03/05/2026
ليوم كنت نشوف في الفيديو تاع مجموعة ميكانيك العلمة مع الشخص الذي اشترى له دراجة جديدة ووريتو لأمي وسقساتني السؤال اللي راه عند بزاف ناس، من وين راهم يجيبو دراهم باش يقدرو يديرو هك؟ المنشور هذا رح نشرح فيه الاستراتيجية تاع المحتوى اللي تطبقها المجموعة وهي استراتيجية عبقرية
قبل شهرين أو ثلاثة بديت نعاود نكونيكتي ف الفايسبوك والمجموعات الجزايرية بعد انقطاع لمدة ثلاث سنوات، و خرجلي وحد نهار فيديو تاعهم GME - groupe mecanique el eulma ولقيت روحي فوت أكثر من ساعتين نشوف في فيديوهاته ومنبهر بالاستراتيجية تاع المحتوى تاعو اللي مبنية على فكرة بسيطة، لكنها قوية جدا في التسويق بالمحتوى، تشبه نوعا ما لواش يقدم هرموزي ولكن في مجال آخر.
الصفحة أو الورشة اللي متأكد أن اغلبكم تعرفوها الزبون المثالي تاعها ماهوش أصحاب السيارات العادية أو القديمة، الزبون تاعهم هو أصحاب السيارات الفاخرة اللي يتجاوز سعرها المليار.. ناس high ticket قادرين يصرفو الملايين بسهولة على سياراتهم.
منطقيا كي تخمم لوكان كنت مكانهم تقول أن المحتوى لي لازم نديرو باش نجذب هاذو الزبائن لازم يكون محتوى حول السيارات الفاخرة.. بصح هوما ما داروش هذا واخذو طريق أخرى إسمها محتوى حصان طروادة.
في أغلب المحتوى تاعهم لو تشوف تلقى أنها فيديوهات عفوية في الطريق وين مثلا يلقى صاحب سيارة قديمة طايحة اونبان، يعاونو باش يصلحها مجانا ،أو شخص فقير عندو دراجة قديمة شرالو كوستيم ودراجة جديدة مجانا ومن دون مقابل..
الفيديوهات هذه تجيب ملايين من المشاهدات، عشرات الالاف من الناس يشاركو كل فيديو وين تقريبا كل الجزاير رايحة تشوفو لأنها تحفز مشاعر مميزة ويبغوها البشر
الكرم ،المساعدة ،التعاطف..
أمور تخلي ال engagement مرتفع بزاف وال reach يصل إلى الملايين بسهولة
في هاذوك الملايين رايح يكون فيهم عشرات الالاف من الأثرياء اللي هوما الزبون المستهدف، اللي أنفسهم رح يعجبون بالصفحة ويبقاو يتبعو المحتوى تاعها اللي مرة على مرة يبينو فيه بلي عندهم ورشات تاع تصليح سيارات فاخرة
مع الوقت راهي تتبنا عند هادي النسبة الصغيرة (مقارنة بالملايين) ثقة في صاحب المحتوى، ونهار السيارة الفاخرة تاعهم يحصل لها مشكل، رايح أول شخص يفكرو فيه هو الصفحة هاذي ويتواصلو معها مباشرة ويكونو مستعدين يخلصو اي سعر يطلبه تقريبا لأنه بنا داخلهم ثقة كبيرة بزاف..
