IntwarizuRwanda

25/09/2026

23/09/2026

None tariki ya 23 Nzeri 2026, Abapolisi n’izindi nzego z’umutekano bo ku rwego rwa ofisiye 167 bari mu mahugurwa azwi nka ‘Tactical Command Course’ mu ishuri rya Polisi rya Gishari, basuye Igicumbi cy’Intwari z’Igihugu giherereye i Remera, mu Mujyi wa Kigali.
Bahawe ikiganiro ku mateka y’ubutwari mu Rwanda, Intwari z’Igihugu ndetse n’indangagaciro z’ubutwari arizo:
• Kugira umutima ukomeye kandi ukeye,
• Kwitanga
• Gukunda igihugu
• kugira ubushishozi
• Kugira ubwamamare mu butwari
• kuba intangarugero
• kuba umunyakuri
• kugira ubupfura
• kugira ubumuntu.
Ikiganiro cyatanzwe kandi cyagarutse ku bukangurambaga bwo gukumira no kurwanya ikoreshwa ry’inzoga n’ibiyobyabwenge mu rubyiruko nk'uko byagaragaye ko bigira ingaruka mbi ku rubyiruko, ku miryango no ku iterambere ry’Igihugu.
Umunyamabanga nshingwabikorwa w’Urwego rushinzwe Intwari z’Igihugu, Imidari n’Impeta by’Ishimwe, Déo NKUSI, yashimiye ubuyobozi bwa Polisi y’u Rwanda (RNP) kuba bafata umwanya wo kuza gusura Ibicumbi by’Intwari, abasaba ko ubumenyi bahavana bajya babusangiza n’abandi, bikabafasha kwimakaza indangagaciro z’umuco n'ubutwari mu mirimo yabo ya buri munsi.

15/09/2026

Kuva tariki ya 14 Nzeri 2026, Urwego rushinzwe Intwari z’Igihugu, Imidari n’Impeta by’Ishimwe (CHENO) rwatangiye ubukangurambaga bugamije kwimakaza indangagaciro z’Umuco n’Ubutwari no kurwanya ikoreshwa ry’inzoga n’ibiyobyabwenge mu rubyiruko. Ubu bukangurambaga bukorerwa mu bigo by’amashuri abanza n’ayisumbuye mu Gihugu hose.
Biteganyijwe ko kuva mu kwezi kwa Nzeri, Ukwakira n’Ugushyingo 2026 ubu bukangurambaga buzakorerwa mu mashuri 220 yo mu Turere dutatu tugize Umujyi wa Kigali ari two Nyarugenge, Kicukiro na Gasabo. Kuva tariki ya 14 Nzeri 2026 kugeza tariki ya 30 Nzeri 2026 ubukangurambuga buzakorerwa mu Karere ka Nyarugenge.
Ikiganiro gitangwa gisobanura indangagaciro remezo z’umuco w’u Rwanda nko gukunda Igihugu, kunga ubumwe, gukunda umurimo unoze n’ubupfura, ndetse n’izindi ndangagaciro zizishamikiyeho. Ikiganiro kibanda kandi ku butwari mu mateka y’u Rwanda, Intwari z’u Rwanda, umuco wo gushima no gushimira abakoze ibikorwa by’ingirakamaro, imikorere ya Club Umuco n’Ubutwari no kurwanya ikoreshwa ry’inzoga n’ibiyobyabwenge mu rubyiruko. Uyu munsi tariki ya 15/9/2026, ubukangurambaga bwakorewe mu Mirenge ya Gitega na Nyamirambo mu bigo bikurikira: Collège Saint André, EL Shaddai school, EPADR Glory, Good Heritage Nursey school, ITUZE, Kigali Adventist school, EP Gitega na GS Cyahafi TSS.

