ຂ່າວສານ ແຮງງານ ແລະ ສະຫວັດດີກ

ຂ່າວສານ ແຮງງານ ແລະ ສະຫວັດດີກ ກະຊວງແຮງງານ ແລະ ສະຫວັດດີການສັງຄົມ, Ministry of Labour and Social Welfare of Lao PDR, ກະຊວງແຮງງານ ແລະ ສະຫວັດດີການສັງຄົມ, Ministry of Labour and Social Welfare of Lao PDR, ກະຊວງແຮງງານ ແລະ ສະຫວັດດີການສັງຄົມ , ກຳລັງແຮງງານ, ຕະຫລາດແຮງງານ, ຄຸ້ມຄອງແຮງງານ, ປົກປ້ອງສັງຄົມ, ແຮງງານເດັກ, ຜູ້ພິການ, ຜູ້ດ້ອຍໂອກາດ
(2)

เปิดเหมือนปกติ

ທ່ານ ປອ ຄຳແພງ ໄຊສົມແພງ ພ້ອມຄະນະ ຕ້ອນຮັບທູດອົສຕຣາລີ.................................ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວ...
26/02/2021

ທ່ານ ປອ ຄຳແພງ ໄຊສົມແພງ ພ້ອມຄະນະ ຕ້ອນຮັບທູດອົສຕຣາລີ
.................................
ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງ ໄດ້ຕ້ອນຮັບການເຂົ້າການຢ້ຽມຂໍ່ານັບຂອງ ທ່ານ ໂພຣ ແຄລີ (Paul Kelly) ໃນວັນທີ 26 ກຸມພານີ້ ທີ່ກະຊວງ ຮສສ, ເນື່ອງໃນໂອກາດຖືກແຕ່ງຕັ້ງໃຫ້ດຳລົງຕໍາແໜ່ງເປັນ ເອກອັກຄະລັດຖະທູດວິ ສາມັນ ຜູ້ມີອໍານາດເຕັມ ແຫ່ງ ອົສຕຣາລີ ປະຈໍາ ສປປ ລາວ ຄົນໃໝ່.
ໃນໂອກາດດັ່ງກ່າວ, ທ່ານ ປອ ຄຳແພງ ໄຊສົມແພງ ໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ໂພຣ ແຄລີ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດ ແຫ່ງ ອົສຕຣາລີ ປະຈໍາ ສປປ ລາວ ແລະ ໄດ້ຕີລາຄາສູງ ຕໍ່ສາຍພົວພັນມິດຕະພາບອັນຍາວນານ ແລະ ຫວັງວ່າ ທ່ານເອກອັກຄະລັດຖະທູດຄົນໃໝ່ ຈະສືບຕໍ່ຊຸກຍູ້ ແລະ ປະກອບສ່ວນເຂົ້າໃນການ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີປະ ສິດທິພາບລະຫວ່າງ ສປປ ລາວ ແລະ ອົສຕຣາລີ ໃຫ້ແຕກດອກອອກຜົນຍິ່ງໆຂຶ້ນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ.
ທ່ານ ປອ ຄຳແພງ ໄຊສົມແພງ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນ ໂດຍຜ່ານ ທ່ານເອກອັກຄະລັດຖະທູດໄປຍັງ ລັດຖະບານ ແລະ ປະຊາຊົນ ອົສຕຣາລີ ທີ່ໄດ້ໃຫ້ການຊ່ວຍ ເຫຼືອແກ່ ສປປ ລາວ ໃນຫຼາຍຂະແໜງການຢ່າງຕໍ່ເນື່ອງ, ເປັນຕົ້ນແມ່ນການພັດທະນາຊັບພະຍາກອນ ມະນຸດ, ສາທາລະນະສຸກ, ການຄ້າ-ການລົງທຶນ, ກະສິກໍາ, ການພັດທະນາຊົນນະບົດ ແລະ ອື່ນໆ ເວົ້າລວມ, ເວົ້າສະເພາະກໍ່ຄື ລັດຖະບານອົສຕຣາລີ ໄດ້ໃຫ້ການຊວ່ຍເຫຼືອວຽກໄພພິບັດ, ພ້ອມນີ້ລັດຖະບານອົສຕຣາລີ ຖືໄດ້ວ່າຈັດຢູ່ໃນອັນດັບຕົ້ນໆຂອງປະເທດທີ່ໃຫ້ການຊ່ວຍເຫຼືອເພື່ອການພັດທະນາ (ODA) ໃຫ້ແກ່ ສປປ ລາວ.
ສປປ ລາວ ແລະ ອົສຕຣາລີ ສ້າງຕັ້ງສາຍພົວພັນການທູດນໍາກັນ ໃນວັນທີ 15 ມັງກອນ 1952.

(ຂ່າວສານ ຮສສ)

ທ່ານ ປອ ຄຳແພງ ໄຊສົມແພງ ຕ້ອນຮັບທູດໄທ ຄົນໃໝ່ ປະຈຳ ລາວ...............................................ວັນທີ 26 ກຸມພາ 2021 ທີ...
26/02/2021

