30/08/2026
.يا شباب جديدة عرطوز، كلكن شاهمة ومروة ومرجله بعد الي شفاه بس بهالفترة بالذات لازم نكون أوعى وأهدى من أي وقت مضى. إذا أي حدا صار معه أي مشكلة أو تعرض لظلم أو اعتداء، يا ريت يتجنب أي ردّة فعل أو تصعيد فردي، وما يخلي مشكلة شخصين تتحول لمشكلة بين عائلات أو مناطق.
الحمد لله صار عنا مجلس أعيان ولجنة صلح بجديدة عرطوز، وفي تنسيق وتواصل بينهم وبين مشايخ ووجهاء من دير الزور. فإذا أي شخص تعرض لمشكلة، يروح ويقدم شكواه للجنة، ويعطيهم كل التفاصيل والمعلومات عن الشخص المعتدي أو اسمه إذا كان معروف.
الناس اللي نحنا اخترناهم لتمثّلنا وتجيب حقنا، لازم نعطيهم الثقة والوقت ليتصرفوا بالطريقة الصحيحة. وهم مسؤولين يتابعوا الموضوع مع الطرف الثاني ويوصلوا للحق ويجيبوه بالطرق المناسبة، بدون ما نفتح باب للفتنة أو نجرّ حالنا لمشاكل أكبر.
حقنا ما بيضيع، بس بنفس الوقت كرامتنا ما بتكون بالفزعة والتصعيد، كرامتنا إننا نكون واعيين ونحافظ على أهلنا وبلدنا.
#
خلونا نوقف جنب بعض، ونترك معالجة المشاكل لأهل الحكمة واللجنة اللي اخترناها، وأي شخص عنده مظلمة لا يسكت عنها، بس كمان لا يتصرف لحاله.
أهل جديدة عرطوز وأهل دير الزور أهل، وأي شخص بيغلط بيتحمل مسؤولية غلطه كشخص، مو كمنطقة أو عشيرة. الله يحفظ الجميع ويبعد عنا الفتنة
