Lëvizja Vetëvendosje - Shtime

04/08/2026

Mirëqeverisja e Dr. Qemajl Aliu dhe Vetëvendosjes!
VVazhdojmë me punë të mira, projekte të mëdha, transparencë e llogaridhënie!

100% TRANSPARENCË BUXHETORE!

Komuna e Shtimes vlerësohet përsëri me 100 pikë maksimale për transparencë të plotë buxhetore nga Instituti GAP në raportin e fundit për vitin 2025.

Ky rezultat reflekton drejtpërdrejt vizionin tonë për një qeverisje të drejtë, të hapur dhe plotësisht në shërbim të qytetarëve. Ky vlerësim dëshmon punën tonë të përditshme për t’u siguruar që çdo cent i buxhetit të komunës menaxhohet me llogaridhënie maksimale.

Zotimi ynë mbetet puna e vazhdueshme me përkushtim për mirëqeverisje, transparencë të plotë dhe përparim në çdo lagje e fshat të komunës sonë!

01/08/2026

Lëvizja pret Mërgatën, Lëvizja me Mërgatën!

Mërgata ka qenë gjithmonë një shtyllë e fuqishme e Lëvizjes VETËVENDOSJE! dhe frymëzim për organizatën tonë kudo.

Andaj, sonte, e shtunë, duke filluar nga ora 20:00, në Sheshin „Adem Jashari“ në Prishtinë, takohemi në pritjen e sivjetme që Lëvizja VETËVENDOSJE! organizon për mërgatën.

I pranishëm do të jetë edhe kryetari i Lëvizjes, njëherazi kryeministër i Republikës së Kosovës, Albin Kurti.

Ju mirëpresim!

21/07/2026

08/07/2026

Lajm i mirë për qytetarët. Kosova përfiton 206.4 milionë euro nga fondet e BE-së.

Dje, më 7 korrik, Bashkimi Evropian na njoftoi zyrtarisht se Komiteti i IPA-s ka miratuar projektet e propozuara nga Kosova në kuadër të programeve IPA 2026 dhe IPA 2027, në vlerë prej 180.5 milionë euro. Pas miratimit nga Komisioni Evropian dhe më pas nënshkrimit dhe ratifikimit të Marrëveshjes Financiare nga Kuvendi, projektet do të fillojnë zbatimin.

Fondet do të mbështesin fushat prioritare të vendit:

• Mjedisi dhe klima - 44 milionë euro;

• Energjia - 34.5 milionë euro;

• Menaxhimi i kufijve dhe migrimi - 30.5 milionë euro;

• Konkurrueshmëria, arsimi dhe punësimi - 31.8 milionë euro;

• Qeverisja e mirë dhe përafrimi me BE - 24.7 milionë euro;

• Sundimi i ligjit - 15 milionë euro.

Rreth gjysma e fondeve do të shkojnë për investime infrastrukturore. Shumica e projekteve do të realizohen në kombinim me partnerë të tjerë zhvillimorë dhe me bashkëfinancim nga institucionet tona.

Përveç projekteve të IPA 2026 e IPA 2027, janë miratuar edhe 3 grante nga Korniza Investuese për Ballkanin Perëndimor (WBIF), në vlerë totale prej 25.9 milionë euro:

- Hidrosistemi Ibër-Lepenc - asistencë teknike për përgatitjen e investimit infrastrukturor;

- Autostrada Qafë e Duhlës–Banullë - asistencë teknike për përgatitjen e segmentit të autostradës;

- Impianti i trajtimit të ujërave të zeza në Podujevë - grant investues prej 24.3 milionë euro, në bashkëpunim me BERZH.

Falënderojmë Bashkimin Evropian për mbështetjen. Këto mjete do të shfrytëzohen në funksion të qytetarëve dhe zhvillimit të vendit.

22/06/2026

Rekordmeni i shkeljeve ligjore: Brenda 5 muajve, Rrahman Jakupi 11 herë shkeli ligjin

Pazarxhinjtë injorantë që e kanë uzurpuar Kuvendin Komunal në Shtime po shënojnë rekorde të zeza të paligjshmërisë.

Rrahman Jakupi, kryesues i mllefit dhe i inateve, që erdhi si emër kundër vullnetit të qytetarëve, po përballet me probleme të mëdha ligjore. Ai nuk i njeh procedurat dhe po vepron sipas urdhrave të shefave të tij, të cilët e kanë instaluar si kukull në krye të Kuvendit Komunal.

Në raste të tilla, dështimi institucional është i pashmangshëm, dhe pikërisht kjo po ndodh.

