Suv xo‘jaligi vazirligi

01/06/2026

Сувни тежашдан рақамли бошқарувгача: соҳадаги ислоҳотлар қандай натижа бермоқда?

Йилдан-йилга сув ресурслари инсоният тараққиётини белгилаб берувчи энг муҳим стратегик омиллардан бирига айланиб бормоқда. Иқлим ўзгариши, аҳоли сонининг жадал ўсиши, саноат ва қишлоқ хўжалиги эҳтиёжларининг ортиши, шунингдек, урбанизация жараёнларининг кенгайиши сув захираларига бўлган босимни тобора кучайтирмоқда. Натижада сувдан оқилона фойдаланиш, уни муҳофаза қилиш ва келажак авлодлар учун сақлаб қолиш масаласи глобал кун тартибидаги энг долзарб вазифалардан бирига айланди.

Шу сабабли кўплаб мамлакатлар сув ресурсларини бошқариш тизимини такомиллаштириш, замонавий технологияларни жорий этиш ва сув тежамкорлигини оширишга қаратилган кенг қамровли дастурларни амалга оширмоқда. Сув хавфсизлигини таъминлаш эса бугунги кунда миллий хавфсизликнинг ажралмас қисми сифатида эътироф этилмоқда.

Марказий Осиё мазкур жараёнларнинг таъсирини энг кучли ҳис қилаётган ҳудудлардан бири ҳисобланади. Мутахассислар ҳисоб-китобларига кўра, 21 аср ўртасига келиб Тянь-Шань, Помир ва Ҳиндукуш тоғларидаги музликларнинг ярмидан кўпроғи йўқолиши мумкин. Бу эса Сирдарё ҳавзасида сув оқимининг 5 фоизгача, Амударё ҳавзасида эса 15 фоизгача қисқаришига олиб келади. Шу билан бирга, 2040 йилга қадар минтақа аҳолиси 90 миллион нафарга яқинлашиши ва сув танқислиги даражаси 30 фоизгача ошиши прогноз қилинмоқда.

Ўзбекистон ҳам мазкур муаммолардан мустасно эмас. Мутахассисларнинг баҳолашларига кўра, 2030 йилга келиб мамлакатда сув ресурслари тақчиллиги 15 миллиард куб метргача етиши мумкин. Бу эса қишлоқ хўжалиги, энергетика, озиқ-овқат хавфсизлиги ва иқтисодиётнинг бошқа тармоқлари учун жиддий муаммо туғдириш мумкин.

Шу боис кейинги йилларда мамлакатимизда сув хўжалиги соҳасини модернизация қилиш, сув ресурсларини бошқариш самарадорлигини ошириш ва улардан оқилона фойдаланишга қаратилган кенг кўламли ислоҳотлар амалга оширилмоқда. Бу борада Сув хўжалигини ривожлантиришнинг 2020–2030 йилларга мўлжалланган концепцияси, янги таҳрирдаги Сув кодекси ҳамда “Ўзбекистон – 2030” стратегияси муҳим дастурий асос бўлиб хизмат қилмоқда.

Президент ташаббуси билан 2024 йилдан бошлаб мамлакатда “фавқулодда сувни тежаш режими” жорий этилди. Бу сувдан фойдаланиш самарадорлигини ошириш ва мавжуд ресурсларни сақлаб қолишга қаратилган муҳим қадам бўлди.

Батафсил:
https://gov.uz/oz/suvobekt/news/view/171065

Илҳом Жўраев,
Сув хўжалаги объектларини
эксплуатация қилиш агентлиги
директорининг биринчи ўринбосари.

Rasmiy vebsayt: O'zbekiston Respublikasi suv xo'jaligi vazirligi huzuridagi Suv xo'jaligi obyektlarini ekspluatatsiya qilish agentligi

01/06/2026

⚽️ O‘zbegim o‘g‘lonlari, sizlarga Jahon chempionatida ulkan zafarlar tilaymiz!

🇺🇿 Millionlab yurtdoshlarimizning ishonchi va duolari sizlar bilan. Har bir o‘yin, har bir g‘alaba Vatanimiz sharafini yanada yuksaltirsin.

🔥 Maydonda matonat, ishonch va g‘alaba ruhi sizlarni tark etmasin!

🏆 O‘zbekiston terma jamoasiga Jahon chempionatida omad yor bo‘lsin!

