18/05/2023
Keta haluha vota ba númeru 17 APMT iha Domingu agora.
Ami sei lori Timor-Leste sai nasaun ne’ebé ho ekonomia forte, sustentavel, inkluzivu, reziliente no lori ita nia nasaun ba moris prósperu.
Ami sei atinji mehi ida ne’e liuhusi PRIORITIZA (sei demonstra ho hasae alokasaun orsamentu jeral estadu no atrai investimentu privadu) mak hanesan:
1. Setor agrikultura no peska ne’ebé sensivel ba nutrisaun, reziliente ba alterasaun klimátika, no kontribui ba hamenus inseguransa ai-han iha rai laran no hamenus kihak.
2. Setor turismu ne’ebé reziliente ba alterasaun klimátika no fornese rendimentu sustentavel ba Timor-Leste no kontribui ba hamenus kihak.
3. Integra igualdade jèneru, inkluzaun sosial, inkluzaun ba ema ho defisiensia
no integra konsiderasaun ba alterasaun klimátika iha ami nia dezenvolvimentu iha setor hotu-hotu.
Ikus liu, APMT hakarak afirma katak hanesan forsa polítika alternativa ida no ami komprende katak votantes sira hili ami tanba sira hakarak dezafia situasaun polítika agora ne’ebé la serve sira nia interese (status quo) no abandona setor agrikultura, peska, turismu no abandona direitu no nesesidade feto, ema ho defisiensia, labarik sira, idozu sira no grupu marginalizadus sira (e.g. joven nsst) MAIBE serve fali grupu elite ki’ik sira no konsolida no konsentra poder ekonomia no polítika iha grupu sira ne’e nia liman.
APMT hakarak serve votantes sira nia interese. Hodi hatudu ami nia respeitu ba fiar ne’ebé votantes sira fo mai ami hanesan forsa polítika alternativa ida, ami sei la deklara katak ami sei fo apoiu ba grupu A ou grupu B antes eleisaun.
Deklara apoia fali grupu A ou B ne’e hanesan hatudu falta respeitu ba ita nia votantes sira no obriga fali sira atu apoia status quo ne’ebé orijinalmente sira hakarak atu dezafia.
Keta haluha, vota ba númeru 17 APMT.
