04/09/2026
ع المكشوف
أخي الرجل، إذا إنت مش قدّ المسؤولية في تربية أطفالك ورعايتهم، ما في داعي تنجب ضحايا وتصير إنت وإياهم عالة ع المجتمع.
بسمع كثير ناس بتقول إنها بتخلف كثير عشان العزوة.
بتعرف شو يعني عزوة؟
يعني لما تجيب أولاد لا حول ولا قوة لهم في اختيارك كأب، واجبك إنك ترعاهم وتحنو عليهم وتحترمهم وتحميهم، وتعلّمهم يدافعوا عن أنفسهم في الحق، وتقوم بما هو واجبك كأب، لحتى يصيروا أشخاص بالغين خاليين من العقد النفسية، وقادرين يكونوا مدافعين ومنتجين في المجتمع.
مش تتركهم يربوا حالهم من حالهم، وتتخلى عن مسؤوليتك تجاههم، وتتسبب في عثراتهم مستقبلًا، ويكونوا على الهامش في الحياة.
و أكثر من هيك، بصيروا عالة وعِلّة على المجتمع، لأنه هالوطن مش ناقصه.
إذا بدك العزوة، ربّي أولادك صح.
العزوة مش بعدد الأولاد اللي عندك، العزوة بالأولاد اللي ربيتهم وطلعتهم للمجتمع أشخاص قادرين يعتمدوا على حالهم، ويحترموا غيرهم، ويدافعوا عن أنفسهم وعن الحق.
وطنك الأول هو بينك وبين أسرتك.
دافع عنهم واحميهم، لأنه إذا وطنك الصغير ما قدرت تحميه وتدافع عنه، مش راح يكون الك خير في وطنك الكبير.