01/06/2026

Сув муаммоси – глобал ва минтақавий хавфсизлик учун таҳдид
Россиянинг Москва вилоятида I Халқаро хавфсизлик форуми доирасида “Сув муаммоси – глобал ва минтақавий хавфсизлик учун таҳдид” мавзусида давра суҳбати бўлиб ўтди. Унда Россия, Марказий Осиё ва Африка мамлакатларидан ташриф буюрган иқтисодиёт, экология ва халқаро муносабатлар соҳасидаги экспертлар сув ресурслари билан боғлиқ муаммоларнинг жаҳон хавфсизлигига таъсирини муҳокама қилди.

Давра суҳбати иштирокчилари сув ресурсларидан фойдаланиш имкониятларининг чекланиши ижтимоий-иқтисодий кескинликни кучайтириши, айрим ҳудудларда эса давлатлараро ва ички низолар учун омилга айланиши мумкинлигини таъкидладилар. Шу нуқтаи назардан сув хавфсизлиги масаласи халқаро кун тартибидаги устувор мавзулардан бири сифатида баҳоланди.

Муҳокамаларда сув омили сиёсий ва иқтисодий жараёнларга сезиларли таъсир кўрсатаётган Марказий Осиё, Яқин Шарқ ва Африка минтақаларига алоҳида эътибор қаратилди. Айниқса, трансчегаравий дарёлардан оқилона фойдаланиш, сув ресурсларини адолатли тақсимлаш ҳамда иқлим ўзгариши оқибатларини юмшатиш масалалари долзарб вазифалар сифатида қайд этилди.

Тадбирда Сув хўжалиги объектларини эксплуатация қилиш агентлиги директори биринчи ўринбосари Илҳом Жўраев иштирок этиб, Марказий Осиёдаги сув хавфсизлиги билан боғлиқ асосий таҳдидлар ҳамда Ўзбекистонда амалга оширилаётган ислоҳотлар ҳақида ахборот берди.

Шу билан бирга, трансчегаравий сув ресурсларидан оқилона ва адолатли фойдаланишни таъминлаш, халқаро ташкилотлар ҳамда қўшни давлатлар билан ҳамкорликни мустаҳкамлаш сув хавфсизлигини таъминлашнинг муҳим шартларидан бири эканини билдирди.

Муҳокамалар якунида сув муаммосини ҳал этиш халқаро ҳамкорлик ва инновацион ёндашувларни талаб қилувчи устувор вазифа экани эътироф этилди.

Сув хўжалиги объектларини эксплуатация қилиш агентлиги матбуот хизмати.

26/05/2026

Телеграм ижтимоий тармоғидаги “Soyalar Xabari” каналида эълон қилинган мурожаатлар юзасидан расмий муносабат

Норин-Қорадарё ирригация тизимлари ҳавза бошқармасининг 1-тоифали муҳандиси О.Акрамов фаолияти ҳақида “Soyalar Xabari” каналида 2026 йил 5 май куни (https://t.me/soyalar_xabari/22538) ва 2026 йил 25 май куни (https://t.me/soyalar_xabari/23586) мурожаатлар эълон қилинди.

2026 йил 26 май куни Норин-Қорадарё ИТҲБ Касаба уюшма қўмитасининг йиғилиши ўтказилиб, ушбу масала муҳокама қилинди.

Касаба уюшма қўмитаси аъзоси, бошқарма Бош юрисконсульти М.Каримов сўз олиб, О.Акрамовга нисбатан ҳуқуқни муҳофаза қилиш органлари томонидан эгаллаб турган лавозимидан бўшатилиши тўғрисида ҳеч қандай ҳужжат мавжуд эмаслиги ва тақдим қилинмаганлигини айтиб ўтди.

Коррупцияга қарши ички назорат бўйича бош мутахассис А.Абдуллаев, Касаба уюшма қўмитаси раиси К.Жамалдинов, йиғилиш иштирокчиларидан С.Юсупов, А.Байбаев, Я.Юсуповларнинг фикрлари тингланди.

Муҳокамалардан сўнг Норин-Қорадарё ирригация тизимлари ҳавза бошқармасининг 1-тоифали муҳандиси О.Акрамов устидан ёзилган ва “Soyalar Xabari” каналида эълон қилинган мурожаатлар асоссиз деб топилди.