ທ່ານ ປອ ຄຳແພງ ໄຊສົມແພງ ຕ້ອນຮັບທູດໄທ ຄົນໃໝ່ ປະຈຳ ລາວ.
..............................................
ວັນທີ 26 ກຸມພາ 2021 ທີ່ ກະຊວງແຮງງານ ແລະ ສະຫວັດດີການສັງຄົມ(ຮສສ), ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຈດສະດາ ກະຕະເວທິນ, ໃນໂອກາດມາດໍາລົງຕຳແໜ່ງເປັນເອກອັກຄະຣາຊະທູດ ແຫ່ງ ຣາຊະອານາຈັກໄທ ຄົນໃໝ່ ປະຈຳ ສປປ ລາວ.
ໃນໂອກາດດັ່ງກ່າວ, ທ່ານປອ ຄຳແພງ ໄຊສົມແພງ ໄດ້ສະແດງຄວາມຍິນດີຕ້ອນຮັບ ທ່ານ ເຈດສະດາ ກະຕະເວທິນ ແລະ ໄດ້ສະແດງຄວາມຊົມເຊີຍທີ່ທ່ານໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງ ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງ ຣາຊະອານາຈັກໄທ ປະຈຳ ສປປ ລາວ. ໃນໂອກາດນີ້ສອງຝ່າຍໄດ້ຕີລາຄາສູງຕໍ່ການພົວພັນມິດຕະພາບ ແລະ ການຮ່ວມມືອັນດີງາມ ຕະຫຼອດໄລຍະ 70 ປີຜ່ານມາ. ການພົວພັນ ແລະ ຮ່ວມມື ລາວ-ໄທ ແມ່ນມີຄວາມໃກ້ຊິດສະໜິດສະໜົມ ແລະ ມີຫຼາຍກົນໄກການຮ່ວມມືລະຫວ່າງກັນ ເພື່ອຂັບເຄື່ອນບັນດາແຜນງານການຮ່ວມມືສອງຝ່າຍ ຢ່າງເປັນປົກກະຕິ, ປະຊາຊົນສອງປະເທດມີຄວາມຜູກພັນຊຶ່ງກັນ ແລະ ກັນ ໂດຍມີການໄປມາຫາສູ່ ຄ້າຂາຍ ແລະ ເຮັດບຸນສິນກິນທານຮ່ວມກັນຢ່າງເປັນປະຈຳ ເວົ້າລວມ, ເວົ້າສະເພາະກະຄື ສອງກະຊວງ ໂດຍໄດ້ມີການຮວ່ມມືວຽກແຮງງານການຈັດສົ່ງແຮງານໄປເຮັດວຽກຖືກຕ້ອງຕາມກົດໝາຍ, ການສ້າງແລະ ພັດທະນາສີມືແຮງງານ ຊຶ່ງໄດ້ປະກອບສ່ວນອັນສໍາຄັນເຂົ້າໃນການ ເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ດີຖານບ້ານໃກ້ເຮືອນຄຽງ ທີ່ເປັນມູນເຊື້ອອັນດີງາມມາແຕ່ບູຮານນະການ ໃຫ້ແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ.
ທ່ານ ເອກອັກຄະຣາຊະທູດໄທ ຍັງໄດ້ໃຫ້ຄໍາໝັ້ນສັນຍາວ່າຈະສືບຕໍ່ອອກແຮງຊຸກຍູ້ໃຫ້ການພົວພັນຮ່ວມມື ລະຫວ່າງ ສອງປະເທດ ໃຫ້ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ, ຮັກສາໄດ້ມິດຕະພາບອັນໃກ້ຊິດ ເພື່ອນຳເອົາຜົນປະໂຫຍດ ຕົວຈິງມາສູ່ປະຊາຊົນສອງຊາດ ລາວ-ໄທ. ພ້ອມນີ້ທ່ານທູດຍັງໄດ້ສະແດງຄວາມຍິນດີຢ່າງຈິງ ໃຈຕໍ່ທ່ານລັດຖະມົນຕີ ທີ່ໄດ້ຮັບການເລືອກຕັ້ງໃຫ້ເປັນກຳມະການສູນກາງພັກ ອີກສະໄໝໜຶ່ງສະໄໝ ໃນກອງປະ ຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ໃນເດືອນມັງກອນ 2021 ຜ່ານມາ.
ໃນໂອກາດນີ້, ທ່ານລັດຖະມົນຕີ ຍັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຜ່ານທ່ານທູດ ໄປຍັງລັດຖະບານ ແລະ ປະຊາຊົນໄທ ທີ່ໄດ້ໃຫ້ການຊ່ວຍເຫຼືອ ສປປ ລາວ ຕໍ່ເຫດການໄພພິບັດທາງທຳມະຊາດຕ່າງໆທີ່ເກີດຂຶ້ນ ຢູ່ ສປປ ລາວ ໃນໄລຍະຜ່ານມາ ລວມທັງການສະໜັບສະໜູນ ແລະ ໃຫ້ຄວາມຊ່ວຍເຫຼືອໃນການປ້ອງກັນ, ຄວບຄຸມ ແລະ ແກ້ໄຂຜົນກະທົບຈາກການລະບາດຂອງພະຍາດ ໂຄວິດ-19 ອີກດ້ວຍ. ໃນຕ້ອນທ້າຍ ທ່ານ ຍັງໄດ້ອວຍພອນໃຫ້ທ່ານທູດຈົງປະສົບຜົນສຳເລັດໃນການເຄື່ອນໄຫວ ວຽກງານທູດທີ່ມີກຽດສູງສົ່ງຂອງທ່ານທູດ ຢູ່ ສປປ ລາວນຳອີກ.
( ຂ່າວສານ ຮສສ)

ພິທີປະກາດ ການຈັດຕັ້ງ ແລະ ປະກາດຮັບນະໂຍບາຍອຸດໜູນບຳນານ.............................ໃນວັນທີ 23 ກຸມພາ 2021,ທີ່ກະຊວງແຮງງານ ແລະ...
25/02/2021

