27/08/2026
DHUUSAMAREEB – 27 AGOOSTO 2026
Tababar Loo Qabtay Howl-wadeennada Ceelasha ee Gobolka Galgaduud
Agaasimaha Guud ee Wasaaradda Tamarta iyo Khayraadka Biyaha ee Galmudug, Mudane Ibrahim Abdulkadir Mohamed, Agaasimaha Waaxda Tayadhowrka Biyaha, Eng. Abdiweli Mohamed Artan, iyo Isuduwaha Gobolka Mudug, Ahmed Hasan Farah, ayaa si wadajir ah u soo xiray tababar loo qabtay qaar ka mid ah howl-wadeennada ceelasha ee Gobolka Galgaduud.
Tababarkan ayaa diiradda lagu saaray xoojinta aqoonta, xirfadaha iyo awoodda howl-wadeennada ceelasha, gaar ahaan motoristayaasha iyo maamulka ceelasha, si loo hubiyo in adeegyada biyaha si hufan, joogto ah iyo badbaado leh loogu adeego bulshada.
Qodobbada Muhiimka ah ee Tababarka
Intii uu socday tababarku, howl-wadeennadu waxay si qoto dheer uga faa’iideysteen mowduucyo muhiim u ah hawlgelinta, dayactirka iyo maamulka ilaha biyaha, kuwaas oo ay ka mid ahaayeen:
1. Hawlgelinta iyo Dayactirka Ilaha Biyaha
Kor u qaadista aqoonta iyo xirfadaha ku aaddan hawlgelinta, dayactirka iyo joogteynta adeegyada ilaha biyaha.
2. Fahamka qalabka iyo kaabayaasha Biyaha
Kobcinta fahamka qalabka iyo kaabayaasha loo isticmaalo soo saarista, gudbinta iyo kaydinta biyaha, iyo habka saxda ah ee loo maareeyo.
3. Cilad-bixinta Qalabka iyo Nidaamyada Ceelasha
Barashada hababka lagu aqoonsado, lagu baaro laguna xalliyo ciladaha ka dhasha qalabka, si loo yareeyo hakadka adeegyada biyaha.
4. Diiwaangelinta iyo La-socodka Xogta Ceelasha
Xoojinta awoodda howl-wadeennada ee diiwaangelinta, kaydinta iyo la-socodka xogta rasmiga ah ee ceelasha, si loo helo xog sax ah oo lagu saleeyo qorsheynta iyo go’aan-qaadashada.
5. Maamulka Wanaagsan ee Ilaha Biyaha
Kor u qaadista fahamka mabaadi’da maamulka wanaagsan, isla-xisaabtanka iyo mas’uuliyadda ka saaran howl-wadeennada iyo maamulayaasha ilaha biyaha.
6. Ilaalinta iyo Hubinta Tayada Biyaha
Barashada hababka lagu kormeero, lagu tijaabiyo laguna hubiyo tayada biyaha, si bulshada loo gaarsiiyo biyo nadiif ah oo ammaan ah.
7. Daaweynta iyo Koloriinaynta Biyaha
Kobcinta aqoonta ku saabsan hababka daaweynta iyo koloriinaynta biyaha, si loo yareeyo khataraha caafimaad ee ka dhalan kara isticmaalka biyo aan si wanaagsan loo daaweyn.
Ujeeddada Tababarka
Ujeeddada tababarku waxay ahayd xoojinta awoodda iyo xirfadaha howl-wadeennada ceelasha istiraatiijiga ah ee Galmudug, si ay awood ugu yeeshaan:
- Inay si hufan u maareeyaan una hawlgeliyaan adeegyada biyaha.
- Inay ilaaliyaan oo dayactiraan kaabayaasha iyo qalabka biyaha.
- Inay si degdeg ah u aqoonsadaan una xalliyaan ciladaha ka dhasha ceelasha iyo nidaamyadooda.
- Inay si sax ah u diiwaangeliyaan una la socdaan xogta ceelasha.
- Inay hubiyaan tayada iyo badbaadada biyaha.
- Inay bulshada u xaqiijiyaan adeeg biyo oo joogto ah, tayo leh oo ammaan ah.
Ballanqaadka Wasaaradda
Wasaaradda Tamarta iyo Khayraadka Biyaha ee Galmudug waxay ka go’an tahay horumarinta adeegyada biyaha, xoojinta awoodda howl-wadeennada iyo kor u qaadidda tayada nolosha bulshada.
Wasaaraddu waxay mudnaan gaar ah siinaysaa sidii bulshada Galmudug loo gaarsiin lahaa biyo nadiif ah, ammaan ah oo waara, iyadoo la xoojinayo dayactirka iyo ilaalinta kaabayaasha biyaha, korna loo qaadayo aqoonta iyo xirfadaha shaqaalaha ka shaqeeya adeegyada biyaha.
Tababarrada noocan oo kale ah ayaa qayb muhiim ah ka ah dadaallada Wasaaradda ee lagu xaqiijinayo in ilaha biyaha ee muhiimka u ah bulshada Galmudug loo maareeyo si hufan, waara iyo masuuliyad leh.
— DHAMMAAD —
Abdirahman Hussain Kulmiye
Xafiiska Warfaafinta & Xiriirka Warbaahinta
Wasaaradda Tamarta iyo Khayraadka Biyaha ee Galmudug
Wixii faahfaahin ah, fadlan kala xiriir;
E-mail: [email protected]
