02/02/2026
Qorshe Dib-u-dhis Lagu Sameynayo Buundada Sabuun ee Jowhar
Jowhar 02-02-2026 Jowhar, Hirshabelle – Waxaa la qorsheynayaa in dib-u-dhis ballaaran lagu sameeyo Buundada Sabuun ee magaalada Jowhar, taas oo ah marin muhiim u ah isku socodka dadka iyo gaadiidka, isla markaana door weyn ka qaadata maareynta biyaha iyo horumarinta deegaanka guud ahaan magaalada.
Goobta uu mashruucu ka hirgelayo ayaa waxaa booqday wafdi ka kooban Wasaaradda Beeraha iyo Waraabka Dowladda Hirshabeelle, Maamulka Degmada Jowhar, iyo Hay’adda FAO, waxaana wehlinayay injineerro caalami ah oo si qoto dheer u sameeyay qiimeyn iyo cabbir farsamo oo la xiriira xaaladda buundada iyo kanaallada biyaha.
Injineerrada ayaa sheegay in marka mashruuca dib-u-dhisku billowdo la qorsheynayo:
Hagaajinta iyo casriyeynta albaabbada Buundada Sabuun
In guryaha ku yaalla kanaallada biyaha laga raro si loo furo marinnada biyaha
Dib-u-dayactir ballaaran oo lagu sameeyo kanaallada waaweyn si loo hubiyo socodka biyaha, loogana hortago fatahaado, isla markaana loo ilaaliyo badbaadada deegaanka
Intii booqashadu socotay, Wasaaradda Beeraha iyo Waraabka Hirshabeelle, Maamulka Degmada Jowhar, iyo Hay’adda FAO ayaa warbixino ka dhageystay dadka deegaanka, kuwaas oo soo bandhigay aragtidooda, baahiyahooda, iyo caqabadaha ay kala kulmaan kanaallada iyo buundada, gaar ahaan xilliyada roobabka.
Ugu dambeyn, Guddoomiyaha Degmada Jowhar ahna Duqa Caasimadda Mudane Cismaan Maxamed Muqtaar Baarey ayaa si weyn u soo dhaweeyay qorshaha dib-u-dhiska Buundada Sabuun, isagoo ku tilmaamay mashruuc istiraatiiji ah oo wax weyn ka tari doona horumarinta kaabeyaasha magaalada, fududeynta isku socodka, iyo hagaajinta nidaamka maareynta biyaha. Guddoomiyuhu wuxuu uga mahadceliyay Wasaaradda Beeraha iyo Waraabka Hirshabeelle iyo Hay’adda FAO doorka ay ka qaadanayaan mashruucan, isagoo bulshada deegaanka ugu baaqay inay la shaqeeyaan hay’adaha fulinaya si loo xaqiijiyo hirgelin guuleysata oo waarta.
DHAMAAD
Xafiiska Warfaafinta.
Dowladda Hoose ee Degmada Jowhar..
