13/02/2025
Buxoroda “Ziyo ulash” loyihasi davom etmoqda
Buxoro viloyatidagi barcha tuman (shahar) davlat xizmatlari markazlarida loyiha doirasida kutubxona burchagi tashkil etilib, fuqarolar va adliya xodimlariga kitob mutolaa qilish imkoniyati yaratildi hamda kutubxona fondi o‘zbek va jahon adabiyotining asarlari bilan boyitildi.
Mazkur loyihaga nafaqat adliya idoralari xodimlari, balki aholining barcha qatlamlari, turli kasb egalari, sport ustalari, san’atkorlar o‘z hissalarini qo‘shishmoqda.
“O‘zbekkonsert” davlat muassasasi Buxoro viloyati bo‘limi boshlig‘i D.Xo‘jaev va boshqa taniqli san’atkorlar ushbu aksiyada ishtirok etgan holda Buxoro shahar adliya bo‘limi davlat xizmatlari markaziga kitoblar topshirib, kitobxonlik madaniyatini rivojlantirish va barcha uchun kitoblardan foydalanish imkoniyatini kengaytirish tashabbusini qoʻllab-quvvatladilar.
Markazlarda tashkil etilgan kitob javonlari to‘ldirilgach, ortgan kitoblar ehtiyojmand oilalarga, maktablar, bog‘chalarga sayyor tarzda yetkazib beriladi, shuningdek FHDY bo‘limlarida nikohini qayd etgan yosh oilalarga taqdim etiladi.
Kitob ulashing — ziyo koʻpayadi.
