INAP

05/06/2026

03/06/2026

Iha loron 23 to’o 30 fulan Maiu tinan 2026, Diretór Jeral INAP hala’o atividade importante hodi asina akordu servisu ho instituisaun edukasaun no Instituisaun formasaun balu iha Indonesia. Akordu refere envolve Universitas Kristen Satya Wacana (UKSW) no mós fatin formasaun sira hanesan Technoporia Training Center, Next Era Synergy, Global Inovasi, PT Inovasi Manajemen Jakarta, Inovasi Manajemen Publik no Bali Business School.

Atividade asina akordu servisu ne’e realiza ho objetivu atu fortifika liu tan relasaun kooperasaun entre instituisaun sira iha área edukasaun formal no informal, liuliu iha dezenvolvimentu rekursu umanu, kapasidade lideransa, inovasaun administrasaun públika no formasaun profissional. Liuhosi kooperasaun ne’e, parte hotu bele troca esperiénsia, koñesimentu no métodu aprendizajen modernu ne’ebé bele kontribui ba dezenvolvimentu kompeténsia funsionáriu públiku Timor-Leste.

Durante atividade refere, delegasaun DG INAP mós hala’o diskusaun estratéjika no vizita estudu atu haree diretamente sistema aprendizajen, jestaun formasaun no implementasaun inovasaun edukativa iha instituisaun parceiru sira. Enkontru ne’e sai nu’udar oportunidade importante atu harii rede servisu ne’ebé sustentavel no produtivu ba tempu naruk.

Objetivu prinsipal hosi akordu servisu ne’e mak:
1. Hametin kooperasaun institusionál entre INAP no instituisaun edukasaun/parceiru sira;
2. Harii oportunidade ba programa formasaun no kapasitação ba rekursu umanu Timor-Leste;
3. Promove partilla koñesimentu, teknologia no inovasaun iha área edukasaun no administrasaun públika;
4. Suporta dezenvolvimentu treinamentu no programa sertifikasaun profissional iha futuru.

Enkuantu output ne’ebé espera hosi atividade ne’e iha futuru mak:
1. Aumenta kapasidade profesional no kompeténsia teknika ba funsionáriu públiku no formandu sira;
2. Kria programa formasaun konjunta entre instituisaun sira;
3. Harii oportunidade ba intercâmbio akademiku no treinamentu internasionál;
4. Hametin qualidade servisu públiku liuhosi implementasaun inovasaun no boa governasaun;
5. Loke dalan ba kooperasaun ne’ebé luan liu iha área edukasaun, peskiza no dezenvolvimentu institusionál.

Atividade ne’e refleta komitmentu INAP atu kontinua promove dezenvolvimentu rekursu umanu ne’ebé profesional, inovativu no preparadu atu responde ba dezafiu dezenvolvimentu nasional iha futuru.

13/05/2026

Segunda feira, 11/05/2026, Diretór Jeral Institutu Nasional Administrasaun Públika (INAP) realiza enkontru ho Komissáriu Komisaun Funsaun Públika (KFP) Sr. José Telo Soares Cristóvão no Diretór Ezekutivu Fundu Desenvolvimentu Kapital Umano (FDCH) Sr. Júlio Aparício.

Objetivu enkontru ne'e hodi hare fila fali mekanizmu no prosedimentu programa bolsa estudu ba funsionárius públiku iha Timor-Leste. Diskusaun ne’e mós foka atu identifika problema sira ne’ebé durante ne’e hasoru iha prosesu implementasaun no buka solusaun ne’ebé apropriadu atu hadi’a prosesu refere.
Parte sira diskute kona ba mekanizmu kandidatura, kritériu seleksaun, área prioritária ba estudu, no monitorizasaun ba benefisiáriu bolsa estudu sira. Objetivu husi enkontru ne’e mak atu garante katak programa bolsa estudu sei implementa ho mekanizmu ne’ebé klaru, transparente, no tuir prosedimentu ne’ebé vigora.

Enkontru ne’e remata ho kompromisu husi INAP, CFP no FDCH atu kontinua hametin koordenasaun no aperfeisoa mekanizmu programa bolsa estudu atu bele fó benefísiu máximu ba dezenvolvimentu kapasidade funsionárius públiku iha Timor-Leste. Fatin realizasaun enkontru ne'e salaun enkontru DG iha INAP.