Plot 11 vendime të Kuvendit Komunal të Shtimes janë konstatuar nga Ministria e Administrimit të Pushtetit Lokal si të kundërligjshme.

Kjo është pasojë e qasjes së papërgjegjshme dhe joprofesionale në udhëheqjen e Kuvendit Komunal nga Rrahman Jakupi. Abuzimin dhe udhëheqjen famëkeqe që e kanë ushtruar për 20 vjet në qeverisje, tashmë e kanë bartur edhe në Kuvendin e Komunës.

Edhe seanca e fundit e jashtëzakonshme është thirrur pa ekzistuar rrethana të jashtëzakonshme dhe pa u bashkëngjitur materialet përkatëse.

11 vendimet e konstatuara si të kundërligjshme nga MAPL janë:

* Vendimi për zgjedhjen e Komitetit për Komunitete
* Rregullorja për taksa, tarifa dhe gjoba për vitin 2026
* Vendimi për shfuqizimin e vendimit Nr. 01/17, të datës 31.01.2011
* Vendimi për ndryshimin e nenit 6.9 të Rregullores së Punës së Kuvendit dhe Komiteteve, Nr. 01/155, të datës 27.04.2023
* Vendimi për zgjedhjen e Komitetit për Komunitete sipas kërkesës së MAPL-së
* Vendimi për anulimin e vendimit të Kuvendit të Komunës së Shtimes Nr. 01/64, të datës 02.04.2026
* Vendimi për anulimin e vendimit të Kuvendit të Komunës së Shtimes Nr. 01/65, të datës 02.04.2026
* Vendimi për shfuqizimin e vendimit Nr. 01/17, të datës 31.01.2011
* Vendimi për formimin e komisionit për ndryshimin e Rregullores së Punës së Kuvendit dhe Komiteteve
* Vendimi për formimin e komisionit për ndryshimin e Rregullores për përcaktimin e procedurave të dhënies në shfrytëzim, për më pak se një vit, të pronës së paluajtshme komunale Nr. 01-459, datë 27.02.2023
* Vendimi për formimin e komisionit për verifikimin e gjendjes së banesave të komunës në objektin “Fitorja”.

Hiq më pak fajtorë nuk janë edhe asamblistët e PDK-së dhe LDK-së që me votën e tyre i mbështetën këto vendime të kundërligjshme.

Kryesuesi i Kuvendit Komunal nuk mund të vazhdojë të sillet sikur këto shkelje të mos ekzistojnë. Funksioni i tij është të garantojë respektimin e ligjit.

Nëse është fjala vetëm për injorancë, mund ta ndihmojmë për hir të institucionit. Por në pazaret ku është futur, aty nuk e ndihmon dot askush, përveç atyre që e urdhërojnë të veprojë kështu.

Qytetarët e Shtimes meritojnë institucione që punojnë me përgjegjësi, profesionalizëm dhe respekt për ligjin, ashtu siç është ekzekutivi.

19/06/2026

🇩🇪🇽🇰 Kryetari Dr. Qemajl Aliu pret në vizitë zyrtare ambasadorin gjerman, z. Rainer Rudolph.

18/06/2026

Faleminderit të gjithë qytetarëve të Republikës, brenda dhe jashtë Kosovës për edhe një fitore madhështore dhe bindëse!

17/06/2026

Faleminderit, Mërgatë e Shtimes!❤️

Votat e ardhura nga diaspora vulosën edhe një herë mbështetjen e fuqishme për Lëvizjen VETËVENDOSJE!, e cila në komunën tonë arriti 76.73% të votave.

Mirënjohje për secilin bashkatdhetar që me votën dhe angazhimin e tij kontribuoi në këtë fitore të madhe për Lëvizjen VETËVENDOSJE! dhe Kryeministrin e Republikës së Kosovës, Albin Kurti.

Mbështetja juaj është forcë dhe motivim për të vazhduar përpara.

Faleminderit, Mërgatë e Shtimes!❤️

12/06/2026

Kryetari Aliu bën homazhe në Ditën e Çlirimit të Komunës së Shtimes

Në shënim të Ditës së Çlirimit të Komunës së Shtimes, kryetari Dr. Qemajl Aliu, së bashku me kabinetin qeverisës, përfaqësues të OVL-së së UÇK-së, përfaqësues së KBI në Shtime, përfaqësues së institucioneve lokale dhe qytetarë, morën pjesë në homazhe dhe vendosën lule pranë vendeve të kujtesës historike.
Homazhet filluan te shtatorja e Komandantit Legjendar Adem Jashari në Shtime dhe vijuan në Varrezat e Dëshmorëve të UÇK-së, si dhe në Reçak, Mollopolc, Rancë e Carralevë, për të nderuar sakrificën e dëshmorëve, martirëve dhe të gjithë atyre që kontribuuan në rrugën e Kosovës drejt lirisë.
Aktivitetet përkujtimore të 12 Qershorit, të organizuara nën patronatin e Kryetarit të Komunës së Shtimes, Dr. Qemajl Aliu, do të përmbyllen në ora 19:00 me koncertin festiv që do të mbahet në Shtëpinë e Kulturës në Shtime, në nderim të Ditës së Çlirimit të Komunës së Shtimes.