ພິທີປະກາດ ການຈັດຕັ້ງ ແລະ ປະກາດຮັບນະໂຍບາຍອຸດໜູນບຳນານ.
............................
ໃນວັນທີ 23 ກຸມພາ 2021,ທີ່ກະຊວງແຮງງານ ແລະ ສະຫວັດດີການສັງຄົມ. ໄດ້ມີພິທີປະກາດ ການຈັດຕັ້ງ ແລະ ປະກາດຮັບນະໂຍບາຍອຸດໜູນບຳນານ, ເປັນກຽດເຂົ້າຮວ່ມຂອງ ທ່ານ ປອ. ຄຳແພງ ໄຊສົມແພງ ກໍາມະການສູນກາງພັກ, ລັດຖະມົນຕີ ກະຊວງ ຮສສ, ທ່ານ ນາງ ໃບຄຳ ຂັດທິຍະ ກຳມະການສູນກາງພັກ, ຮອງລັດຖະມົນຕີ; ມີບັນດາທ່ານ ຫົວໜ້າກົມ, ຮອງຫົວໜ້າ ກົມ, ຫ້ອງການ, ອົງການ, ສະຖາບັນ, ສູນ ແລະ ບັນພະນັກງານ-ລັດຖະກອນ ຫຼັກແຫຼ່ງຂອງກະຊວງເຂົ້າຮວ່ມ.
ເພື່ອເປັນການປະຕິບັດຕາມ ກົດໝາຍ ວ່າດ້ວຍ ພະນັກງານ-ລັດຖະກອນ, ພະນັກງານ-ລັດຖະກອນ ຮອດອາຍຸພັກການ-ຮັບອຸດໜູນບຳນານ ໃນຄັ້ງນີ້ ມີ 02 ທ່ານ ຄື: ທ່ານ ຄໍາຂານ ພິນສະຫວັນ ອາດີດຄະນະປະຈໍາ, ຄະນະພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ, ອາດີດຫົວໜ້າຫ້ອງການກະຊວງ, ອາດີດຮອງຫົວໜ້າກົມ ແລະ ອີກຫຼາຍໜ້າທີ່ຕໍາແໜ່ງ ທີ່ສຳຄັນ ນັບແຕ່ໄລຍະເລີ້ມກໍ່ຕັ້ງ ກະຊວງ ແລະ ທ່ານ ຄໍາປິງ ແສງຕານນະລາດ ອາດີດຄະນະພັກກະຊວງ 03 ສະໄໝ, ອາດີດຫົວໜ້າກົມນະໂຍບາຍຜູ້ມີຜົນງານ, ຄົນພິການ ແລະ ຜູ້ອາຍຸສູງ, ອາດີດຫົວໜ້າກົມກວດກາ ແລະ ອີກຫຼາຍໜ້າທີ່ຕໍາແໜ່ງ ທີ່ສຳຄັນ ນັບວ່າເປັນພະນັກງານ-ລັດຖະກອນຫຼັກແຫຼ່ງ ທີ່ກິ້ງເກືອກລີເລືອ ໃນວຽກງານຂອງກະຊວງ ໃນຫຼາຍສະໄໝທີ່ຜ່ານມາ. ທັງ 2 ທ່ານ ທີ່ພັການ-ຮັບ ອຸດໜູນບຳນານໃນຄັ້ງນີ້ ແມ່ນລ້ວນແລ້ວແຕ່ ເປັນພະນັກງານນຳພາ-ຄຸ້ມຄອງ ຫຼັກແຫຼ່ງຂອງພັກ-ລັດ ແລະ ຂອງກະຊວງແຮງງານ ແລະ ສະຫວັດ ດີການສັງຄົມ ພວກເຮົາມາຢ່າງຍາວນານ ລວມປີການໄດ້ 46 ປີ.
ພ້ອມດຽວກັນນັ້ນ ອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານ ໃຫ້ສືບຕໍ່ພາລະກິດຈັດຕັ້ງປະຕິບັດວຽກງານ ຂະແໜງແຮງງານ ແລະ ສະຫວັດດີການສັງຄົມ ຈື່ງໄດ້ປະກາດແຕ່ງຕັ້ງໃໝ່ເປັນຫົວໜ້າກົມ ຄື: ທ່ານ ຄຳໄຊ ເຊ່ຍຍິ້ງຢ່າງ ຂື້ນເປັນຫົວໜ້າກົມຈັດຕັ້ງ ແລະ ພະນັກງານ, ແລະ ທ່ານ ສີສະຫວາດ ກົມພົນ ຂື້ນເປັນຫົວໜ້າກົມນະໂຍບາຍຜູ້ມີຜົນງານ, ຄົນພິການ ແລະ ຜູ້ອາຍຸສູງ.
ໂອກາດອັນມີຄວາມໝາຍ, ຄວາມສຳຄັນນີ້ ທ່ານ ປອ. ຄຳແພງ ໄຊສົມແພງ ກໍາມະການສູນກາງພັກ, ລັດຖະມົນຕີ ກະຊວງ ຮສສ ຍັງໃຫ້ກຽດໂອລົມ ພະນັກງານພັກຜ່ອນບຳນານ ແລະ ຜູ້ຖືກແຕ່ງຕັ້ງເປັນຫົວໜ້າກົມຄົນ ໃໝ່ວ່າ: ຕາງໜ້າໃຫ້ສູນກາງພັກ-ລັດຖະບານ, ຄະນະພັກ, ຄະນະນຳກະຊວງ ຂໍສະແດງຄວາມຮູ້ບຸນຄຸນ ມາຍັງ 02 ທ່ານ ທີ່ພັກການ-ຮັບອຸດໜູນບຳນາ ແລະ ຂໍຂອບໃຈຢ່າງຈິງໃຈ ທີ່ທ່ານໄດ້ອຸທິດສະຕິປັນຍາ, ຄວາມຮູ້, ຄວາມສາມາດເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ສຳລັບ 02 ທ່ານ ທີ່ໄດ້ຮັບການແຕ່ງຕັ້ງໃໝ່ເປັນຫົວໜ້າກົມ ຄື: ກົມຈັດຕັ້ງ ແລະ ພະນັກງານ, ກົມນະໂຍບາຍຜູ້ມີຜົນງານ, ຄົນພິການ ແລະ ຜູ້ອາຍຸສູງ ກໍໃຫ້ເອົາໃຈໃສ່ຢ່າງຕັ້ງໜ້າເຂົ້າໃນການນໍາພາ, ຊີ້ນຳວຽກງານ, ການເຮັດວຽກຕົວຈິງ ຕາມພາລະບົດບາດຂອງຕົນ ດ້ວຍຄວາມຮັບຜິດຊອບສູງ, ສຳຄັນເອົາໃຈໃສ່ ສຶກສາອົບຮົມການເມືອງແນວຄິດຂອງພະນັກງານ-ລັດຖະກອນ ໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຄວາມສາມັກຄີ, ມີຄວາມຮັບຜິດຊອບ ແລະ ເຮັດສຳເລັດທຸກໜ້າທີ່ວຽກງານທີ່ຮັບມອບໝາຍ; ເອົາໃຈໃສ່ປັບປຸງກົງຈັກການຈັດຕັ້ງ ຕາມທິດກະທັດຮັດ ເຄື່ອນໄຫວຢ່າງມີຄຸນນະພາບ, ຄົ້ນຄວ້າໜ້າທີ, ພາລະບົດບາດ ໃຫ້ຈະແຈ້ງ, ຊັດເຈນ, ເອົາໃຈໃສ່ ຢຶດໝັ້ນແບບແຜນນໍາພາ ແລະ ວິທີເຮັດວຽກຕາມ ຫຼັກການລວມສູນປະຊາທິປະໄຕຢ່າງເຂັ້ມງວດ, ມີການແບ່ງວຽກແບ່ງຄວາມຮັບຜິດຊອບໃຫ້ຄະນະ ຢ່າງເໝາະສົມ ແລະ ພ້ອມກັນຈັດຕັ້ງປະຕິບັດວຽກງານຮອບດ້ານໃຫ້ປະກົດຜົນເປັນຈິງ; ເອົາໃຈໃສ່ບໍາລຸງ-ກໍ່ສ້າງພະນັກງານໃຫ້ມີຄວາມຮູ້ຄວາມສາມາດໃຫ້ສູງຂື້ນເລື້ອຍໆ ສົມຄູ່ກັບໜ້າທີ່ການເມືອງໄລຍະໃໝ່ ຂອງວຽກງານ ຮສສ
( ຂ່າວສານ ຮສສ)

ສ້າງຄວາມເຂັ້ມແຂງເພື່ອລຶບລ້າງການນຳໃຊ້ແຮງງານເດັກ-------   ກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດກ...
25/02/2021