Норин-Қорадарё ИТҲБ матбуот хизмати

21/05/2026

ВАЗИР ВА ЁШЛАР МУЛОҚОТИ
Гиннес рекордини янгилашда қатнашган талаба, 30 нафар тенгдошини ишга олган ёш раҳбар ва бошқа янги истеъдодлар кашф этилди

Ўтган йили 18 август куни пойтахтимиздаги “Янги Ўзбекистон” боғида илк бор муҳандислик ва робототехника йўналишида дунё рекорди янгиланди. 2000 нафар юртимиз ёшлари белгиланган вақт ичида мини роботни йиғиш ва ҳаракатга келтириш амалиётини муваффақиятли бажариб, ҳиндистонлик тенгдошларидан ўзиб кетдилар. Ушбу миссия юртимизнинг илм-фан ва муҳандислик соҳаларидаги имкониятлари ва ижодий-интеллектуал потенциал даражасини дунёга намоён этди. Бу Марказий Осиё давлатлари орасида илк бор муҳандислик соҳасидаги йирик Гиннес рекорди ҳисобланади. Мазкур тарихий тадбирда Қарши Давлат техника университетининг ирригация муҳандислиги факультети гидротехника иншоотлари ва насос станцияларидан фойдаланиш йўналиши талабаси Қувончбек Нарзуллаев иштирок этди.
Ўтган йили Қувончбек Сув хўжалиги вазири стипендиясига ҳам сазовор бўлди.
Бу йил олий ўқув юртини тамомлаётган Қувончбекнинг олам-олам орзулари бор. Бугун у Сув хўжалиги вазири Шавкат Хамраев билан мулоқотда ўзининг янги лойиҳаси ҳақида гапириб берди. Лойиҳа автомагистрал йўлларда спиралсимон шамол генераторларини ўрнатиб, электр энергиясини олиш орқали чекка ҳудудлардаги қишлоқларга насослар ёрдамида сув чиқаришни назарда тутади.
Ёш ихтирочининг лойиҳаси вазир томонидан қўллаб-қувватланиб, уни амалга ошириш, бўлажак сувчига шароитлар яратиш тўғрисида Аму-Қашқадарё ИТҲБ бошлиғига топшириқ берилди.
Ҳусниддин Сафаров 24 ёшда. Ёш бўлишига қарамасдан 5 та вилоятга сув етказиб бериш учун хизмат қиладиган Зарафшон магистрал тизимидан фойдаланиш бошқармаси бошлиғининг ўринбосари лавозимида ишлайди.

- Жорий йил бошида бошлиқ ўринбосари вазифасига тайинланганимда бошқармамиз тизимида 30 нафар ёшлар ишлар эди. Бугун тенгдошларимиз сони 60 нафарга етди. Йил охиригача биздаги ёшлар сонини 100 нафарга етказиш ва тизимни ёшартириш ниятидамиз, деди Ҳусниддин вазир билан учрашувда чоғида.
У бошлаб қўйган илмий ишини Европа давлатларида давом эттириш режасини маълум қилди. Ҳусниддинга ҳам барча шароит ва имкониятлар яратилиши ваъда қилинди.
Корея Республикасининг KOICA халқаро ҳамкорлик агентлиги гранти асосида нуфузли Ханянг Университети (Hanyang University ERICA) магистратура босқичига ҳужжат топширган навоийлик ёш сувчи Абдуазиз Абдукаримов, Сирдарё вилояти Мирзаобод туманида туғилиб ўсган, “Сирдарёсувқурилишинвест” ДМ да ишлаётган таэквондо бўйича Ўзбекистон чемпиони бўлган Эргашбой Юлдашев ва кикбоксинг бўйича жаҳон чемпиони бўлган Азиз Ҳакимов ҳамда бошқа истеъдодли, иқтидорли ёшлар сўзга чиқди.
Ёшларнинг таклифлари, ташаббуслари тингланди. Вазир билан мулоқот шунчаки расмий йиғилиш эмас, балки амалий натижа бераётган платформага айлангани ёшлар томонидан эътироф этилди.
Спорт мусобақаларини ташкил этиш, “Заковат” интеллектуал турнирини уюштириш, китобхонлик танловини ўтказиш, илмий фаолиятга ёшларни жалб этиш, уларнинг ўз иқтидорини намоён этиши учун бошқа кўплаб янги имкониятларни яратишга келишиб олинди.