30/08/2026

Abapolisi bagera kuri 296 bari mu mahugurwa ya ‘Non-Commissioned Officer (NCO) Course ‘mu ishuri rya Polisi riherereye i Gishari mu Karere ka Rwamagana, n’abatoza babo, basuye Igicumbi cy’Intwari z’Igihugu giherereye i Remera mu Mujyi wa Kigali.
Aba bapolisi, basuye Igicumbi cy’Intwari mu rwego rwo gusobanurirwa amateka y’Intwari z’Igihugu n’ibikorwa byaziranze no kurushaho gusobanukirwa indangagaciro z’umuco w’u Rwanda nko gukunda igihugu, ubwitange, kunga ubumwe, kurangwa n’ubupfura gukora umurimo unoze, ubwangamugayo n’izindi.
Nicholas RWAKA, ‘Division Manager’ muri CHENO yagaragaje ko kwimakaza indangagaciro z’umuco w’u Rwanda ari bumwe mu buryo bwo kurinda Abanyarwanda by’umwihariko urubyiruko ibikorwa bisenya umuryango bikagira n’ingaruka ku buzima nk’ibiyobyabwenge n’inzoga zitujuje ubuziranenge.
Aba bapolisi basabwe gukomeza kurangwa n’ubwitange, ubwangamugayo n’ubushishozi mu kazi kabo cyane cyane muri iki gihe Igihugu kiri mu rugamba rwo kurwanya inzoga zitujuje ubuziranenge.
Bamwe mu bapolisi basuye Igicumbi cy’Intwari bavuze ko byabateye umuhati wo kuzuza inshingano zabo neza bafatira urugero ku Ntwari zitangiye Igihugu.
Kugeza ubu, mu Rwanda hari Ibicumbi by’Intwari z’Igihugu bitatu aribyo: Igicumbi cy’Intwari giherereye i Remera mu Karere ka Gasabo, Igicumbi cy’Ubumuntu giherereye mu Karere ka Rubavu, ndetse n’Igicumbi cy’Ubunyarwanda giherereye i Nyange mu Karere ka Ngororero.
Ibicumbi by’Intwari z’Igihugu bigira uruhare rukomeye mu gufasha ababisura gusobanukirwa amateka y’Intwari z’Igihugu n’indangagaciro zaziranze ndetse no gukomeza kwimakaza umurage w’ubutwari mu Banyarwanda by’umwihariko mu rubyiruko.

06/08/2026

Uyu munsi tariki ya 6 Kanama 2026,
Urubyiruko rubarizwa mu Muryango Education for Nations & Humanitarian Africa GIRUBUNTU (ENHA GIRUBUNTU) rwo mu Murenge wa Kimironko rwasuye Igicumbi cy'Intwari z'Igihugu giherereye i Remera mu Mujyi wa Kigali, mu rwego rwo kurushaho gusobanukirwa amateka y'ubutwari mu Rwanda.
Ikiganiro bahawe cyagarutse ku mateka y'Intwari z’u Rwanda ndetse n’indangagaciro zaziranze. Basobanuriwe ko indangagaciro y’ubutwari yaranze Abanyarwanda kuva kera, ndetse ari na yo yatumye u Rwanda rubaho binyuze mu kuruhanga, kurwagura, kururinda no kuruteza imbere. Basobanuriwe ibyiciro by’Intwari z'Igihugu uko ari bitatu: Imanzi, Imena n’Ingenzi.
Nyuma y’ikiganiro, urwo rubyiruko rweretswe bimwe mu bigize Igicumbi cy’Intwari z'Igihugu ari byo imva za zimwe mu Ntwari n’ibimenyetso ndetse n’ubusitani burimo indabo, ibiti n’imiti gakondo bifite ibisobanuro byihariye mu mateka n'umuco by’u Rwanda.
UMUHIRE Carine umwe mu rubyiruko rwasuye Igicumbi cy’Intwari, yavuze ko bari bafite amatsiko yo kumenya neza amateka y'Intwari z'Igihugu n'icyo umuntu yakora kugira ngo abe Intwari y'Igihugu. Yagaragaje ko mbere y'uruzinduko yatekerezaga ko Intwari y'Igihugu ishobora kuba ari umusirikare gusa, ariko ubu yamenye ko ubutwari bugaragarira mu bikorwa by'indashyikirwa birangwa n'ubwitange, gukunda Igihugu, kurangwa n’ubumwe, gukora umurimo unoze, ubupfura n’izindi.
Umuyobozi wa ENHA GIRUBUNTU, Freedom Felicien KABALELE, yavuze ko ashimira ubuyobozi bwa CHENO urahare bugira mu kwimakaza indangagaciro z'ubutwari mu Banyarwanda by’umwihariko mu rubyiruko. Yavuze kandi ko ubumenyi bakuye mu gusura Igicumbi cy’Intwari z’Igihugu, bazabusangiza n’abandi batabashije kuza bityo indangagaciro z’ubutwari zikagezwa kuri benshi.