11/05/2026

Sesta feira 08/05/2026, Diretór Jerál Instituto Nacional da Administração Pública (INAP) partisipa iha serimónia enseramentu Formasaun Espesializada ba Funsionáriu Finansas Instituto de Petróleo e Geologia (IPTL), ne’ebé realiza iha Salaun Block 13 INAP, iha loron 8 fulan Maiu tinan 2026.
Formasaun ne’e hala’o durante semana ida, hahu husi loron 4 to’o 8 fulan Maiu 2026, ho partisipasaun ema nain 14 hosi IPTL. Objetivu principal hosi formasaun ne’e mak atu hasa’e kapasidade téknika partisipante sira iha área jestaun finansas no komprensaun kona-ba prosedementus legais relasiona ho orsamentu no ezekusaun finanseira tuir regras Administrasaun Públika.

Iha nia intervensaun, Diretór Jerál INAP enfatiza katak valór hosi formasaun ida ne’e la’ós de’it iha koñesimentu ne’ebé hetan durante sesaun, maibé iha kapasidade formandu sira atu aplika no adapta aprendizajen refere iha servisu loron-loron. Nia mos husu ba partisipante sira atu kontinua aprende, pratika, no ajusta an ba mudansa tempu no dezenvolvimentu sira iha área jestaun finansas públika.
Aleinde ne’e, Diretór Jerál INAP reafirma komitmentu INAP atu kontinua servisu hamutuk ho IPTL iha futuru, liuhosi realizasaun formasaun no atividade sira seluk ne’ebé bele fortalece kapasidade rekursus umanus iha instituisaun refere.
Iha oportunidade hanesan, Vise Prezidenti IPTL hato’o nia apresiasaun ba INAP tanba organiza formasaun ida ne’e no reafirma katak matéria sira ne’ebé aborda durante formasaun foka liu ba prosedementus legais no mekanizmu orsamentál, ne’ebé importante tebes atu garante jestaun finansas ne’ebé transparente, efisiente no tuir lei ne'ebe vigora iha Timor-Leste.

10/05/2026

Kinta feira 07/05/2026, Diretór Jeral Institutu Nasionál Administrasaun Públika (INAP), partisipa iha Enkontru Datoluk Komisaun Organizadora ba Preparasaun Selebrasaun Loron Restaurasaun Independénsia, 20 de Maio 2026, ne’ebé realiza iha Salaun Enkontru VIP Ministériu Administrasaun Estatal (MAE), iha loron 7 fulan Maiu 2026.

Enkontru ida ne’e lidera husi komisaun organizadora ho objetivu atu halo revizaun no diskute progresu preparasaun ba atividade komemorativa Loron Restaurasaun Independénsia. Iha enkontru refere, kada seksaun ka subkomisaun hato’o relatóriu kona-ba servisu sira ne’ebé prepara ona no atividade sira ne’ebé sei kontinua hala’o to’o loron eventu.

Asuntu sira ne’ebé hetan atensaun mak inklui preparasaun protokolu, seguransa, lojístika, dekorasaun, programa serimónia, mobilizasaun partisipantes no koordenasaun entre instituisaun governamentál sira ne’ebé envolve iha atividade refere.

Iha oportunidade ne’e, DG INAP hatudu apoiu tomak husi INAP ba komisaun organizadora no reafirma prontidaun instituisaun atu kontribui tuir responsabilidade ne’ebé atribui ona, atu asegura selebrasaun Loron Restaurasaun Independénsia tinan ida ne’e bele realiza ho di’ak, ordeiru no susesu.

06/05/2026

Kuarta feira 06/05/2026, Formasaun jestaun eskritoriu ba funsionárius administrasaun apoiu suku iha Postu Administrativu Tilomar, Munisipiu Covalima durante loron lima hahu husi loron segunda dia 4 to'o sesta feira dia 8 fulan Maiu 2026. Abertura formasaun ne'e husi Administrador Postu Tilomar no akompaña husi Diretór DNFQPAP Luis Amaral no mos formador INAP.

Objetivu husi formasaun ne'e atu hasa'e kuñesementu, abilidade no hadia komportamentu funsionárius sira nia hodi hadi'ak liu tan atendementu ba komunidade sira iha suku hat mak ne'ebe mak partense ba Postu Tilomar. Materia formasaun ne'ebe hato'o husi INAP hamutuk materia hitu, mak hanesan : Hakerek Dokumentus, Sistema Administrasaun Públika, Komunikasaun no koordenasaun, Jetaun tempu no jestaub ba an-rasik, Jestaun enkontru, Atendementu Públika no Jetaun arkivu.

Kada suku iha reprezentante funsionárius nain 4 ho total partisipante hamutuk ema nain 16. kompostu husi feto 10 no mane 6. formasaun ne'e hala'o iha Salaun Postu Tilomar, Covalima. Fromasaun ida ne'e ho loron no tipu ne'ebe hanesan hala'o mos iha Postu Adminstrativu Balibo, Munisipiu Bobonaro.

