03/06/2026
WAR-SAXAAFADEED
Ururka Horumar iyo Midnimo Qaran (NPU) wuxuu maanta soo saaraya war-saxaafadeed ku saabsan habraaca, amniga iyo hufnaanta Doorashada Hoggaanka Dowladda Koonfur Galbeed Soomaaliya.
Ururku wuxuu adkeynayaa muhiimadda ay leedahay in doorashadu ku dhacdo si waafaqsan shuruucda dalka, iyadoo la ilaalinayo cadaalad, daahfurnaan iyo sinaan ay ku wada tartamaan dhammaan musharaxiinta.
1. HABRAACA DOORASHADA
A.
Ilaalinta, maareynta iyo fulinta habraaca doorashada waxaa si buuxda masuuliyaddeeda u leh Guddiga Madaxa-bannaan ee Doorashooyinka Qaranka iyo Soohdimaha.
B.
Hubinta, xaqiijinta iyo diyaarinta goobta doorashada lagu qabanayo waa masuuliyad gaar ah oo saaran Guddiga Madaxa-bannaan ee Doorashooyinka Qaranka iyo Soohdimaha, si loo xaqiijiyo jawi doorasho oo xor iyo xalaal ah.
2. AMNIGA DOORASHADA
A.
Amniga goobta doorashada waa inuu noqdaa mid dhexdhexaad ah kana madax-bannaan dhammaan ciidamada ama ilaalada gaarka ah ee musharaxiinta u tartamaya xilka Hoggaamiyaha Dowladda Koonfur Galbeed Soomaaliya.
B.
Si loo xaqiijiyo kalsoonida iyo madaxbannaanida doorashada, goobta lagu qabanayo waa inay noqotaa meel ay si siman ugu wada tartami karaan dhammaan musharaxiinta, iyadoo aan cid gaar ah loo eexan.
3. SINAANTA MUSHARAXIINTA
A.
Guddoomiyaha Golaha Shacabka ee Jamhuuriyadda Federaalka Soomaaliya, Mudane Sheekh Aadan Maxamed Nuur (Madoobe), ahna musharrax u taagan xilka Hoggaamiyaha Dowladda Koonfur Galbeed Soomaaliya, waa inuu ka tanaasulaa xilka Guddoomiyaha Golaha Shacabka inta lagu jiro tartanka doorashada si loo xaqiijiyo sinaanta musharaxiinta.
B.
Ururka NPU wuxuu aaminsan yahay in xilka Guddoomiyaha Golaha Shacabka iyo musharraxnimada hoggaanka dowlad-goboleed aan la isku hayn karin isku mar, maadaama ay taasi saamayn karto mabda'a sinaanta iyo cadaaladda doorashada.
4. GUNAANAD
Ururka Horumar iyo Midnimo Qaran (NPU) wuxuu ugu baaqayaa Dowladda Federaalka Soomaaliya, Hoggaanka KMG ah ee Dowladda Koonfur Galbeed, bulshada rayidka ah, hay'adaha ilaalinta xuquuqda aadanaha iyo Beesha Caalamka inay si dhow ula socdaan geeddi-socodka doorashada, si loo xaqiijiyo in ay noqoto doorasho daahfuran, xor ah, cadaalad ah, isla markaana ka tarjumaysa rabitaanka shacabka.
Wabilaahi Towfiiq