Ахборот хизмати

21/05/2026

IWMI БИЛАН ҲАМКОРЛИК ЯНГИ БОСҚИЧДА (https://gov.uz/uz/suvchi/news/view/168234)

Ўзбекистон билан Халқаро сув ресурсларини бошқариш институти (IWMI) ўртасида ҳамкорлик алоқалари ўрнатилганига 25 йил бўлди. Ўтган даврда бу институт билан сув хўжалиги соҳасида кўплаб лойиҳалар муваффақиятли амалга оширилди.

Бугунги кунда сув дипломатияси, сув хўжалигида гендер сиёсати, сув тежовчи технологиялар, рақамлаштириш, кадрлар тайёрлаш, илмий йўналишларда яқин ҳамкорлик қилиб келинмоқда.

Бугун Сув хўжалиги вазири Шавкат Хамраев мамлакатимизга ташриф буюрган Халқаро сув ресурсларини бошқариш институти Бош директори Марк Смит билан учрашув ўтказди. Учрашувда ўзаро ҳамкорлик алоқалари муҳокама қилинди, қўшма лойиҳаларни амалга ошириш юзасидан фикр алмашилди.

Ўтган йили 16 ноябрь куни Тошкентда бўлиб ўтган Марказий Осиё давлатлари раҳбарларининг еттинчи Маслаҳат учрашувида Президентимиз Шавкат Мирзиёев минтақада сув танқислиги ортиб бораётганини ҳисобга олиб, 2026-2036 йилларни “Марказий Осиёда сувдан оқилона фойдаланиш бўйича амалий ҳаракатлар ўн йиллиги” деб эълон қилишни таклиф этган эди.

Жорий йилнинг 22 апрель куни Остонада ўтказилган Оролни қутқариш халқаро жамғармаси (ОҚХЖ) таъсисчи давлатлари раҳбарлари кенгашининг навбатдаги йиғилишида Ўзбекистон раҳбари Марказий Осиёда сувдан оқилона фойдаланиш бўйича амалий ҳаракатлар ўн йиллиги ва минтақа мамлакатларида Сув ҳафталикларини мунтазам ўтказиб боришга қаратилган ташаббуслар қўллаб-қувватланишига умид билдирди.

Шавкат Мирзиёев қўшни мамлакатлар етакчиларини шу йилнинг сентябрь ойида Самарқандда бўлиб ўтадиган Сувни тежаш бўйича бутунжаҳон форумида иштирок этишга яна бир бор таклиф этди.
Халқаро сув ресурсларини бошқариш институти Бош директори билан учрашувда ана шу ташаббуслар доирасида ҳамкорликда амалга ошириладиган вазифалар муҳокама қилинди.

Шу билан бирга, жаноб Марк Смит Ўзбекистон 2027-2029 йилларда Оролни қутқариш халқаро жамғармаси раислигини қабул қилиб олиши билан қутлар экан, Халқаро сув ресурсларини бошқариш институти бу даврда мамлакатимизни қўллаб-қувватлашини билдирди. Сув тежовчи технологиялар, рақамлаштириш масалаларида кўмак беришга тайёрлигини таъкидлади.

Учрашув самимий ва дўстнома руҳда ўтди.
IWMI вакиллари Сувчилар мактаби фаолияти билан ҳам танишди.

Маълумот учун: IWMI 1984 йилда ташкил этилган бўлиб, сув танқислигини камайтиришга қаратилган илмий тадқиқотлар олиб боради, ҳукуматлар, хусусий сектор ва фермерлар билан ҳамкорликда амалий ечимлар ишлаб чиқади ҳамда жорий этади. Бугунги кунда институт дунёнинг 10 дан ортиқ мамлакатида фаолият юритади. Унинг Марказий Осиё минтақавий офиси Тошкент шаҳрида жойлашган.

Ахборот хизмати

21/05/2026

Norin-Qoradaryo ITHBda talabalar uchun amaliy mashg‘ulotlar tashkil etilmoqda

Norin–Qoradaryo irrigatsiya tizimlari havza boshqarmasida Andijon qishloq xo‘jaligi va agrotexnologiyalar instituti talabalari uchun dual ta’lim tizimi asosida amaliy mashg‘ulotlar tashkil etilmoqda.

Mashg‘ulotlar davomida yoshlar suv xo‘jaligi sohasiga oid nazariy bilimlarini amaliyot bilan mustahkamlab, tizimdagi ish jarayonlari, gidrotexnika inshootlari faoliyati va sohada qo‘llanilayotgan zamonaviy yondashuvlar bilan yaqindan tanishmoqda.