ສ້າງຄວາມເຂັ້ມແຂງເພື່ອລຶບລ້າງການນຳໃຊ້ແຮງງານເດັກ
-------
ກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດກອງປະຊຸມສ້າງຄວາມ ເຂັ້ມແຂງໃຫ້ແກ່ການຈັດຕັ້ງປະຕິບັດແຜນງານແຫ່ງຊາດ ເພື່ອປ້ອງກັນ ແລະ ລຶບລ້າງການນຳໃຊ້ແຮງງານເດັກ ແລະ ສົ່ງເສີມວຽກທີ່ມີຄຸນຄ່າສຳລັບໄວໜຸ່ມ ໃນ ສປປ ລາວ ໄລຍະ 2021-2025 ໄດ້ຈັດຂຶ້ນໃນວັນທີ 24 ກຸມພານີ້ ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງ ຮສສ ຊຶ່ງມີ ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງ ຮສສ, ທ່ານ ນາງ ບາລາລີ ພຣຸກ ຊ່ຽວຊານອາວຸໂສ ເພື່ຶອສົ່ງເສີມຫຼັກການພື້ນຖານ ແລະ ສິດທິໃນການອອກແຮງງານ ຂອງອົງການ ແຮງງານສາກົນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອພ້ອມກັນຄົ້ນຄວ້າປຶກສາຫາລືກ່ຽວກັບ ຄູ່ມືເພື່ອນຳໃຊ້ໃນການຈັດ ຕັ້ງປະຕິບັດ ຢູ່ ສປປ ລາວ ເປັນຕົ້ນແມ່ນແຜນບຸລິມະສິດ ຂອງປີ 2021 ຂອງຂະແໜງແຮງງານ ແລະ ສະຫວັດດີການສັງຄົມ ກ່ຽວກັບການລຶບລ້າງການນຳໃຊ້ແຮງງານເດັກ; ແຜນບຸລິມະສິດ ຂອງປີ 2021 ຂອງຂະແໜງກະສິກຳ ແລະ ປ່າໄມ້ ກ່ຽວກັບການລຶບລ້າງນຳໃຊ້ແຮງງານເດັກ; ແຜນບຸລິມະສິດ ຂອງປີ 2021 ຂອງຂະແໜງການທ່ອງທ່ຽວກ່ຽວກັບການລຶບລ້າງນຳໃຊ້ແຮງງານເດັກ; ແຜນບຸລິມະສິດ ຂອງປີ 2021 ຂອງສູນ ກາງກຳມະບານລາວກ່ຽວກັບການລຶບລ້າງນຳໃຊ້ແຮງງານເດັກ ແລະ ແຜນບຸລິມະສິດ ຂອງປີ 2021 ຂອງສະພາ ການຄ້າ ແລະ ອຸດສະຫະກຳແຫ່ງຊາດລາວ ກ່ຽວກັບການລຶບລ້າງນຳໃຊ້ແຮງງານເດັກ.

#ພິທີເປີດໂຕໂຄງການເງິນໜູນໄລຍະສັ້ນເພື່ອຊ່ວຍຜູ້ປະກັນຕົນໃນຂົງເຂດໂຮງງານຕັດຫຍິບປະມານ 17,000 ກວ່າຄົນທີ່ໄດ້ຮັບຜົນກະທົບຈາການລະບາດ...
23/02/2021

