HW Mbinga

06/10/2026

Waziri wa Viwanda na Biashara ambaye pia ni Mbunge wa Jimbo la Mbinga Vijijini, Mhe. Judith Kapinga, ametoa wito kwa  vijana kujiunga katika vikundi na kuchangamkia fursa za mikopo ya asilimia kumi inayotolewa na Halmashauri pamoja na mikopo inayotolewa na benki kwa wafanyabiashara wadogo, baba na mama lishe ili kujiletea maendeleo badala ya kutegemea kutunzwa na wazazi.

Mhe. Judith ametoa wito huo katika Kijiji cha Lipumba, Kata ya Kihangimahuka alipofika ambapo alikutana na wananchi wa eneo hilo.

​Aidha, wananchi na viongozi wa eneo hilo waliainisha kero mbalimbali ikiwemo ukosefu wa mfumo wa maji safi na maji taka katika zahanati, ujenzi wa nyumba ya mganga, changamoto ya kivuko katika Kitongoji cha Kisiwani kuelekea Lipumba Kati, pamoja na  ubovu wa barabara inayounganisha Lipumba – Kihangimahuka hadi Lihutu.

​Akitolea ufafanuzi sekta ya afya, Katibu wa Afya wa Halmashauri, Bw. George Mhina, alieleza kuwa Halmashauri itapitia bajeti yake ili kuhakikisha inatenga fedha za kumalizia ujenzi wa Zahanati hiyo pamoja na nyumba ya mganga.

​Akiunga mkono jitihada hizo, Mhe. Kapinga alisema "Niwahakikishie kuwa kwa kuwa Mkurugenzi na Katibu wa Afya wameahidi kupitia bajeti yao, nina imani kubwa zahanati hii itakamilika. Pia, ili kuunga mkono juhudi hizi, mimi binafsi nitachangia shilingi laki saba (TSh 700,000) kwa ajili ya ujenzi wa nyumba ya mganga."

Wakuu wa taasisi walioambatana na Mhe. Judith  kutoka Shirika la Umeme Tanzania ( TANESCO), Wakala wa Barabara Vijijini ( TARURA) na Mamlaka ya maji pamoja na Mkurugenzi Mtendaji wa Halmashauri ya Wilaya ya Mbinga waliahidi kutatua changamoto zinazowakabili wananchi hao mapema iwezekanavyo. 

Wananchi wa Kijiji hicho waliishukuru Serikali, Mbunge na Halmashauri kwa kuendelea kutoa fedha za miradi ya maendeleo.

Mhe. Judith aliambatana na Mkurugenzi Mtendaji na Timu ya Menejimenti ya Halmashauri, Mwenyekiti wa Baraza la Madiwani pamoja na wakuu wa taasisi.

05/10/2026

MADAKTARI KUTOKA UJERUMANI KUTOA  HUDUMA ZA KIBINGWA ZA KINYWA NA MENO KWA WANANCHI MBINGA DC.

Timu ya Madaktari kutoka Ujerumani wamefika katika Hospitali ya Mission Litembo, inayomilikiwa na Jimbo Katoliki la Mbinga, kwa lengo la kutoa huduma za kibingwa kwa wananchi kupitia mpango wa huduma za mkoba (Outreach).

Aidha,Madaktari hao wa huduma za kinywa na meno kutoka nchini Ujerumani wametembelea ofisi ya Mkurugenzi Mtendaji wa Halmashauri ya Wilaya ya Mbinga leo tarehe 05 Oktoba, 2026 kwa ajili ya kujitambulisha, kuimarisha ushirikiano na Serikali pamoja na kukamilisha taratibu za uratibu wa kutoa huduma hizo kwa wananchi.

​Ujio wa wataalamu hao unalenga kuwasogezea wananchi huduma hizo muhimu za afya karibu na maeneo yao ya makazi, hususan katika maeneo ambayo yamekuwa yakikabiliwa na changamoto ya upatikanaji wa wataalamu wa tiba za kinywa na meno.

