16/08/2026
گلیات میں اہم مشاورتی پروگرام، 12 نکاتی ترقیاتی ایجنڈا پیش
نتھیا گلی کے ریئس خانہ ہوٹل میں سردار امتیاز کی سربراہی میں گلیات ہوٹل ایسوسی ایشن اور لوکل کمیونٹی کا اہم پروگرام منعقد ہوا، جس میں گلیات کی بزنس کمیونٹی اور مقامی افراد نے بھرپور شرکت کی۔
پروگرام کے مہمانِ خصوصی اسپیکر خیبر پختونخوا اسمبلی بابر سلیم سواتی، ایم این اے و صوبائی سیکرٹری پاکستان تحریک انصاف علی اصغر خان، صوبائی وزیر پاور اینڈ انرجی نذیر احمد عباسی جبکہ سابق تحصیل ناظم شجاع نبی بھی شریک ہوئے۔
پروگرام میں گلیات کی ترقی، سیاحت اور مقامی مسائل کے حل کے لیے 12 نکاتی ایجنڈا پیش کیا گیا، جس میں ایوبیہ چیئرلفٹ کی بحالی، پارکنگ سہولیات، پانی کے وسائل کا تحفظ، نتھیا گلی آر ایچ سی کی اپ گریڈیشن، بجلی کے نظام کی بہتری، نوجوانوں کے لیے کھیلوں اور فنی تعلیم کی سہولیات، کاروباری مواقع اور ٹیکس و ریگولیٹری اصلاحات شامل ہیں۔
شرکاء نے جی ڈی اے کے ترقیاتی فنڈز کے شفاف استعمال اور نتھیا گلی-باڑیاں روڈ، ROW اور بائی پاس کی جامع ترقی پر بھی زور دیا۔
گلیات کی بزنس کمیونٹی اور لوکل کمیونٹی نے مطالبہ کیا کہ علاقے کی سیاحتی اہمیت کے پیش نظر ان مسائل کے حل کے لیے عملی اقدامات تیز کیے جائیں۔