#ພິທີເປີດໂຕໂຄງການເງິນໜູນໄລຍະສັ້ນເພື່ອຊ່ວຍຜູ້ປະກັນຕົນໃນຂົງເຂດໂຮງງານຕັດຫຍິບປະມານ 17,000 ກວ່າຄົນທີ່ໄດ້ຮັບຜົນກະທົບຈາການລະບາດຂອງເຊື້ອພະຍາດໂຄວິດ-19 ໃນ ສປປລາວ
.......................................................
ຜູ້ປະກັນຕົນຂອງອົງການປະກັນສັງຄົມແຫ່ງຊາດໃນຂົງເຂດໂຮງງານ ຕັດຫຍິບປະມານ 17,000 ກວ່າຄົນໃນ ສປປລາວ ທີ່ໄດ້ຮັບຜົນກະທົບຈາກການລະບາດຂອງເຊື້ອພະຍາດໂຄວິດ-19 ຈະໄດ້ຮັບອຸດໜູນລາຍຮັບໄລຍະສັ້ນ ຜູ້ລະ 900,000 ກີບ.
ໃນວັນທີ 23 ກຸມພາ 2021, ອົງການປະກັນສັງຄົມແຫ່ງຊາດໄດ້ປະກາດໃຫ້ເງິນອຸດໜູນໄລຍະສັ້ນໃນຈຳນວນເງິນມູນຄ່າ 1.8 ລ້ານໂດລາສະຫະລັດ ເພື່ອຊ່ວຍເຫຼືອແຮງງານໃນຂົງເຂດຕັດຫຍິບທີ່ສູນເສຍລາຍຮັບ ແລະ ເພື່ອເປັນການສະໜັບໃຫ້ໂຮງງານໃນການຫຼຸດຜ່ອນຄ່າໃຊ້ຈ່າຍໃນການຊ່ວຍເຫລືອຜູ້ອອກແຮງງານ ແລະ ສາມາດສືບຕໍ່ດຳເນີນທຸລະກິດ, ໂດຍໄດ້ ຮັບທຶນຊ່ວຍເຫລືອຈາກກະຊວງ ການຮ່ວມມືດ້ານເສດຖະກິດ ແລະ ການພັດທະນາຂອງສະຫະພັນເຢຍລະມັນ (BMZ) ຜ່ານການສະໜັບສະໜູນດ້ານວິຊາການຈາກອົງການແຮງງານສາກົນ(ILO) ໂດຍຜູ້ທີ່ໄດ້ຮັບເງິນອຸດໜູນໄລຍະສັ້ນຄັ້ງນີ້ ສ່ວນຫຼາຍປະມານ 85 ເປີເຊັນ ແມ່ນເປັນແຮງງານເພດຍິງ ເຊິ່ງການໃຫ້ເງິນອຸດໜູນຄັ້ງນີ້ແມ່ນຈະເລີ່ມເບີກຈ່າຍໃນເດືອນມີນາ 2021 ເປັນຕົ້ນໄປ.
ທ່ານ ປະເດີມພອນສົນທະນີ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມໄດ້ກ່າວວ່າ: “ການໃຫ້ເງິນ ຊ່ວຍໜູນດ້ານລາຍໄດ້ສະເພາະໃຫ້ແກ່ຜູ້ປະກັນຕົນໃນຂົງເຂດໂຮງງານຕັດຫຍິບ, ນອກຈາກການຊ່ວຍທາງກົງແກ່ຜູ້ອອກ ແຮງງານໃນໂຮງງານຕັດຫຍິບແລ້ວ ໂຄງການນີ້ຍັງຊ່ວຍສ້າງຄວາມເຂັ້ມແຂງໃນການຄຸ້ມຄອງບໍລິຫານ ແລະ ກົນໄກການ ຈ່າຍເງິນອຸດໜູນຂອງລະບົບປະກັນສັງຄົມ, ເປັນການສົ່ງເສີມສາຍພົວພັນ ແລະ ການມີສ່ວນຮ່ວມໃນການຈັດຕັ້ງປະຕິ ບັດໂຄງການຂອງອົງການຈັດຕັ້ງສາມຝ່າຍ ກໍຄືບັນດາໂຮງງານຕັດຫຍິບທີ່ເປັນສະມາຊິກຂອງອົງການປະກັນສັງຄົມ”. ປັດຈຸບັນໃນຂົງເຂດອຸດສະຫະກຳຕັດຫຍິບມີການຈ້າງງານແຮງງານຫລາຍກວ່າ 26,000 ຄົນ ແລະ ເປັນຂະແໜງການໜຶ່ງທີ່ໄດ້ຮັບຜົນກະທົບ ຈາການລະບາດຂອງເຊື້ອພະຍາດໂຄວິດ-19 ໃນ ສປປ ລາວ ແລະ ຈຳເປັນຕ້ອງໄດ້ຫຼຸດຈຳນວນພະນັກງານລົງ ແລະ ບາງໂຮງງານກໍ່ຕ້ອງໄດ້ປິດກິດຈະການ.
ທ່ານ ເຈັນ ລຸດເກນເຮມ (Jens Lütkenherm) ເອກອັກຄະລັດຊະທູດ ຂອງສະຫະພັນເຢຍລະມັນ ປະຈຳ ສປປ ລາວ ໄດ້ກ່າວວ່າ “ພວກຂ້າພະເຈົ້າດີໃຈທີ່ເງິນຊ່ວຍເຫຼືອຄັ້ງນີ້ໄດ້ຈັດຕັ້ງປະຕິບັດຜ່ານອົງການປະກັນສັງຄົມແຫ່ງຊາດ ເຊິ່ງເປັນລະບົບປົກປ້ອງສັງຄົມທີ່ມີຄວາມເຂັ້ມແຂງ ແລະ ສາມາດຮັບມືກັບວິກິດການ. ການຮັບມືກັບວິກິດການ ແລະ ໃຫ້ຄວາມຊ່ວຍເຫຼືອກັບຜູ້ໄດ້ຮັບຜົນກະທົບຈາກເຫດການສຸກເສີນຮ້າຍແຮງງານທີ່ເກີດຂຶ້ນເປັນສິ່ງທີ່ສຳຄັນຍິ່ງ”
ການສະໜັບສະໜູນດ້ານວິຊາກການຈາກອົງການແຮງງານສາກົນຈະຊ່ວຍພັດທະນາລະບົບປົກປ້ອງສັງຄົມໃຫ້ສອດຄ່ອງກັບຫຼັກການປົກປ້ອງສັງຄົມສາກົນ ເຊິ່ງປະກອບດ້ວຍຄວາມເປັນເຈົ້າການ, ການຕິດຕາມຄຸ້ມຄອງຮ່ວມກັນຂອງອົງການຈັດຕັ້ງສາມຝ່າຍ ຈາກລັດຖະບານ, ຕາງໜ້າຜູ້ໃຊ້ແຮງງານ ແລະ ຕາງໜ້າຜູ້ອອກແຮງງານແລະການຮັບປະກັນລະບົບການບໍລິຫານໃຫ້ມີຄວາມໂປ່ງໃສ ແລະ ສາມາດກວດສອບໄດ້. ສະມາຄົມອຸດສະຫະກຳຕັດຫຍິບລາວ ແລະ ສູນກາງສະຫະພັນກຳມະບານລາວໄດ້ມີສ່ວນຮ່ວມສຳຄັນໃນການພັດທະນາ ແລະ ການສຳໜັບສະໜູນການຄຸ້ມຄອງບໍລິຫານລະບົບການໃຫ້ອຸດໜູນໃນຄັ້ງນີ້.
ທ່ານ ແກຣມ ບັກເລ (Graeme Buckley), ຜູ້ອຳນວຍການຫ້ອງການອົງການແຮງງານສາກົນຮັບຜິດຊອບປະເທດໄທ, ກຳປູເຈຍ ແລະ ສປປລາວໄດ້ກ່າວວ່າ: “ອຸດສະຫະກຳຂົງເຂດຕັດຫຍິບໄດ້ຮັບຜົນກະທົບໜັກໜ່ວງຈາກຈາການລະບາດ ຂອງເຊື້ອພະຍາດໂຄວິດ-19. ການໃຫ້ເງິນອຸດໜູນຄັ້ງນີ້ຈະຊ່ວຍປະກອບສ່ວນໃຫ້ແຮງງານ ແລະ ທຸລະກິດໃນຂົງເຂດຕັດຫຍິບສາມາດຜ່ານວິກິດຄັ້ງນີ້ເພື່ອສາມາດກັບຄືນມາດຳເນີນງານພາຍຫຼັງທີ່ຜົນກະທົບຂອງການລະບາດໂຄວິດ-19 ຫຼຸດຜ່ອນລົງ”. ໂຄງການໃຫ້ເງິນອຸດໜູນລາຍໄດ້ໄລຍະສັ້ນນີ້ ຈະນຳໃຊ້ລະບົບການໃຫ້ອຸດໜູນທີ່ມີຢູ່ແລ້ວຂອງອົງການປະກັນສັງຄົມແຫ່ງຊາດ, ເພື່ອຊ່ວຍຫຼຸດຜ່ອນຄ່າໃຊ້ຈ່າຍໃນການບໍລິຫານ ແລະ ເພື່ອເລັ່ງລັດການໃຫ້ອຸດໜູນພ້ອມທັງຊ່ວຍຫຼຸດຜ່ອນລະບົບການໃຫ້ອຸດໜູນວ່າງງານ. ວິທີການຈັດຕັ້ງປະຕິບັດຄັ້ງນີ້ ອົງການປະກັນສັງຄົມແຫ່ງຊາດ ຈະໄດ້ມີການທົດລອງນຳໃຊ້ລະບົບການຈ່າຍອຸດໜູນແບບອີເລັກໂທຣນິກໂດຍຜ່ານລະບົບເຄືອຂ່າຍການໂອນຜ່ານໂທລະສັບ, ເພື່ອເພີ່ມທະວີການມີສ່ວນຮ່ວມດ້ານການເງິນໃຫ້ກັບແຮງງານໃນຂົງເຂດຕັດຫຍິບໂດຍສະເພາະສຳລັບຜູ້ທີ່ບໍ່ມີບັນຊີທະນາຄານ.
ການແຜ່ລະບາດຂອງເຊື້ອພະຍາດໂຄວິດ-19 ສົ່ງຜົນໃຫ້ລະບົບການຈ່າຍອຸດໜູນຫວ່າງງານເພີ່ມຂຶ້ນໃນ ສປປ ລາວ, ໃນອຸດສາຫະກຳຂົງເຂດຕັດຫຍິບຂະແໜງການດຽວການຈ່າຍອຸດໜູນຫວ່າງງານໄດ້ເພີ່ມຂຶ້ນສາມເທົ່າຈາກ 406.58 ລ້ານກີບ ໃນປີ 2019 ເປັນ 1.33 ຕື້ກີບໃນໄລຍະການລະບາດຂອງເຊື້ອພະຍາດໂຄວິດ - 19 ໃນປີ 2020 ນີ້.

ລັດຖະມົນຕີ ຮສສ ຕ້ອນຮັບເອກອັກຄະລັດຖະທູດ ແຫ່ງ ສະຫະພາບເອີຣົບ ຄົນໃໝ່..................................ໃນວັນທີ 23 ກຸມພາ 2021ນ...
23/02/2021

ລັດຖະມົນຕີ ຮສສ ຕ້ອນຮັບເອກອັກຄະລັດຖະທູດ ແຫ່ງ ສະຫະພາບເອີຣົບ ຄົນໃໝ່.
.................................

