي (میرعلي)، سپین وام، اباخېل کلي، دوسلي، تختي خېل (لکي مروت)، اعظم ورسک (جنوبي وزیرستان)، باجوړ ، میریان بنو او نورو پښتني سیمو کې د پوځ او وسلوالو ترمنځ په نښتو کې بېګناه پښتانه ټپیان او شهیدان شول.
د پښتون افغان نسل وژنه د پنجابي استعمار لهخوا د هماغه استعماري نظام دوام دی چې له پېرنګي څخه په میراث کې ورته پاتې شوې ده. پښتانه به یې پر ضد داسې ودرېږي، لکه څنګه چې د پېرنګي پر ضد ولاړ وو.
د پنجابي استعمار له هر شکل څخه، او د هغوئ استعماریت ته جواز جوړاونکو څخه د وطن ژغورل د ملت د هر وګړي یو سپېڅلې فریضه ده.
تحریک پي ټي ایم به په هر حال کې، حتی په دې سختو شرایطو کې هم د دې ظلمونو پر ضد اقدامات کوي او د خپل مظلوم ملت تر څنګ به ولاړ وي.