​Katika ziara yao ya kutoa huduma hizo, madaktari hao wanatarajiwa kufikia maeneo mbalimbali ya Halmashauri ya Wilaya ya Mbinga ikiwemo Kituo cha Afya Kigonsera, Zahanati ya Kingoli,  Hospitali ya Ruanda na maeneo mengine.

05/10/2026

Heri ya siku ya Mwalimu duniani.

Tunatambua mchango mkubwa wa mwalimu katika harakati za kufuta ujinga.

Tunawatakia afya njema na mafanikio walimu wote.

Moest Moest

04/10/2026

Kila la kheri darasa la nne katika mtihani wenu wa upimaji.

03/10/2026

02/10/2026

WATUMISHI WA UMMA MBINGA DC WAASWA KUFANYA KAZI KWA WELEDI NA KUTOA HUDUMA BORA KWA JAMII

Kaimu Mkurugenzi Mtendaji wa Halmashauri ya Wilaya ya Mbinga ndugu Andrew Mbunda amewataka watumishi wapya kuzingatia weledi, upendo, uadilifu na uwajibikaji katika utekelezaji wa majukumu yao, ili kuhakikisha wananchi wanapata huduma bora na zenye viwango vinavyostahili.

Ameyasema hayo Oktoba 02, 2026 akizungumza na watumishi wapya walioshiriki mafunzo elekezi yaliyofanyika katika Ukumbi wa Mikutano wa Halmashauri ya Wilaya ya Mbinga. Mafunzo hayo yamelenga kuwajengea uelewa kuhusu majukumu yao, mifumo ya utendaji kazi pamoja na taratibu zinazotakiwa kuzingatiwa katika utumishi wa umma.

Aidha, Mbunda amewataka  watumishi kuacha kujitenga na jamii badala yake kuwa mfano bora katika jamii kwa kushiriki kwenye masuala mbalimbali ya kijamii.

Kwa upande wake, Kaimu Mkuu wa Divisheni ya Utawala na Rasilimali Watu, Bi. Jane Mhagama amewataka watumishi hao kuzingatia maadili ya utumishi wa umma, kanuni na taratibu za kazi, pamoja na kuzingatia nidhamu katika kutekeleza majukumu yao ya kila siku.

Zaidi ya watumishi wapya 190 wa Halmashauri ya Wilaya ya Mbinga kutoka kada mbalimbali wamepatiwa mafunzo ikiwa ni pamoja na elimu kuhusu masuala mbalimbali yanayohusu utumishi wa umma. Taasisi mbalimbali zikiwemo NMB, TCB, PSSSF na NHIF pia zimeshiriki kutoa elimu na maelekezo muhimu kwa watumishi hao.

Mafunzo elekezi kwa watumishi wapya ni sehemu ya maandalizi ya kuwawezesha kuifahamu vyema taasisi, majukumu yao, haki na wajibu wao, pamoja na mifumo na taratibu za utumishi wa umma ili  kuongeza ufanisi na kuboresha utoaji wa huduma kwa wananchi wa Halmashauri ya Wilaya ya Mbinga.

02/10/2026

MBINGA DC NA AVIV WAADHIMISHA SIKU YA KAHAWA DUNIANI KWA BONANZA LA MICHEZO NA UNYWAJI WA KAHAWA

Halmashauri ya Wilaya ya Mbinga kwa kushirikiana na Kampuni ya AVIV ya Songea imeadhimisha Siku ya Kahawa Duniani kwa kuandaa bonanza la kirafiki la michezo lililoambatana na unywaji wa kahawa inayozalishwa na kampuni hiyo, ikiwa ni sehemu ya kuenzi zao la kahawa na kutambua mchango wake katika maendeleo ya jamii.

Bonanza hilo lililofanyika Oktoba 1, 2026 katika viwanja vya Shule ya Sekondari Kigonsera, likihusisha michezo mbalimbali ikiwemo mpira wa miguu, mpira wa mikono pamoja na kuvuta kamba.