12/06/2026

21 vjet Lëvizje VETËVENDOSJE!

Më 12 qershor 2005 u themelua Lëvizja VETËVENDOSJE!.

Lëvizja jonë lindi në një kohë kur Kosova ishte çliruar nga Serbia, por ende nuk qeverisej plotësisht nga vullneti i popullit të saj. Prandaj, në themel të saj u vendos parimi i vetëvendosjes. E drejta demokratike e një populli për të vendosur vetë për vendin e vet.

VETËVENDOSJE! u formua si lëvizje e rezistencës politike e qytetare. Kundër arbitraritetit të administrimit të zgjatur ndërkombëtar. Kundër privatizimit të egër. Kundër korrupsionit. Kundër pabarazisë. Kundër nënshtrimit të interesit publik ndaj interesave të ngushta.

Ajo u mbështet në traditën politike të Rilindjes Kombëtare Shqiptare. Në idealin e lirisë e të bashkimit. Në rezistencën popullore për çlirim. Në sakrificën e dëshmorëve. Në luftën e drejtë të Ushtrisë Çlirimtare të Kosovës.

Nga protestat në sheshe, te organizimi në çdo lagje e fshat. Nga aksioni qytetar te përfaqësimi politik. Nga opozita te qeverisja.

Në vitin 2010, VETËVENDOSJE! hyri për herë të parë në Kuvendin e Republikës. Në vitin 2013 fitoi Prishtinën. Për herë të parë, Kryeqyteti u bë qendër e ndryshimit politik e qeverisës. Në vitin 2017 qytetarët e Prishtinës e konfirmuan atë ndryshim me një mandat të dytë dhe fituam Prizrenin.

Në vitin 2019, VETËVENDOSJE! u bë forca e parë politike në vend. Më 14 shkurt 2021, populli i Kosovës i dha fitoren më të madhe zgjedhore në historinë e Republikës. Në zgjedhjet e vitit 2025, qytetarët e konfirmuan sërish si subjektin më të madh politik në vend. Njëjtë dhe me 7 qershor 2026. Sot qeverim 7 komuna, midis tyre dhe Mitrovicën.

Këto fitore nuk erdhën rastësisht. Ato erdhën nga puna e mijëra aktivistëve. Nga besimi i qytetarëve. Nga qëndrueshmëria në parime. Nga bindja se politika duhet t'i shërbejë popullit.

Në qeverisje, Republika ka forcuar sovranitetin e saj. Ka shtrirë ligjshmërinë në çdo cep të vendit. Ka rritur mbështetjen për familjet. Për studentët. Për pensionistët. Për lehonat. Për fëmijët. Për prodhuesit vendorë.

Ushtria e Kosovës është më e fortë. Ekonomia është më e qëndrueshme. Punësimi është rritur. Eksportet kanë shënuar rritje. Investimet publike janë zgjeruar. Sundimi i ligjit është forcuar.
Për 21 vjet, VETËVENDOSJE! ka dëshmuar se Republika nuk ndërtohet për një ditë. Ajo ndërtohet çdo ditë. Me punë. Me organizim. Me dije. Me drejtësi. Me demokraci.

Sepse për ne, Republika nuk është vetëm formë shteti. Republika është barazi para ligjit.
Republika është zhvillim për të gjithë.
Republika është sovranitet popullor.
Republika është vetëvendosje.

Organizata jonë nuk njeh lodhje. Ne kemi si parim operativ punën dhe ndershmërinë. Shërbimin për idealin kombëtar dhe modelin e lëvizjeve kombëtare që ka pasur në çdo etapë historike populli shqiptar.

Horizonti ynë i veprimit është zhvillimi i pandalshëm i Kosovës dhe shqiptarëve kudo ku janë.

Ne jemi pjesë dhe vazhdimësi e historisë së përpjekjeve të popullit shqiptar. Prandaj nuk ndalemi, nuk ndalojmë.

21 vjet Lëvizje VETËVENDOSJE!
Për Republikën. Për popullin. Për të ardhmen.