14/08/2026
سنڌ يونائيٽيڊ پارٽي ضلعو نوابشاهه جي اهم تنظيمي اجلاس ۾ سياسي صورتحال جو جائزو، 22 آگسٽ جي سنڌ ايڪشن ڪاميٽي احتجاج ۾ ڀرپور شرڪت جو فيصلو
نوابشاهه: سنڌ يونائيٽيڊ پارٽي ضلعو نوابشاهه طرفان تعلقي نوابشاهه ۽ ميونسپل ڪارپوريشن نوابشاهه جي تنظيمي ڪانگريس جو اهم اجلاس ضلعي صدر خميسو خان ڀنڊ جي صدارت هيٺ منعقد ٿيو، جنهن ۾ مرڪزي ڊپٽي سيڪريٽري مجيب ماڇي ۽ ڊويزنل صدر ڊاڪٽر زين ڀٽو خصوصي شرڪت ڪئي.
اجلاس ۾ ضلعي سينيئر نائب صدر گل حسن رند، ضلعي نائب صدر آڪاش لاکو، ضلعي سيڪريٽري غلام مصطفيٰ ڪيريو، ضلعي انفارميشن سيڪريٽري علي سومرو سميت تعلقي نوابشاهه جي صدر ميرجان مگسي، نائب صدر وحيد مٺياڻي، سيڪريٽري مشتاق مگسي، ميونسپل ڪارپوريشن نوابشاهه جي صدر ڊاڪٽر ممتاز تصور ڦل، ميونسپل سيڪريٽري ساجد ڪيريو ۽ تعلقي، ميونسپل ڪارپوريشن، ٽائونن، يونين ڪائونسلن ۽ وارڊن جي صدرن ۽ سيڪريٽرين سميت وڏي انگ ۾ تنظيمي عهديدارن ۽ ڪارڪنن شرڪت ڪئي.
اجلاس دوران سنڌ يونائيٽيڊ پارٽي جي تنظيمي صورتحال، موجوده سياسي حالتن، سنڌ کي درپيش اهم مسئلن ۽ عوامي مسئلن تي تفصيلي غور ويچار ڪيو ويو. اڳواڻن ان ڳالهه تي زور ڏنو ته پارٽي جي تنظيمي ڍانچي کي تعلقي، ٽائون، يونين ڪائونسل ۽ وارڊ سطح تائين وڌيڪ فعال ۽ مضبوط بڻائي عوام سان رابطن کي وڌايو وڃي ۽ سنڌ جي بنيادي مسئلن بابت سياسي جدوجهد کي وڌيڪ منظم ڪيو وڃي.
اجلاس ۾ سنڌ جي موجوده سياسي صورتحال تي پڻ تفصيلي بحث ڪيو ويو ۽ ان ڳالهه تي اتفاق ڪيو ويو ته سنڌ جي وسيلن، پاڻي، زمين، قومي حقن ۽ عوامي مفادن جي تحفظ لاءِ سياسي ۽ جمهوري جدوجهد کي وڌيڪ منظم انداز ۾ اڳتي وڌايو ويندو.
اجلاس ۾ سنڌ ايڪشن ڪاميٽي طرفان 22 آگسٽ تي اعلانيل احتجاج بابت پڻ اهم فيصلو ڪيو ويو. ضلعي قيادت فيصلو ڪيو ته سنڌ يونائيٽيڊ پارٽي ضلعو نوابشاهه طرفان احتجاج ۾ ڀرپور ۽ منظم شرڪت ڪئي ويندي، جڏهن ته تعلقي، ميونسپل، ٽائون، يونين ڪائونسل ۽ وارڊ سطح جي سمورن تنظيمي عهديدارن ۽ ڪارڪنن کي احتجاج ۾ شرڪت لاءِ متحرڪ ڪيو ويندو.
اڳواڻن چيو ته سنڌ جي سياسي، معاشي ۽ قومي مفادن سان لاڳاپيل معاملن تي خاموشي اختيار ڪرڻ بدران جمهوري، آئيني ۽ پرامن سياسي جدوجهد ذريعي پنهنجو آواز بلند ڪرڻ وقت جي اهم ضرورت آهي. هنن ڪارڪنن تي زور ڏنو ته هو عوام سان مسلسل رابطي ۾ رهن ۽ سنڌ جي مسئلن بابت عوامي شعور پيدا ڪرڻ لاءِ پنهنجو ڪردار وڌيڪ مؤثر بڻائين.
اجلاس جي پڄاڻي تي ضلعي قيادت ان عزم جو اظهار ڪيو ته سنڌ يونائيٽيڊ پارٽي ضلعو نوابشاهه سنڌ جي وحدت، وسيلن، پاڻي ۽ قومي حقن جي تحفظ سان گڏ عوام جي بنيادي مسئلن جي حل لاءِ پنهنجي سياسي ۽ جمهوري جدوجهد جاري رکندي ۽ ايندڙ سمورين عوامي سرگرمين ۾ تنظيمي نظم ۽ اتحاد سان ڀرپور ڪردار ادا ڪندي.
علي سومرو
ضلعي انفارميشن سيڪريٽري
سنڌ يونائيٽيڊ پارٽي، ضلعو نوابشاهه