ໃນວັນທີ 23 ກຸມພາ 2021ນີ້, ທີ່ນະຄອນຫລວງວຽງຈັນ, ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມຄະນະ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ອີນາ ມາຊິວລີໂອນິແຕ (Ina Marciulionyte) ເອກອັກຄະລັດຖະທູດ ແຫ່ງສະຫະພາບເອີຣົບ ປະຈຳ ສປປ ລາວ ໃນໂອກາດມາດຳລົງຕຳແໜ່ງ ເປັນເອກອັກຄະລັດຖະທູດຄົນ ໃໝ່ ປະຈຳ ສປປ ລາວ ພ້ອມທັງປຶກສາຫາລືກ່ຽວກັບວຽກງານການຮ່ວມມືສອງຝ່າຍ.
ໂອກາດດຽວກັນນີ້, ທ່ານ ປອ ຄຳແພງ ໄຊສົມແພງ ຍັງໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ນາງ ອີນາ ມາຊິວລີໂອນິແຕ ທີ່ໄດ້ຮັບການແຕ່ງຕັ້ງ ໃຫ້ມາດໍາລົງຕໍາແໜ່ງ ເປັນເອກອັກຄະລັດຖະທູດ ແຫ່ງ ສະຫະພາບເອີຣົບ ປະຈຳ ສປປ ລາວ ແລະ ໄດ້ຕີລາຄາສູງຕໍ່ສາຍພົວພັນ ມິດຕະພາບອັນຍາວນານ ແລະ ຫວັງວ່າທ່ານເອກອັກຄະລັດຖະທູດຄົນໃໝ່ ຈະສືບຕໍ່ຊຸກຍູ້ ແລະ ປະກອບສ່ວນເຂົ້າ ໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືທີ່ມີປະສິດທິພາບ ລະຫວ່າງ ສປປ ລາວ ແລະ ເອີຣົບ ພ້ອມທັງປະກອບສ່ວນເຂົ້າໃນ ການພັດທະນາ ເສດຖະກິດ-ສັງຄົມຂອງ ສປປ ລາວ ໃຫ້ແຕກດອກອອກຜົນຍິ່ງຂຶ້ນ.
ໃນໄລຍະຜ່ານມາ ສປປ ລາວ ໄດ້ຮັບການຊ່ວຍເຫລືອ ແລະ ສະໜັບສະໜູນດ້ານງົບປະມານ ຈາກສະຫະພາບເອີຣົບ ໂດຍຜ່ານອົງການຈັດຕັ້ງສາກົນຕ່າງໆ ລວມມູນຄ່າຫລາຍກວ່າ 21.3 ລ້ານໂດລາສະຫະລັດ, ເຊິ່ງໄດ້ປະກອບສ່ວນສຳຄັນ ເຂົ້າໃນຂະແໜງແຮງງານ ແລະ ສະຫວັດດີການສັງຄົມ ໂດຍສະເພາະແມ່ນວຽກງານ ແກ້ໄຂບັນຫາ ລະເບີດບໍ່ທັນແຕກ, ການຄຸ້ມຄອງ ແລະ ຫລຸດຜ່ອນຄວາມສ່ຽງໄພພິບັດຕ່າງໆ.
ທ່ານ ນາງ ອີນາ ມາຊິວລີໂອນິແຕ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ທີ່ໃຫ້ກຽດຕ້ອນຮັບ ອັນອົບອຸ່ນໃນຄັ້ງນີ້ ແລະ ມີຄວາມມຸ່ງຫວັງທີ່ຈະສືບຕໍ່ ເຮັດໃຫ້ສາຍພົວພັນ ແລະ ການຮ່ວມມືສອງຝ່າຍ ໃຫ້ນັບມື້ນັບແໜ້ນແຟ້ນຍິ່ງຂຶ້ນ ແລະ ໄດ້ໃຫ້ຄໍາໝັ້ນສັນຍາວ່າ ຈະສືບຕໍ່ອອກແຮງຊຸກຍູ້ ໃຫ້ການພົວພັນຮ່ວມມື ລະຫວ່າງ ສອງປະເທດ ໃຫ້ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ.
(ຂ່າວສານຮສສ )

ຕອນເຊົ້າຂອງວັນທີ 21 ກຸມພາ 2021 ຜ່ານມານີ້, ຢູ່ໜ່ວຍເລືອກຕັ້ງທີ່ 28-29  ບ້ານນາໄຊ, ເມືອງໄຊເສດຖາ, ນະຄອນຫຼວງວຽງຈັນ.   ທ່ານ ປອ ...
23/02/2021

ຕອນເຊົ້າຂອງວັນທີ 21 ກຸມພາ 2021 ຜ່ານມານີ້, ຢູ່ໜ່ວຍເລືອກຕັ້ງທີ່ 28-29 ບ້ານນາໄຊ, ເມືອງໄຊເສດຖາ, ນະຄອນຫຼວງວຽງຈັນ. ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງ ແຮງງານ ແລະ ສະຫວັັດດີການສັງຄົມ ພ້ອມຄອບຄົວ ໄດ້ໃຊ້ສິດປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II , ເພື່ອເລືອກເອົາຜູ້ແທນທີ່ດີມີມາດ ຖານເງື່ອນໄຂຄົບຖ້ວນ ແລະ ມີຄວາມຮູ້ຄວາມສາມາດຢ່າງແທ້ຈິງ ເພື່ອເປັນຕົວແທນຂອງປວງຊົນລາວທັງຊາດ ໃນການອອກຄຳຄິດ-ຄໍາເຫັນຢູ່ໃນສະພາ ເພື່ອພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ.

ກະຊວງ ຮສສ ມອບໃບຍ້ອງຍໍໃຫ້ກົມກອງ ແລະ ບຸກຄົນດີເດັ່ນ...................    ກະຊວງແຮງງານ ແລະ ສະຫວັດດີການ-ສັງຄົມ ( ຮສສ )ໄດ້ຈັດກ...
23/02/2021

ກະຊວງ ຮສສ ມອບໃບຍ້ອງຍໍໃຫ້ກົມກອງ ແລະ ບຸກຄົນດີເດັ່ນ
...................

