03/09/2026
تربت: میر فدا حکیم رند کی بلوچستان نیشنل الائنس کے سربراہ میجر جمیل دشتی سے ملاقات، سیاسی و علاقائی امور پر تبادلہ خیال
تربت: معروف سیاسی و سماجی رہنما میر فدا حکیم رند نے بلوچستان نیشنل الائنس کے سربراہ میجر جمیل دشتی سے اہم ملاقات کی، جس میں بلوچستان بالخصوص مکران اور تربت کے مختلف علاقائی مسائل، موجودہ سیاسی صورتحال اور عوام کو درپیش مشکلات سمیت باہمی دلچسپی کے مختلف امور پر تفصیلی تبادلہ خیال کیا گیا۔
ملاقات کے دوران صوبے کی مجموعی سیاسی صورتحال، علاقے میں جاری ترقیاتی عمل، عوامی مسائل اور مستقبل کے سیاسی لائحہ عمل کے حوالے سے بھی گفتگو ہوئی۔ دونوں رہنماؤں نے اس امر پر زور دیا کہ بلوچستان کے عوام کو درپیش بنیادی مسائل کے حل، روزگار کے مواقع میں اضافے، تعلیم و صحت کی سہولیات کی بہتری اور علاقے کی پائیدار ترقی کے لیے سنجیدہ اور عملی اقدامات کی ضرورت ہے۔
میر فدا حکیم رند نے اس موقع پر گفتگو کرتے ہوئے کہا کہ مکران کے عوام طویل عرصے سے مختلف بنیادی مسائل کا سامنا کر رہے ہیں، جن کے حل کے لیے سیاسی قیادت، منتخب نمائندوں اور متعلقہ اداروں کو مل کر مؤثر کردار ادا کرنا ہوگا۔ انہوں نے کہا کہ عوامی مسائل کو سیاسی وابستگیوں سے بالاتر ہو کر اجاگر کرنا اور ان کے حل کے لیے آواز بلند کرنا وقت کی اہم ضرورت ہے۔
میجر جمیل دشتی نے بھی بلوچستان کی موجودہ سیاسی صورتحال اور علاقائی مسائل کے حوالے سے اپنے خیالات کا اظہار کیا اور اس بات پر زور دیا کہ بلوچستان کے عوام کے مسائل کے حل کے لیے سیاسی قوتوں کے درمیان بامقصد رابطہ اور مثبت مکالمہ ضروری ہے۔
ملاقات میں مکران کی مجموعی صورتحال، عوامی مسائل، امن و امان، ترقیاتی ضروریات اور مستقبل میں سیاسی روابط کو مزید مضبوط بنانے سمیت مختلف امور پر بھی گفتگو کی گئی۔
اس موقع پر میر الٰہی بخش بزنجو بھی موجود تھے۔ ملاقات میں بلوچستان خصوصاً مکران کے عوام کی فلاح و بہبود اور علاقے کی ترقی کے لیے مشترکہ کوششوں کی ضرورت پر اتفاق کیا گیا۔
