30/11/2023
“KO‘RINMAS YOV” QURBONIGA AYLANMAYLIK!
Is gazi inson hayoti, uning salomatligi uchun juda xavfli. Eng achinarlisi, uning o‘lim holatlari bilan yakun topishi mumkinligidir. Bu borada tegishli soha xodimlari tomonidan har yili, muntazam ravishda aholiga tushuntirish ishlari olib boriladi. Ommaviy axborot vositalari orqali is gazining kelib chiqish sabablari, uning oldini olish yo‘llari tushuntiriladi.
Ming afsuski, hammamiz ham bunga o‘z vaqtida e’tibor beravermaymiz. Gazdan oqilona, xavfsiz foydalanish kerakligi, nostandart gaz uskunalarini qo‘llash noxush holatlarga sabab bo‘lishi mumkinligi haqidagi “va’z”lar ba’zilarimizga keraksizdek tuyuladi. Biroq gazdan e’tiborsiz foydalanish orqali sodir bo‘layotgan noxush holatlarda moddiy zarar ko‘rgan, jarohat olgan, qurbon bo‘lgan insonlar o‘rnida o‘zimiz ham bo‘lishimiz mumkinligini xayolimizga keltirmaymiz.
Sherobod tumanida tabiiy gazdan xavfsiz foydalanish, is gazidan zaharlanishning oldini olish bo‘yicha targ‘ibot tadbirlari davom etmoqda.
“ – Joriy yilning 10 oyida tumandagi 4400 ta hovli joy, 600 ta ko‘p qavqatli uy, shuningdek ijtimoiy ob’ektlarda kuz-qishga tayyorgarlik va gazdan foydalanish holatlari o‘rganildi. Shuncha targ‘ibot olib borilishiga qaramay, ba’zi xonadonlarda nostandart, qo‘lbola pechlari mavjudligi, ochiq olov mavjud xonada dam olish holatlari aniqlandi. Xonadon egalari tegishli tartibda ogohlantirildi”, - deydi “Sherobodtumangaz” gaz ta’minoti bo‘limi xizmat boshlig‘i Erkin Musurmonov.
Ko‘za k***a emas, kunida sinadi. Baxtsiz hodisalar biz bilan hech qachon sodir bo‘lmaydi, deb e’tiborsizlikka yo‘l qo‘yish, xavfni bartaraf qilmaydi. Tuman gaz ta’minoti bo‘limi xodimlari o’n oy mobaynida 85 marta uchrashuv va davra suhbatlari tashkil qilib, fuqarolarga shular haqida ma’lumot berishdi.
Shuningdek, iste’molchilarga is gazidan zaharlanishning oldini olish bo‘yicha 40 mingdan ortiq eslatma va bukletlar, ogohlantiirish xatlari berildi.
Hurmatli iste’molchilar! Gazdan foydalanish qoidalariga amal qilib, hayotimizni xavfdan himoya qilaylik. “Zangori yoqilg‘i” xonadonlarimizga faqat iliqlik olib kirsin.
“Hududgaz Surxondaryo” gaz ta’minoti filiali matbuot xizmati