ກະຊວງແຮງງານ ແລະ ສະຫວັດດີການ-ສັງຄົມ ( ຮສສ )ໄດ້ຈັດກອງປະຊຸມສະຫຼຸບວຽກງານຍ້ອງຍໍ ແລະ ມອບໃບຍ້ອງຍໍໃຫ້ກົມກອງ, ຄອບຄົວ ແລະ ບຸກຄົນທີ່ມີຜົນງານດີເດັ່ນປະຈຳປີ 2020 ຂຶ້ນໃນວັນທີ 22 ກຸມພານີ້ ທີ່ເຮືອນຮັບແຂກກະຊວງ ຮສສ, ພາຍໃຕ້ການເປັນປະທານ ແລະ ມອບໃບຍ້ອງຍໍຂອງທ່ານ ປອງ ຄຳແພງ ໄຊສົມແພງ ລັດຖະມົນຕີກະຊວງ ຮສສ ຊຶ່ງມີບັນດາຮອງລັດຖະມົນຕີ, ພະນັກງານຂັ້ນນໍາພາ ແລະ ວິຊາການອອ້ມຂ້າງກະຊວງເຂົ້າຮ່ວມ.
ທ່ານ ຄຳຂານ ພິນສະຫວັນ ຫົວໜ້າກົມຈັດຕັ້ງ ແລະ ພະນັກງານໄດ້ຂຶ້ນຜ່ານບົດສະຫຼຸບຜົນງານປະຈຳປີ 2020 ແລະ ແຜນການປີ 2021 ວ່າ: ເພື່ອເປັນການຍ້ອງຍໍສັນລະເສີນຄຸນງາມຄວາມດີ ແລະ ຈົດຈຳບຸນຄຸນຂອງບຸກຄົນ, ຄອບຄົວ ແລະ ການຈັດຕັ້ງທີ່ມີຜົນງານປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ, ການເຄື່ອນໄຫວປະຕິບັດໜ້າທີ່ວຽກງານຂອງພະນັກງານ-ລັດຖະກອນໃນໜຶ່ງປີຜ່ານມາ, ຄະນະພັກ, ຄະນະນຳ, ຄະນະຮັບຜິດຊອບວຽກງານແຂ່ງຂັນ-ຍ້ອງຍໍຕະຫຼອດຮອດພະນັກງານ-ລັດຖະກອນກະຊວງ ຮສສ ໄດ້ເອົາໃຈໃສ່ນໍາພາ, ຊີ້ນຳ ແລະ ຈັດຕັ້ງປະຕິບັດວຽກງານແຂ່ງຂັນ-ຍ້ອງຍໍຢ່າງຕໍ່ເນື່ອງ, ມີຈຸດສຸມ ແລະ ມີຜົນສຳເລັດ ເວົ້າສະເພາະໃນປີ 2020 ນີ້, ຄະນະພັກ, ຄະນະນຳກະຊວງ ຮສສ ໄດ້ຕົກລົງຍ້ອງຍໍກົມກອງ, ຄອບຄົວ ແລະ ບຸກຄົນດີເດັ່ນດັ່ງນີ້: ກົມກອງດີເດັ່ນປະເພດ I ຈຳນວນ 16 ກົມກອງ, ຄອບຄົວດີເດັ່ນປະເພດ I ຈໍ​ານວນ 47 ຄອບຄົວ, ປະເພດ II ຈຳນວນ 57 ຄອບຄົວ, ບຸກຄົນດີເດັ່ນປະເພດ I ຈໍ​ານວນ 512 ຄົນ, ປະເພດ II ຈໍ​ານວນ 122 ທ່ານ, ສັງລວມແລ້ວ, ວຽກງານແຂ່ງຂັນ-ຍ້ອງຍໍປີ 2020 ຖ້າທຽບກັບປີ 2019 ມີກົມກອງດີເດັ່ນປະເພດ I ເພີ່ມຂຶ້ນ 8 ກົມກອງ, ຄອບຄົວດີເດັ່ນປະເພດ I ເພີ່ມຂຶ້ນ 19 ຄອບຄົວ ແລະ ບຸກຄົນດີເດັ່ນປະເພດ I ເພີ່ມຂຶ້ນ 153 ຄົນ.
ສຳລັບທິດທາງໃນຕໍ່ໜ້າເພື່ອຮັບປະກັນເຮັດໃຫ້ວຽກງານແຂ່ງຂັນ-ຍ້ອງຍໍໄດ້ສືບຕໍ່ຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນຕໍ່ເນື່ອງສິ່ງສຳຄັນຕ້ອງໄດ້ເພີ່ມທະວີວຽກງານສຶກສາອົບຮົມການເມືອງ-ນໍາພາແນວຄິດຂອງສະມາຊິກພັກ ແລະ ພະນັກງານໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດ, ສິນທຳປະຕິວັດແນໃສ່ສ້າງໃຫ້ພະນັກງານ-ລັດຖະກອນມີຄວາມປອດໃສ, ເຂັ້ມແຂງ, ໜັກແໜ້ນກາຍເປັນກົມກອງ, ຄອບຄົວ, ບຸກຄົນດີເດັ່ນໃນປີ 2021.

(ຂ່າວສານຮສສ )

ໃນພິທີເຊັນສັນຍາໂຄງການ ລະຫວ່າງ ສະຖານເອກອັກຄະລັດຖະທູດຍີ່ປຸ່ນ ແລະ ອົງການອາ ຫານໂລກ, ວັນທີ 19 ກຸມພາຜ່ານມານີ້, ໂດຍອີງຕາມຂໍ້ຕົກ...
22/02/2021