Mutaxassislar tomonidan o‘tkazilayotgan amaliy darslarda talabalar suv taqsimoti, irrigatsiya tarmoqlarini boshqarish, suvdan samarali foydalanish hamda sohadagi texnik jarayonlar bo‘yicha zarur ko‘nikmalarni egallamoqda.

Dual ta’lim asosida tashkil etilayotgan bunday amaliy mashg‘ulotlar yoshlarning kasbiy tajribasini oshirish, ularni sohada malakali kadr sifatida tayyorlashda muhim ahamiyat kasb etmoqda.

Norin–Qoradaryo irrigatsiya tizimlari havza boshqarmasida Andijon qishloq xo‘jaligi va agrotexnologiyalar instituti talabalari uchun dual ta’lim tizimi asosi...

20/05/2026

"Jizzax" telekanalining "Maxsus reportaj" dasturida Jizzax viloyatida suv xo‘jaligi tizimida amalga oshirilayotgan raqamlashtirish jarayonlari haqida lavha e...

20/05/2026

“Қатли” маҳалласида сув таъминотини яхшилаш ишлари давом этмоқда

Президентимизнинг 2025 йил 8 октябрдаги “Алоҳида туман (шаҳар) ва маҳаллаларни аҳолининг яшаши ва тадбиркорлик фаолияти билан шуғулланиши учун намунали ҳудудга айлантириш чора-тадбирлари тўғрисида”ги қарори ижроси доирасида Хоразм вилоятининг Янгибозор туманида амалий ишлар олиб борилмоқда.

Хусусан, “Қатли” маҳалласида деҳқон хўжалигига ихтисослашган 50 гектар ер майдонида “бир контур — бир маҳсулот” тамойили асосида сабзавот ва полиз экинларини етиштириш лойиҳаси амалга оширилмоқда.
Маҳаллада сув таъминотини яхшилаш мақсадида “Қиличниёзбой” каналида насос станцияси қурилиши бошланган бўлиб, объектга қуввати 45 кВт бўлган 2 та насос двигатели ҳамда 120 кВт электр энергияси ишлаб чиқарувчи қуёш панеллари ўрнатилди.

“Хоразмсувқурилишинвест” давлат муассасаси буюртмаси асосида амалга оширилаётган мазкур лойиҳа ишлари ҳозирда якуний босқичга етказилмоқда.

Лойиҳа ишга туширилгандан сўнг маҳаллада сув таъминоти барқарорлашиб, ерлардан самарали фойдаланиш ва аҳоли даромадларини ошириш имкониятлари кенгаяди.

✍️ Чапқирғоқ Амударё ИТҲБ матбуот хизмати

19/05/2026

Daryo va soylar bo‘yida qanday hududlar muhofaza qilinadi?

Suv kodeksining 129-moddasiga muvofiq, daryolar va qurimaydigan soylar atrofida suvni muhofaza qilish zonalari doirasida sohil bo‘yi mintaqalari ajratiladi.

Mazkur hududlar suv obyektlarini muhofaza qilish, sohillarni yemirilishdan saqlash hamda ekologik barqarorlikni ta’minlash maqsadida belgilanadi. Shu munosabat bilan sohil bo‘yi mintaqalarida xo‘jalik faoliyatini amalga oshirish, turli bino va inshootlar qurish taqiqlanadi. Faqat suv xo‘jaligiga oid obyektlar bundan mustasno hisoblanadi.

Qonunchilikka ko‘ra, sohil bo‘yi mintaqasining kengligi daryo yoki soyning ko‘p yillik o‘rtacha suv sathi, sohilning qiyaligi, tuproq turi hamda hududning tabiiy xususiyatlaridan kelib chiqqan holda belgilanadi. Yuvilish xavfi yuqori bo‘lgan hududlarda muhofaza hududi kengroq qilib ajratilishi mumkin.

Shuningdek, tog‘ hududlari va aholi punktlarida sohil bo‘yi mintaqalarini belgilashda hududning o‘ziga xos xususiyatlari, shaharsozlik rejalari va ekologik talablar ham inobatga olinadi.

Mazkur tartib daryo va soylarning tabiiy holatini saqlash, noqonuniy qurilishlarning oldini olish hamda suv obyektlarini ekologik muhofaza qilishda muhim ahamiyat kasb etadi.