03/06/2026
*چیف کمشنر اور کمشنر آر ٹی ایس کمیشن کا ضلع چارسدہ کاایک روزہ دورہ*
چیف کمشنر رائٹ ٹو سروسز کمیشن، *محمد علی شہزاد* ہ اور کمشنر آر ٹی ایس کمیشن، *ذاکر حسین آفریدی* نے آج ضلع چارسدہ کا دورہ کیا۔ اس موقع پر ڈپٹی کمشنر آفس چارسدہ میں ایک اہم اجلاس منعقد ہوا جس میں مختلف محکموں کے سربراہان نے شرکت کی۔
اجلاس کے دوران چیف کمشنر محمد علی شہزادہ اور کمشنر ذاکر حسین آفریدی نے شرکاء کو رائٹ ٹو پبلک سروسز ایکٹ 2014 کے مختلف پہلوؤں اور اس کے مؤثر نفاذ کے حوالے سے تفصیلی بریفنگ دی۔ انہوں نے اس امر پر زور دیا کہ عوام کو مقررہ وقت کے اندر معیاری اور شفاف خدمات کی فراہمی تمام محکموں کی قانونی اور اخلاقی ذمہ داری ہے۔
چیف کمشنر نے افسران کو ہدایت کی کہ وہ عوامی خدمات کی فراہمی میں مزید بہتری لائیں، زیر التواء معاملات کو بروقت نمٹائیں اور شہریوں کی شکایات کے فوری ازالے کو یقینی بنائیں۔ انہوں نے کہا کہ آر ٹی ایس قانون کا بنیادی مقصد عوام کو ان کے حقوق کے مطابق بروقت خدمات فراہم کرنا اور سرکاری اداروں میں جوابدہی اور شفافیت کو فروغ دینا ہے۔
بعد ازاں چیف کمشنر محمد علی شہزادہ اور کمشنر ذاکر حسین آفریدی نے سول سوسائٹی کے مشران سے ملاقات کی، جہاں آر ٹی ایس کمیشن کی جانب سے آگاہی مہم کا انعقاد کیا گیا۔ اس موقع پر میڈیا نمائندگان، آر ٹی ایس ایمبیسڈرز، سول سوسائٹی کے مشران اور معاشرے کے مختلف طبقات سے تعلق رکھنے والے افراد نے کثیر تعداد میں شرکت کی۔ شرکاء کو رائٹ ٹو پبلک سروسز ایکٹ 2014 کے اغراض و مقاصد، عوامی حقوق اور خدمات کے حصول کے طریقہ کار کے بارے میں تفصیلی آگاہی فراہم کی گئی۔ چیف کمشنر اور کمشنر نے شرکاء پر زور دیا کہ وہ آر ٹی ایس قانون سے متعلق معلومات کو عام شہریوں تک پہنچائیں اور عوام میں شعور اجاگر کریں تاکہ زیادہ سے زیادہ لوگ اپنے قانونی حقوق سے آگاہ ہو سکیں اور مقررہ وقت میں سرکاری خدمات حاصل کر سکیں۔ شرکاء نے آر ٹی ایس کمیشن کی جانب سے عوامی آگاہی اور مؤثر سروس ڈیلیوری کے فروغ کے لیے کی جانے والی کاوشوں کو سراہا۔
