12/06/2026
"അഞ്ച് വർഷത്തോളമായി നിന്റെ സ്വപ്നങ്ങളാണ് നിന്റെ മുന്നിൽ. ആ സന്തോഷം എനിക്കും കാണണം. എനിക്കിന്ന് പെരുന്നാളാണ്."
ഞങ്ങളുടെ സഹോദരൻ ഉസാമ അൽ അംബർ (അബു ഫൈസൽ) പറഞ്ഞ വാക്കുകളാണിത്.
പ്രിയ സഹോദരൻ യൂസുഫ് പെരിന്തൽമണ്ണയുടെ വീട്ടിൽ ജയിൽ മോചിതരായ അനന്തുവിനും അബ്ദുൽ റഹീമിനുമൊപ്പം കൂടിയിരിക്കുമ്പോഴാണ് അബു ഫൈസൽ വീഡിയോ കാൾ ചെയ്ത് ഇത് പറഞ്ഞത്. പതിവുപോലെ അന്നും അദ്ദേഹം എന്നെ വിളിച്ച് വിശേഷങ്ങൾ അന്വേഷിച്ചു. അനന്തുവും, അബ്ദുൽ റഹീമും വരുന്നുണ്ടെന്ന് പറഞ്ഞപ്പോൾ അവരെ കണ്ടതിന് ശേഷം വിളിക്കാൻ പറഞ്ഞു.
അവരെത്തി, ഞങ്ങൾ അദ്ദേഹത്തോട് സംസാരിച്ചു. കഴിഞ്ഞ കുറച്ച് വർഷങ്ങളായി ഞാൻ നേരിട്ട പരീക്ഷണങ്ങളും ' പ്രയാസങ്ങളും അദ്ദേഹത്തിന് നേരിട്ട് അറിയാവുന്നതാണ്. “അതിനെല്ലാം ഇന്ന് ഫലം കണ്ടില്ലേ?” എന്ന് പറഞ്ഞ് അദ്ദേഹം ഹൃദയം നിറഞ്ഞ പ്രാർത്ഥനകൾ നേർന്നു.
അദ്ദേഹം ശിമാഖ് (തലപ്പാവ്) ഉൾപ്പെടെ വെള്ള വസ്ത്രത്തിലാണല്ലൊ (വിശേഷ ദിവസങ്ങളിലാണ് ഇങ്ങനെ വെള്ള വസ്ത്രം ധരിച്ച് കണ്ടിട്ടുള്ളത്) എന്ന് ഞാൻ ചോദിച്ചപ്പോൾ അദ്ദേഹം പുഞ്ചിരിയോടെ മറുപടി പറഞ്ഞു, "അഞ്ച് വർഷത്തോളമായി നിന്റെ സ്വപ്നങ്ങളാണ് നിന്റെ മുന്നിൽ. ആ സന്തോഷം എനിക്കും കാണണം. എനിക്കിന്ന് പെരുന്നാളാണ്."
പ്രയാസമേറിയ കേസുകൾ ഞാൻ കൈകാര്യം ചെയ്യുമ്പോഴും ദീർഘയാത്രകളിലുമെല്ലാം ഞാൻ വിവരങ്ങൾ അദ്ദേഹത്തെ അറിയിക്കാറുണ്ട്. *"طمني يا صديق"* എന്ന് പറഞ്ഞ് ഒരു സഹോദരനെപ്പോലെ ചേർത്ത് നിർത്തി അദ്ദേഹം എനിക്ക് നൽകുന്ന ആത്മവിശ്വാസവും ധൈര്യവും വളരെ വിലപ്പെട്ടതാണ്.
ഇത്തരം ആത്മാർത്ഥമായ ബന്ധങ്ങൾ അല്ലാഹു എന്നും നിലനിർത്തട്ടെ.
എല്ലാവരുടെയും പ്രാർത്ഥനകളിൽ ഞങ്ങളെയും ഉൾപ്പെടുത്തുക.
സ്നേഹപൂർവ്വം,
സിദ്ദീഖ് തുവ്വൂർ.