Kabla ya kuanza kwa michezo hiyo, viongozi na watumishi wa Mbinga DC kwa kushirikiana na AVIV walitembelea shamba la kahawa lililopo katika Shule ya Sekondari Kigonsera na baadaye kushiriki unywaji wa kahawa inayozalishwa na kampuni ya hiyo..

Akizungumza baada ya kumalizika kwa bonanza hilo, Afisa Michezo na Utamaduni wa Halmashauri ya Wilaya ya Mbinga, Ndugu CharlesMaero amesema bonanza hilo lililenga  kuimarisha afya za watumishi,  kuimarisha ushirikiano kati ya Halmashauri na Kampuni ya AVIV  ambayo ni miongoni mwa wazalishaji wa zao la kahawa katika Mkoa wa Ruvuma.

Kwa upande wake, naibu meneja Mkuu wa Kampuni ya AVIV, ndugu Amit Kumar akiambatana na viongozi wengine wa kampuni hiyo, ameishukuru Halmashauri ya Wilaya ya Mbinga kwa kuendelea kuimarisha ushirikiano na AVIV.

Aidha, ndugu Amit Kumar ameahidi kuendelea kuchangia katika sekta ya michezo kwa kutoa vifaa mbalimbali ikiwemo mipira, magoli na nyavu vitakavyotumika katika viwanja vya Shule ya Sekondari Kigonsera.

Siku ya Kahawa Duniani huadhimishwa tarehe 1 Oktoba kila mwaka, ikiwa ni siku ya kutambua mchango wa zao la kahawa katika maisha na uchumi, kuhamasisha uzalishaji, matumizi na thamani ya kahawa katika kukuza uchumi na kuboresha maisha ya wananchi.

27/09/2026

ni matukio yaliyojiri katika viwanja vya Mbinga DC Mall leo tarehe 27 Septemba, 2026 katika hafla ya kufunga maonesho ya biashara na uwekezaji.

27/09/2026

Mgeni rasmi katika hafla ya kufunga maonesho ya biashara na uwekezaji Mhe. Brigedia Jenerali Ahmed Abbas Ahmed pamoja na kupitia mabanda mengine na kupongeza shughuli zilizofanyika lakini aliona sio vibaya kupata elimu ya madini kutoka kwa mtaalamu wa Tume ya Madini.

Aidha, alipata nafasi ya kulisha samaki wa pambo aliyeletwa katika maonesho, huku akiagiza ufanyike utaratibu ampate huyo samaki aweze kumfuga.

Maonesho ya Biashara na Uwekezaji hayakumuacha mtu abaki alivyoingia. K**a mtu hakununua bidhaa basi alipata huduma na elimu.

27/09/2026

Shirika la Umeme Tanzania ( TANESCO) na Kampuni ya Jitegemee hawakubaki nyuma kuhakikisha wananchi wa Mbinga wanapata elimu kuhusu matumizi ya nishati safi.

Aidha, katika siku nne za nguvu kuanzia tarehe 24 hadi 27 Septemba, 2026 kwenye maonesho ya biashara na uwekezaji wananchi walifika katika banda la TANESCO kupata huduma ya majiko ya umeme lengo likiwa ni kuendeleza kampeni ya matumizi ya nishati safi.

Pia, Kampuni ya Jitegemee imewahudumia wananchi wa Mbinga kwa kuwauzia mkaa mbadala unaotengenezwa kutokana na makaa ya mawe.

Ikumbukwe kuwa Mbinga ni mzalishaji mkubwa wa makaa ya mawe, hivyo wawekezaji Jitegemee wameamua kuchakata makaa ya mawe na kupata mkaa mbadala ambao unatumika nyumbani pia shule ambazo zimehama kwenye matumizi ya kuni wanatumia mkaa mbadala kuwapikia wanafunzi.