28/05/2026
پریس ریلیز
دفتر ڈپٹی کمشنر سکردو
تاریخ: 28 مئی 2026
*یومِ تکبیر کے موقع پر ضلعی انتظامیہ سکردو کے زیر اہتمام تقریب کا انعقاد*
یومِ تکبیر کے موقع پر ضلعی انتظامیہ سکردو کے زیر اہتمام ڈویژنل کانفرنس ہال سکردو میں ایک پروقار تقریب منعقد ہوئی، جس میں مختلف شعبہ ہائے زندگی سے تعلق رکھنے والے افراد، نوجوانوں، صحافیوں، عمائدین اور سول سوسائٹی کے نمائندگان نے شرکت کی۔
تقریب سے خطاب کرتے ہوئے ڈپٹی کمشنر سکردو حمزہ مراد نے کہا کہ پاکستان نے خطے میں طاقت کے توازن کو برقرار رکھنے کے لیے اپنے ایٹمی پروگرام پر کام شروع کیا۔ انہوں نے کہا کہ 1974 میں بھارت کے ایٹمی دھماکوں کے بعد خطے میں طاقت کا توازن متاثر ہوا، جس کے بعد پاکستان نے قومی سلامتی اور دفاع کو یقینی بنانے کے لیے ایٹمی صلاحیت حاصل کی۔
انہوں نے مزید کہا کہ پاکستان ایک ذمہ دار ایٹمی ریاست ہے اور اس نے ہمیشہ اپنے ایٹمی پروگرام کو مثبت، تعمیری اور دفاعی مقاصد کے لیے استعمال کیا ہے۔ پاکستان نہ صرف خطے بلکہ پوری دنیا میں امن، استحکام اور سلامتی کے فروغ کے لیے اپنا مؤثر کردار ادا کر رہا ہے۔ انہوں نے کہا کہ پوری قوم ملک کی ترقی، خوشحالی اور استحکام کے لیے متحد ہو کر جدوجہد کر رہی ہے، اور ان شاء اللہ آنے والے وقتوں میں پاکستان ترقی و خوشحالی کے میدان میں دنیا کے نمایاں ممالک میں شمار ہوگا۔
تقریب سے خطاب کرتے ہوئے سینئر تجزیہ نگار اور صحافی قاسم نسیم نے کہا کہ بھارت کی بار بار کی جارحیت کے باوجود پاکستان نے ہمیشہ ذمہ داری کا مظاہرہ کرتے ہوئے اپنے دفاعی حق کا استعمال کیا اور مسائل کے حل کے لیے مذاکرات اور سفارت کاری کو ترجیح دی۔ انہوں نے کہا کہ پاکستان کی کامیاب سفارت کاری کے باعث آج عالمی سطح پر بھی پاکستان امن کے قیام کے لیے بطور ثالث اہم کردار ادا کر رہا ہے۔
مقررین نے ایٹمی سائنسدان ڈاکٹر عبد القدیر خان اور دیگر قومی ہیروز کو خراجِ عقیدت پیش کرتے ہوئے ملکی دفاع کے لیے ان کی خدمات کو سراہا۔
تقریب کے اختتام پر پاکستان کی سلامتی، ترقی اور خوشحالی کے لیے خصوصی دعا بھی کی گئی۔
