06/09/2026
یومِ دفاعِ پاکستان کے موقع پر دُکی میں پروقار تقریب اور ریلی کا انعقاد
دُکی: ضلعی انتظامیہ دُکی کے زیرِ اہتمام 6 ستمبر یومِ دفاعِ پاکستان کے موقع پر ایک پروقار تقریب کا انعقاد کیا گیا۔ تقریب میں اسسٹنٹ کمشنر دکی محمد اکرم حریفال،ایس پی دُکی منصور احمد بزدار، ضلعی انتظامیہ و مختلف محکموں کے افسران و اہلکاران اور عوام الناس نے شرکت کی۔ تقریب کے دوران قومی پرچم کشائی کی گئی، جبکہ پولیس کے چاق و چوبند دستے نے قومی پرچم کو سلامی پیش کی۔ اس موقع پر قومی ترانہ بھی پیش کیا گیا اور شرکاء نے شہدائے وطن کی قربانیوں کو خراجِ عقیدت پیش کرتے ہوئے ملکی دفاع، قومی یکجہتی اور وطن سے وفاداری کے عزم کا اظہار کیا۔ پرچم کشائی کی تقریب کے بعد یومِ دفاعِ پاکستان کی مناسبت سے ایک قومی ریلی بھی نکالی گئی، جس میں شرکاء نے قومی پرچم اٹھا کر پاکستان سے محبت اور پاک افواج کے ساتھ یکجہتی کا اظہار کیا۔ تقریب کے اختتام پر ملک کی سلامتی، استحکام، ترقی و خوشحالی، امن و امان اور شہدائے وطن کے درجات کی بلندی کے لیے خصوصی دعا کی گئی۔
