31/05/2026
عشت ها المشاعر الحقيقية ٣٧ سنة
واكتر كلام صادق وحقيقي وعميق اللي قريته منك ، وكله عفوية 👍
انشالله بترجع سالم غانم 🙏
سامحوني... كذبت عليكم.
ما بعرف إذا كل المغتربين هيك...
بس أنا كذبت عليكم.
كل مرة سألتوني: "كيفك؟"
كنت جاوب بسرعة:
"الحمد لله... أنا بخير."
"الأمور تمام."
"ما في شي."
بينما الحقيقة كانت أحياناً غير هيك تماماً.
كنت مفكر إني الوحيد يلي عم يخبي وجعه ورا الصور الحلوة والفيديوهات والضحكات.
لحد ما اكتشفت إنو كتير منا كمغتربين عم يعملوا نفس الشي.
مننزل صور من مطارات أوروبا وشوارعها وحدائقها...
ومنصور قهوتنا الصباحية...
ومنحكي عن النظام والأمان وفرص العمل...
بس قليل جداً يلي بيحكي عن الوحدة.
عن الضغط النفسي.
عن الليالي الطويلة يلي منقضيها نفكر بأهلنا وناسنا.
منشتغل ليل نهار...
ومنركض بين الشغل والفواتير والمسؤوليات...
ولما يرن التلفون من أمي أو أبوي أو أخي أو أختي، فجأة بيتغير صوتي:
"لا تشغلوا بالكم... أنا بخير."
"الحمد لله، الأمور تمام."
"هون كل شي مرتب."
مو لأننا كذابين...
بس لأننا منحب أهلنا أكتر من حالنا.
ما بدنا نحملهم هم فوق همهم.
ولا نخليهم يناموا وهم قلقانين علينا.
بس الحقيقة إنو هالقناع عم يكلفنا غالي.
عم نعيش عزلة الغربة...
وعزلة إنك ما فيك تشكي لحدا حتى لأقرب الناس إلك.
لأنك طول الوقت خايف تهز الصورة يلي رسموها عنك...
صورة "المغترب الناجح" يلي أموره كلها ماشية متل الساعة.
ومع الوقت بيصير الكل مقتنع إنك مرتاح...
وإنو الفلوس عم تنزل عليك من السما...
بينما الحقيقة مختلفة تماماً.
في أيام بتكون فيها متعب لدرجة إنك ما عندك طاقة تحكي مع حدا.
وفي ليالي بيكون كل يلي نفسك فيه...
إنك تسمع صوت الناس يلي بتحبهم...
بدون ما تضطر تمثل إنك قوي.
الحيرة بتدبح...
يا ترى نحنا صح لما عم نخبي قساوة الغربة وبرودتها عن أهلنا؟
ولا عم نظلم حالنا ونظلمهم بهالصورة المثالية الوهمية؟
لكل مغترب عم يقرأ هالكلمات:
كم مرة قلت: "أنا منيح" وأنت مو منيح؟
وكم مرة سكرت الخط...
وعيونك مليانة حكي ما حكيته؟
وصلنا هذا المنشور عبر بريد الصفحة، وننشره كما وصلنا تقريباً...
أما الصورة فمو تعبيرية...
الصورة حقيقية. والجواز حقيقي. وتذكرة السفر حقيقية.
والوجع... بيعرفه كل حدا عاش الغربة يوم من الأيام. 💔✈️🇸🇾
#ألمانيا #الغربة #المغتربين #سوريا #أوروبا #اشتقنالكن
