02/03/2023
എൻ കെ കമലാസനൻ
മുതിർന്ന സിപിഐ നേതാവും സ്വാതന്ത്ര്യസമര സേനാനിയും എഴുത്തുകാരനുമായിരുന്ന എൻ കെ കമലാസനൻ വിട വാങ്ങിയിട്ട് ഇന്ന് ഒരുവർഷം. തിരുവിതാംകൂർ കർഷക തൊഴിലാളി യൂണിയൻ ജനറൽ സെക്രട്ടറി, മിനിമം വേജസ് കമ്മിറ്റി അംഗം, കർഷകത്തൊഴിലാളി ഫെഡറേഷൻ കോട്ടയം ജില്ലാ സെക്രട്ടറി, പ്രസിഡന്റ്, കർഷകത്തൊഴിലാളി ഫെഡറേഷൻ സംസ്ഥാന എക്സിക്യൂട്ടീവ് കമ്മിറ്റി അംഗം, സിപിഐ കുട്ടനാട് മണ്ഡലം സെക്രട്ടറി, ആലപ്പുഴ ജില്ലാ എക്സിക്യൂട്ടീവ് അംഗം, കോട്ടയം ജില്ലാ എക്സിക്യൂട്ടീവ് അംഗം എന്നീ നിലകളിൽ പ്രവർത്തിച്ചിരുന്നു അദ്ദേഹം.
1931 ജനുവരി 26ന് കുട്ടനാട് താലൂക്കിൽ കണ്ണാടി ഗ്രാമത്തിൽ നടുവത്തുശേരിൽ വേലായുധൻ കൃഷ്ണന്റെയും കുഞ്ഞിപ്പെണ്ണിന്റെയും മകനായി ജനിച്ച കമലാസനൻ പുളിങ്കുന്ന് ഗവ പ്രൈമറി സ്കൂളിലും സെന്റ് ജോസഫ്സ് ഇംഗ്ലീഷ് സ്കൂളിലും പഠിച്ചു. പുളിങ്കുന്ന് സെന്റ് ജോസഫ് ഇംഗ്ലീഷ് ഹൈസ്കൂളിൽ വിദ്യാർഥിയായിരിക്കെ 1945,46,47 വർഷങ്ങളിൽ സ്വാതന്ത്ര്യസമര പ്രക്ഷോഭത്തിൽ പങ്കെടുത്തു. വിദ്യാർത്ഥി സംഘടനയായ വിദ്യാർത്ഥി കോൺഗ്രസിൽ സജീവമായി പ്രവർത്തിച്ച് അറസ്റ്റ് വരിച്ച് എട്ടുമാസവും 13 ദിവസവും ജയിലിൽ കിടന്നു. അതോടെ സ്കൂളിൽ നിന്നും പിരിച്ചുവിട്ടു. സംസ്ഥാനത്ത് ഒരു സ്കൂളിലും പഠിപ്പിക്കാൻ പാടില്ലെന്ന് സർക്കാരിന്റെ നിരോധന ഉത്തരവ് വന്നതോടെ ഔദ്യോഗിക വിദ്യാഭ്യാസം അവസാനിച്ചെങ്കിലും പ്രൈവറ്റ് ആയി പഠനം തുടർന്നു. കോൺഗ്രസിന്റെ ഭരണകാലത്ത് വിദ്യാർത്ഥികളെ ലാത്തിച്ചാർജ് ചെയ്തതിൽ പ്രതിഷേധിച്ച് മങ്കൊമ്പിൽ ഒരു പരിപാടിയിൽ പങ്കെടുക്കാൻ വന്ന മുഖ്യമന്ത്രി പട്ടം താണുപിള്ളയെ കരിങ്കൊടി കാണിച്ചു പൊലീസ് പിടിയിലായി. കൊടിയ മർദ്ദനവും കേസും ഇതിന്റെ ഭാഗമായി. 1950ൽ കമ്മ്യൂണിസ്റ്റ് പാർട്ടിയിൽ ചേർന്ന് കർഷകത്തൊഴിലാളി രംഗത്ത് പ്രവർത്തനം ആരംഭിച്ചു. പിന്നീട് തിരുവിതാംകൂർ കർഷക തൊഴിലാളി യൂണിയൻ ജനറൽ സെക്രട്ടറിയായി 14 വർഷം പദവിയിൽ തുടർന്നു. നിരവധി കർഷകത്തൊഴിലാളി സമരങ്ങളിൽ പങ്കെടുക്കുകയും ജയിലിൽ കിടക്കുകയും ചെയ്തു. 