30/01/2018
[8:38, 30/1/2018] +58 414-3333042: شقد ماكان جيبك مطنبر ومعك مصرات مابتحرقا النيران في شغلات مابتحسن تشتريا بكنوز الدنيا...خلي رفقاتك يطمشولك عينيك ويشيلوك عمي كراسي ويحطوك بمحل ويقلولك حزير وين انت .... ريحة أول باب انطاكة غير ريحة ساحة الفستق غير ريحة السقطية غير ريحة سوق العطيرين غير ريحة سوق الزرب...!!!! على كتف خان الحرير الملبس البلدي الازرق اللي عبتطلع منو اللهبة والمنشور على بلاسة قدام وطفة غير ريحة الراحة قدام محلات ولاد عمنا ابو اللول...!!! ياسيدي ريحة المعلاق على عربانة ابو نبهان قدام وبعدين جوات خان الوزير غير ريحة المعلاق عند عتيق...!! ريحة الدريرة وقت كنت ولد زغير بسوق الانتاج من عند كرزة وفتوح غير ريحتا من عندون في المدينة هي الترابه الحلبية و ريحة عطر الراماج الصغير من عندهم غير ....!!! وريحة عطر بون سوار من عند فتوح بكل بيت كانت تفوح ، وكان على كتف مدرسة الامين كان في سمان وخضرجي ختيار من بيت الطير كل يوم تنين المسويات يشعل قزليله قدام المحل لتصير جمر ويحمص بن...!!! السماعيليه كلا تصف عالدور...الشباب اللي من جيلي جرب غمض عينيك واتذكر ريحة بن بونجة بالموشية العتيقة...!!! ريحة فستق العبيد تحت عيادة الدكتور عبدالكريم شحادة او على كتف احذية المصري جنب سينما الحمراء...ريحة كاتويات البهار عند كزة بعوجة الكيالي....!!! غمض واتخيل حالك عند المزكتلي عبتشم علبة لبن بيبي مشوط...!!! ريحة البهار عند ولاد الهلالي غير ريحة البهار عند البوادقجي وريحة بهار حج محمد كرزة مافي منا غير بالجنة...!!! ريحة الصابون الغار فنصة وجبيلي وبركات وزنابيلي غير كل الصوابين وريحة زعتر الشرق غير زعتر قبرصلي غير زعتر الناصر وكل واحد نكهته اطيب من التاني
تخيل ريحة الخبز الميكن وأنت عبتفتو بالمخلوطة او بعدس حاموض او زريقة الحصرم او مريسة القمر دين او الخيار بلبن او ريحتو وقت بتبلو بالمي مشان تغمس فيو مكمور...!!!
شغلتين معشعشات براس ولاد حلب من الصغير للكبير للمقمط بالسرير ريحة فرن الحارة...لاقبلا ولا بعدا...شقد ماراح وفتل واتغرب بس يشم ريحة فرن او خبز بيتذكر فرن الحارة...فرن عجيلو وابو طالب والواعظ والاتحاد والرازي والحمدانية والموشية وضل عد لتخلص الدنى...!!!! الريحة الاهم بخيال الحلبية وبيخطرلي انو هي اهم ريحة.......لأ ياسيدي مابيخطرلي ومتأكد وبراهين أمة لا اله الا الله وعلى تحدي انو هالريحة بغلاوة الام والاب عند الحلبية...!!! ريحة طراب حلب اول نزلة المطرة...؟؟؟؟؟......الحلبي بتلاقيه سحب نفس من انفو بتحس انو بدو يشرق كل هوا الدنيا وبيبتسم لو كان لحالو...واذا معو حدا اول شغلة بطلع باللي معو وبقلو شميت..!!! واجباري بعبر بصوت عيلي....أوخ...........دخيل الله..!!!!
وأنت ريجع من الشام من حمص من حماه من اللادقية وبتكون ناييم وشيطط رويلك على خدك عند الزربة بتفيق بتقول كني وصلنا...!!!!
ياسيدي أنا مشتاق لريحة حلب ..دخيل الله ما أحلاها 🌸🌺🌸🌺
