07/09/2026
#رسالة مؤثرة لعلها تصل.....
اليوم رحت أجيب بنتي من المدرسة...
وقفت ع باب المدرسة وانحرق قلبي حرق.
ولاد صغار يا حرام، حاملين كتبهم بكياس خضرة او تبعات الخبز، بدل الشنته.
قربت على ولد منهم قلت له: حبيبي وين شنتتك؟
قام قلي وهو مستحي: بس الله يفرجها ع أبوي، بدو يجيبلي شنته وصدرية.
بهاللحظة كانت مارقة المعلمة، قالتلي: يا ريت ، اذا عندك شنته قديمة لو صدرية قديمة جيبها، عندنا بالمدرسة كثير ولاد أهاليهم على قد حالهم وما معهم حق شنته. ومنهم يتامى كمان... 😢
يا جماعة الخير يا أهل حوران يا أهل النخوة...
أكيد كل واحد منا ببيته في شنته قديمة مركونة، صدرية صغرت على ابنه، مقلمة زيادة، قلم، دفتر...
الشغلة اللي احنا شايفينها ولا شي، هي عند هالولاد حلم.
مو شرط جديد، الله وكيلكم لو قديم ومغسول ونظيف حطوه بكيس وودوه لأقرب مدرسة .
والي الله منعم عليه وبيقدر يجيب جديد، الله يجبر بخاطره مثل ما جبر خاطر هالولاد المساكين.
خلنا نسترهم، خلنا نفرحهم مع أول هالسنة.
مروا على المدارس اسألوا المدير، اسألوا المعلمة، وهما بيدلوكم.
الدال على الخير كفاعله، انشروها وذكروا الناس، ونيال فاعل الخير عند رب العالمين.
#حوران