05/05/2026

Segunda feira, 04/05/2026, Diretór Jeral INAP partisipa iha serimónia abertura Formasaun Espesializada ba kargu estrutura Instituto Profisional no Treinamentu Laboral (IPTL), ne’ebé realiza iha salaun Block 13, INAP.
Iha intervensaun abertura, Diretór Jeral hato’o katak formasaun espesializada ida-ne’e iha importánsia estratéjika atu hasa’e kapasidade lideransa no jestaun ba kargu estrutura sira, hodi garante implementasaun politika públika ho efisiénsia no efikasia. Nia mos enfatiza katak dezenvolvimentu rekursu umanu iha setór públiku tenke kontinua sai prioridade, tanba sira mak pilar prinsipal ba servisu públiku ne’ebé di’ak no responsivu ba nesesidade komunidade.

Aleinde ne’e, Diretór Jeral hato’o apresiasaun ba partisipasaun ativa husi formandu sira no encoraja atu aproveita oportunidade formasaun ne’e ho máximu, liu-liu iha aspetu aplikasaun prátika iha fatin servisu. Nia mos reafirma kompromisu INAP atu kontinua fornese formasaun relevante no bazeia ba nesesidade real instituisaun públika sira.

Serimónia abertura ne’e marka hahú atividade formasaun ne’ebé sei fó kontribuisaun importante ba fortalese kapasidade institusionál IPTL no hasa’e kualidade prestasaun servisu públiku iha Timor-Leste. Partisipante ne'ebe partisipa iha formasain ne'e ema nain 13, kompostu husi mane 10 no feto 3 no formasaun loron 5 nia laran, hahu husi loron 4 to'o 8 fulan Maiu 2026.

02/05/2026

Tersa feira 28/04/2026, Aprezentasaun Rezultadu Servisus Asesor Jurídiku INAP ne’ebé realiza iha Salaun Block 13 INAP hetan partisipasaun ativu husi estrutura lideransa no kargu diresaun sira iha INAP. Atividade ida-ne’e fó oportunidade atu partilha rezultadu servisu jurídiku ne’ebé halo ona, inklui análize legal, rekomendasaun estratéjika, no kontribuisaun ba fortalecimento sistema administrativu no regulamentu internu institusaun nian.

Iha eventu refere, Diretór Jeral INAP mos fó intervensaun hodi hatudu apresiasaun ba esforsu no kontribuisaun Asesor Jurídiku, no mos fó korajen ba ekipa atu kontinua hadia qualidade servisu, garante konformidade legal, no apoia prosesu reforma administrasaun públika. Intervensaun Diretór Jeral sublinha importánsia papel jurídiku iha sustenta tomada desizaun institusionál ne’ebé sólidu, transparente no akontável.

02/05/2026

Kinta feira, 30/04/2026, Diretór Jeral INAP partisipa iha reuniaun ho Dirijentes Autoridades Municipais, inklui Autoridade Administrativa Atauro, la’ós deit fó orientasaun kona-ba Avaliasaun Kondisaun Mínima (AKM), maibé mos liga diretamente ba papel estratéjiku INAP iha asisténsia téknika no dezenvolvimentu formasaun ba funsionáriu públiku sira. Iha kontestu ida-ne’e, Diretór Jeral enfatiza katak rezultadu husi AKM tenke utiliza hanesan baze atu identifika lakuna kapasidade iha nivel munisipál, ne’ebé sei orienta dezenhu programa formasaun ne’ebé relevante no responde ba nesesidade real iha terrenu.

INAP, liu husi nia papel hanesan instituisaun formadora Estadu nian, sei fó asisténsia téknika ba Autoridades Municipais hodi dezenvolve no implementa planu formasaun ne’ebé fó prioridade ba área sira ne’ebé presiza hadia, inklui jestaun administrativu, planeamentu, no prestasaun servisu públiku. Nune’e, ligasaun entre AKM no programa formasaun sai nu’udar instrumentu importante atu asegura katak intervensaun kapasidade lao ho efisiénsia, bazeia ba evidénsia, no kontribui diretamente ba fortalecimento institusionál no melhoria kontinu iha governasaun lokal. atividade ne'e realiza iha Salaun Delta Nova, Comoro Dili-

30/04/2026

Kuarta dia 22 – Sexta 24 Abril 2026, Loron Segundu Atividade outbound formasaun lideransa obrigatoriu ba kargu diretór nasional ka ekiparadu faze primeiru tinan 2026.