01/07/2026

Mu rwego rwo kurushaho gusobanukirwa amateka y'ubutwari bwaranze u Rwanda no gukomeza kwimakaza indangagaciro z'ubutwari; uyu munsi, abarezi ba GS RUGOGWE ryo mu Karere ka Gatsibo, basuye Igicumbi cy’Intwari z’Igihugu giherereye i Remera mu Mujyi wa Kigali. Bahawe ikiganiro ku mateka y’ubutwari mu Rwanda, banasura ibice bikigize.
Umuyobozi wa GS Rugogwe NIYONKURU Hamza, yavuze ko uru ruzinduko rwabongereye ubumenyi ku mateka y'Igihugu kandi rukaba rugiye kubafasha gukomeza gutoza abanyeshuri indangagaciro z'ubutwari, ubwitange, gukunda Igihugu, kunga ubumwe n’izindi.

30/06/2026

Itsinda ry’abarezi n’ubuyobozi bw’ishuri ryisumbuye rya Nyange basuye Igicumbi cy’Intwari z’Igihugu mu rwego rwo kurushaho gusobanukirwa amateka no gukomeza kwimakaza indangagaciro n’umuco w’u Rwanda.
Umuyobozi w’ishuri yavuze ko uru rugendo shuri rwabafashije kurushaho gusobanukirwa amateka y’Intwari z’Igihugu ndetse bizabafasha gukomeza gutoza abanyeshuri umuco w’ubutwari bagera ikirenge mu cya bakuru babo (Intwari z’Imena z’i Nyange).

30/06/2026

Uyu munsi, abagize ‘Association pour les Enfants du Monde’, umuryango ufasha abana bafite ubumuga n’abaturuka mu miryango itishoboye, basuye Igicumbi cy’Intwari z’Igihugu bagamije kwigira ku mateka y’ubutwari, ubwitange, n’izindi ndangagaciro zaranze Intwari z’u Rwanda.
Manzi Marciale Ruzindana, waje ayoboye iri tsinda, yavuze ko kumenya amateka y’ubutwari bwaranze Igihugu ari ingenzi cyane, kuko bifasha urubyiruko gusobanukirwa aho Igihugu cyavuye, indangagaciro zacyubatse, ndetse bikabashishikariza gukunda Igihugu no kurangwa n’ubwitange.

26/06/2026

Abanyeshuri n’abarezi bo muri GS Gicaca, ishuri riherereye mu Karere ka Bugesera, basuye Igicumbi cy’Intwari z’Igihugu, aho basobanuriwe amateka y’ubutwari mu Rwanda ndetse n’indangagaciro zaranze Intwari z’u Rwanda. Uru ruzinduko rwabafashije kurushaho gusobanukirwa uruhare rw’ubutwari mu kubaka Igihugu no gukomeza kwimakaza indangagaciro nk’ubumwe, ubupfura, ubwitange n'izindi.