ໃນພິທີເຊັນສັນຍາໂຄງການ ລະຫວ່າງ ສະຖານເອກອັກຄະລັດຖະທູດຍີ່ປຸ່ນ ແລະ ອົງການອາ ຫານໂລກ, ວັນທີ 19 ກຸມພາຜ່ານມານີ້, ໂດຍອີງຕາມຂໍ້ຕົກລົງທີ່ເຊັນກັນໃຫ້ຮູ້ວ່າ ສະຖານເອກອັກຄະລັດຖະທູດຍີ່ປຸ່ນ ປະຈຳລາວ ແລະ ອົງການອາຫານໂລກ ເຫັນດີທີ່ຈະເຮັດວຽກຮ່ວມກັນ ໃນການຊ່ວຍ ເຫຼືອຊຸມຊົນຜູ້ທີ່ໄດ້ຮັບຜົນກະທົບຈາກການປ່ຽນແປງຂອງສະພາບດິນຟ້າອາກາດ, ເຊິ່ງໃນນັ້ນ ປະເທດຍີ່ປຸ່ນ ແມ່ນໄດ້ປະກອບສ່ວນຊ່ວຍເຫຼືອເປັນຈຳນວນ 180 ລ້ານເຢັນ ຫຼື ປະມານ 1,7 ລ້ານໂດລາສະ ຫະລັດ ໃນໄລຍະ 2 ປີທີ່ຜ່ານມາ ເພື່ອບັນເທົາຜົນກະທົບຈາກເຫດການຝົນຕົກໜັກ ແລະ ນ້ຳຖ້ວມ ໃນເດືອນຕຸລາປີ 2020, ທີ່ແຂວງສະຫວັນນະເຂດ ແລະ ແຂວງອື່ນໆໃນພາກໃຕ້ຂອງລາວ, ເຊິ່ງການປະ ກອບສ່ວນຂອງປະຊາຊົນຍີ່ປຸ່ນ, ແມ່ນອົງການອາຫານໂລກ ຈະໄດ້ຊື້ເຂົ້າສານ 1.115 ໂຕນ ເພື່ອແຈກຢາຍໃຫ້ປະຊາຊົນຈຳນວນ 35 ພັນຄົນ ໃນ 65 ຊຸມຊົນທີ່ຢູ່ພາກກາງ ແລະ ພາກໃຕ້ຂອງລາວ.
ທ່ານ ທາເກວະກະ ເຄໂຊ ເອກອັກຄະລັດຖະທູດ ປະຈຳລາວ ກ່າວວ່າ: ພວກເຮົາກໍາລັງປະເຊີນໜ້າກັບສິ່ງທ້າທາຍຫຼາຍຂຶ້ນຍ້ອນໄພພິບັດທຳມະຊາດ ແລະ ການປ່ຽນແປງຂອງສະພາບດິນຟ້າອາກາດ, ໂດຍຜ່ານໂຄງການນີ້, ລັດຖະບານ ແຫ່ງປະເທດຍີ່ປຸ່ນ ໄດ້ຍື່ນມືເຂົ້າຊ່ວຍຊຸມຊົນ ແລະ ປະຊາຊົນ ຢູ່ໃນເຂດທີ່ໄດ້ຮັບຜົນກະທົບດ້ວຍການຮ່ວມມື ກັບ ອົງການອາຫານໂລກ
ທ່ານ ຢານ ເດວບາເຣີ ຜູ້ອຳນວຍການຫ້ອງການອົງການ ອາຫານໂລກປະຈຳລາວ ກ່າວວ່າ: ອີງ ໃສ່ການປະກອບສ່ວນຈາກປະຊາຊົນຍີ່ປຸ່ນ ເຮັດໃຫ້ພວກເຮົາໄດ້ສະໜັບສະໜູນລັດຖະບານລາວ ໃນການ ວາງຮາກຖານ ສຳລັບການພັດທະນາສັງຄົມ ແລະ ເສດຖະກິດໃນສປປລາວ ໃຫ້ຫຼຸດພົ້ນຈາກຄວາມອຶດ.
ພິທີເຊັນສັນຍາຮ່ວມມືໃນໂຄງການ ລະຫວ່າງ ສະຖານເອກອັກຄະລັດຖະທູດຍີ່ປຸ່ນ ແລະ ອົງ ການອາຫານໂລກ ຄັ້ງນີ້ຕາງໜ້າປະເທດຍີ່ປຸ່ນແມ່ນທ່ານ ທາເກວະກະ ເຄໂຊ ເອກອັກຄະລັດຖະທູດ ປະຈຳລາວ ແລະ ຕາງໜ້າຫ້ອງການອາຫານໂລກແມ່ນທ່ານ ຢານ ເດວບາເຣີ ຜູ້ອຳນວຍການຫ້ອງການອົງການ ອາຫານໂລກປະຈຳ, ໂດຍການເຂົ້າຮ່ວມເປັນສັກຂີພິຍານຂອງທ່ານ ວິໄລພົງ ສີສົມຫວັງ ຫົວໜ້າກົມສັງຄົມສົງເຄາະ, ກະຊວງແຮງງານ ແລະ ສະຫວັດດີການສັງຄົມ.

(ຂ່າວຮສສ)

ที่อยู่

Chanthaburi
347

ข้อมูลทั่วไป

ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ຂຽນ​ຫຍໍ້ “ ຮສສ “ ແມ່ນ​ໂຄງ​ປະກອບ​ກົງຈັກ ຂອງ​ລັດຖະບານ ຊຶ່ງ​ຖືກ​ຮັບຮອງ​ເອົາ​ໂດຍ​ສະພາ​ແຫ່ງ​ຊາດ ຕາມ​ການ ສະ​ເຫ​ນີ ຂອງນາຍົກລັດ ຖະມົນຕີ, ມີພາລະ​ບົດບາດ ​ເປັນ​ເສນາ​ທິການ​ ໃຫ້​ແກ່​ລັດຖະບານ ໃນ​ການຄຸ້ມ​ຄອງ​ລັດ ກ່ຽວ​ກັບ​ຂະ​ແໜງ​ແຮງ​ງານ ແລະ​ ສະຫວັດດີ​ການ​ ສັງຄົມ ​ໃນ​ຂອບ​ເຂດ​ທົ່ວ​ປະ​ເທດ. ມີໜ້າ​ທີ່ໃນການຈັດຕັ້ງປະຕິບັດ ​ແລະ ຫັນ​ແນວທາງ​ແຜນ​ນະ​ໂຍບາຍ​ຂອງ​ພັກ, ທິດ​ທາງ​ແຜນການ​ຂອງລັດຖະບານ ໃຫ້​ກາຍ​ເປັນ​ ແຜນ​ງານ, ​ແຜນການ, ​ໂຄງການ, ​ເປັນ​ລະບຽບ​ ກົດຫມາຍ ​ເພື່ອຄຸ້ມຄອງ​ ການຈັດຕັ້ງ ​ ແລະ ​ເຄື່ອນ​ໄຫວກ່ຽວກັບ​ວຽກ​ງານ​ແຮງ​ງານ ແລະ ວຽກງານສະຫວັດດີ​ການ ​ສັງຄົມ

เวลาทำการ

จันทร์ 08:00 - 16:00
อังคาร 08:00 - 16:00
พุธ 08:00 - 16:00
พฤหัสบดี 08:00 - 16:00
ศุกร์ 08:00 - 16:00

เบอร์โทรศัพท์

85621213003

เว็บไซต์

แจ้งเตือน

รับทราบข่าวสารและโปรโมชั่นของ ຂ່າວສານ ແຮງງານ ແລະ ສະຫວັດດີກผ่านทางอีเมล์ของคุณ เราจะเก็บข้อมูลของคุณเป็นความลับ คุณสามารถกดยกเลิกการติดตามได้ตลอดเวลา

ติดต่อ ธุรกิจของเรา

ส่งข้อความของคุณถึง ຂ່າວສານ ແຮງງານ ແລະ ສະຫວັດດີກ:

วิดีโอทั้งหมด

Our Story

ກະຊວງແຮງງານ ແລະ ສະຫວັດດີການສັງຄົມ, Ministry of Labour and Social Welfare of Lao PDR, ກະຊວງແຮງງານ ແລະ ສະຫວັດດີການສັງຄົມ , ສ້າງກຳລັງແຮງງານ, ເຂົ້າສູ່ຕະຫລາດແຮງງານ, ພັດທະນາສີມືແຮງງານ ແລະ ຈັດຫາງານ ຄຸ້ມຄອງແຮງງານ,ປົກປ້ອງສັງຄົມ,ແຮງງານເດັກ,ຜູ້ພິການ, ຜູ້ດ້ອຍໂອກາດ, ນະໂຍບາຍຕໍ່ຜູ້ທີ່ມີຄຸນງາມຄວາມດີຕໍ່ການປະຕິຫວັດຊາດ, ຊ່ວຍເຫຼືອສັງຄົມ, ບໍລິຈາກເລືອດ ອົງການດາແດງ, ເກັບກູ້ລະເບີດ, ກວດກູ້ລະເບີດບໍ່ທັນແຕກທີ່ຍັງຕົກຄ້າງ ຢູ່ ສປປ ລາວ.

ตำแหน่งใกล้เคียง บริการภาครัฐ


องค์กรของรัฐ อื่นๆใน Chanthaburi

แสดงผลทั้งหมด