07/05/2026
کوئٹہ ( پ ر )
پشتونخوا نیشنل عوامی پارٹی کے جاری کردہ پریس ریلیز میں ینگ ڈاکٹرز ایسوسی ایشن کی نومنتخب کابینہ کو دلی مبارکباد پیش کرتے ہوئے کہا گیا ہے کہ ڈاکٹروں کی برادری کسی بھی مہذب معاشرے میں ریڑھ کی ہڈی کی حیثیت رکھتی ہے، جو نہ صرف انسانی جانوں کے تحفظ، عوامی صحت کی بہتری اور طبی سہولیات کی فراہمی میں بنیادی کردار ادا کرتی ہے بلکہ مشکل ترین حالات، محدود وسائل اور ناگفتہ بہ صورتحال کے باوجود اپنے فرائض منصبی ایمانداری، دیانتداری اور پیشہ ورانہ جذبے کے ساتھ انجام دیتی ہے۔
پریس ریلیز میں ینگ ڈاکٹرز کے نومنتخب صدر ڈاکٹر عبداللحئی بلوچ، وائس پریزیڈنٹ ڈاکٹر عادل ناصر، جنرل سیکرٹری ڈاکٹر علی جان کاکڑ، جوائنٹ سیکرٹری ڈاکٹر عرفان بگٹی، ایجوکیشنل سیکرٹری ڈاکٹر محمد مزمل پانیزئی، ترجمان ڈاکٹر ثناء اللہ، فنانس سیکرٹری ڈاکٹر عبداللہ ترین اور آفس سیکرٹری ڈاکٹر غلام مرتضیٰ بلوچ کو مبارکباد دیتے ہوئے اس امید کا اظہار کیا گیا کہ نئی قیادت ڈاکٹرز برادری کے مسائل کے حل، سرکاری ہسپتالوں کی بہتری، طبی تعلیم کے فروغ، نوجوان ڈاکٹروں کے حقوق کے تحفظ اور عوام کو بہتر طبی سہولیات کی فراہمی کیلئے موثر اور مثبت کردار ادا کرے گی۔
بیان میں کہا گیا کہ ایسے حالات میں نوجوان ڈاکٹرز کی ذمہ داریاں مزید بڑھ جاتی ہیں کہ وہ اپنے پیشہ ورانہ فرائض کے ساتھ ساتھ صحت کے شعبے کی بہتری کیلئے منظم اور جمہوری جدوجہد جاری رکھیں۔
پشتونخوا نیشنل عوامی پارٹی نے کہا کہ صحت، تعلیم اور روزگار ہر شہری کا بنیادی حق ہے اور ایک فلاحی و جمہوری ریاست کی ذمہ داری ہے کہ عوام کو معیاری طبی سہولیات فراہم کرے۔تو دوسری جانب ڈاکٹرز، نرسز اور طبی عملہ شدید مشکلات، عدم تحفظ اور وسائل کی کمی کا سامنا کر رہا ہے۔
بیان میں مزید کہا گیا کہ نوجوان ڈاکٹرز نے ہمیشہ مشکل حالات میں عوام کی خدمت کی روایت کو برقرار رکھا ہے۔ کورونا وباء سمیت مختلف ہنگامی حالات میں ڈاکٹروں نے اپنی جانوں کی پرواہ کئے بغیر فرنٹ لائن پر رہ کر انسانیت کی خدمت کی، جسے قوم قدر کی نگاہ سے دیکھتی ہے۔
پریس ریلیز میں صوبای حکومت سے مطالبہ کیا گیا کہ صحت کے شعبے کو ہنگامی بنیادوں پر ترجیح دی جائے، سرکاری ہسپتالوں میں جدید طبی سہولیات فراہم کی جائیں، ڈاکٹرز اور طبی عملے کی خالی آسامیوں پر فوری بھرتیاں کی جائیں، دیہی علاقوں میں صحت کے مراکز کو فعال بنایا جائے اور ڈاکٹرز کے جائز مسائل کو مذاکرات کے ذریعے حل کیا جائے تاکہ عوام کو بہتر اور معیاری طبی سہولیات میسر آسکیں۔
آخر میں پشتونخوا نیشنل عوامی پارٹی نے نومنتخب کابینہ کیلئے نیک خواہشات کا اظہار کرتے ہوئے امید ظاہر کی کہ نئی قیادت اتحاد، ذمہ داری اور خدمت کے جذبے کے ساتھ ڈاکٹرز برادری اور عوام کے اعتماد پر پورا اترے گی۔