1955ൽ വെള്ളിസ്രാക്കൽ സമരത്തിൽ പങ്കെടുത്ത അദ്ദേഹം ആക്ഷൻ കമ്മിറ്റി ജോയിൻറ് സെക്രട്ടറിയുമായി. വിമോചന സമരക്കാരുടെ ആക്രമണത്തിൽ അദ്ദേഹത്തിന് പരിക്കേറ്റിരുന്നു. 1960 മുതൽ കർഷകത്തൊഴിലാളികളുടെ മിനിമം കൂലി നിശ്ചയിച്ചിരുന്ന മിനിമം വേജസ് കമ്മിറ്റിയിൽ അംഗമായി. 1965 കുട്ടനാട് സപ്ലൈ ഓഫീസ് കേന്ദ്രീകരിച്ച് ഗവൺമെന്റ് രൂപീകരിച്ച പോപ്പുലർ കമ്മിറ്റിയുടെ ചെയർമാൻ ആയിരുന്നു. 1970 ൽ സ്വാതന്ത്ര്യസമരസേനാനികൾക്കുള്ള പെൻഷൻ അദ്ദേഹത്തിന് അനുവദിച്ചു. 1972 മുതൽ കോട്ടയം ജില്ലാ കർഷകത്തൊഴിലാളി ഫെഡറേഷൻ ജില്ലാ സെക്രട്ടറിയും പിന്നീട് പ്രസിഡന്റുമായിരുന്നു. കുട്ടനാട്ടിലെ കാർഷിക മേഖലയിലെ പ്രക്ഷുബ്ദ്ധമായ സമര ചരിത്രത്തെ ആധുനിക ലോകത്തെ പുതിയ തലമുറക്ക് പാഠ്യവിഷയമാക്കിയ ചരിത്രകാരനായിരുന്നു അദ്ദേഹം. കുട്ടനാടൻ മേഖലയിൽ അടിമ തുല്യമായ ജീവിതം നയിച്ചിരുന്ന അടിയാന്മാരായ ജനങ്ങളെ ആധുനിക ലോകത്തെ സ്വതന്ത്ര പൗരന്മാരാക്കുന്നതിനും അവകാശബോധമുള്ള തൊഴിലാളികളാക്കിമാറ്റുന്നതിനും യുവത്വത്തിന്റെ നല്ലൊരുപങ്ക് മാറ്റിവെച്ച എൻ. കെ കമലാസനൻ തന്റെ പുസ്തകങ്ങളിലൂടെ കൂടുതൽ ശ്രദ്ധേയനായി. നിരവധി അവാര്ഡുകളും നേടിയ അദ്ദേഹത്തിന്റെ കുട്ടനാടും കര്ഷക തൊഴിലാളി പ്രസ്ഥാനവും എന്ന പുസ്തകത്തിലെ ചില ഭാഗങ്ങള് എട്ടാം ക്ലാസിലെ സാമൂഹിക ശാസ്ത്ര പാഠപുസ്തകത്തില് ചേര്ത്തിട്ടുണ്ട്.
കോട്ടയത്തെയും കുട്ടനാടന് മേഖലയിലെയും പാര്ട്ടിക്കും ബഹുജന പ്രസ്ഥാനങ്ങള്ക്കും തീരാനഷ്ടമാണ് അദ്ദേഹത്തിന്റെ മരണത്തിലൂടെ ഉണ്ടായത്. സ്വാതന്ത്ര്യവും ജനാധിപത്യവും ഭരണഘടനയും വലിയ വെല്ലുവിളി നേരിടുന്ന വർത്തമാന കാലഘട്ടത്തിൽ സഖാവ് എൻ.കെ. കമലാസനന്റെ ഓർമകൾ പുതുതലമുറക്ക് കരുത്ത്പകരുന്നതാണ് .
അഡ്വ വി ബി ബിനു
സെക്രട്ടറി, സിപിഐ ജില്ലാ കൗണ്സില്
