07/08/2026
സേവനവും ദീർഘവീക്ഷണവുമാണ് നേതൃത്വത്തിന്റെ യഥാർഥ ശക്തി: ഡോ. അബൂബക്കർ കുറ്റിക്കോൽ
ദുബൈ: സമൂഹത്തോടുള്ള പ്രതിബദ്ധതയും ദീർഘവീക്ഷണത്തോടെയുള്ള പ്രവർത്തനശൈലിയുമാണ് ഒരു മികച്ച നേതൃത്വത്തിന്റെ യഥാർഥ അടയാളങ്ങളെന്ന് പ്രമുഖ വ്യവസായിയും സേഫ് ലൈൻ ഗ്രൂപ്പ് ഓഫ് കമ്പനീസ് മാനേജിംഗ് ഡയറക്ടറുമായ ഡോ. അബൂബക്കർ കുറ്റിക്കോൽ അഭിപ്രായപ്പെട്ടു.
ദുബൈ കെ.എം.സി.സി കാസർഗോഡ് ജില്ലാ കമ്മിറ്റി സംഘടിപ്പിച്ച “ടോക്ക് ടൈം വിത്ത് ലീഡർ” പരിപാടിയിൽ സംസാരിക്കുകയായിരുന്നു അദ്ദേഹം.
കാലത്തിന്റെ മാറ്റങ്ങൾ മനസ്സിലാക്കി സംഘടനാ പ്രവർത്തനങ്ങളിൽ പുതിയ ആശയങ്ങൾ ഉൾപ്പെടുത്തുകയും, യുവതലമുറയെ പരിശീലനത്തിലൂടെ ഉത്തരവാദിത്തമുള്ള നേതൃത്വമായി വളർത്തിയെടുക്കുകയും ചെയ്യേണ്ടത് ഓരോ സംഘടനയുടെയും പ്രധാന ദൗത്യമാണെന്ന് അദ്ദേഹം പറഞ്ഞു.
വ്യക്തികേന്ദ്രീകൃത പ്രവർത്തനങ്ങൾക്ക് പകരം കൂട്ടായ പരിശ്രമത്തിനും ടീം വർക്കിനും പ്രാധാന്യം നൽകുമ്പോഴാണ് സംഘടനകൾക്ക് സുസ്ഥിരമായ വളർച്ചയും സമൂഹത്തിൽ ശക്തമായ വിശ്വാസ്യതയും നേടിയെടുക്കാൻ കഴിയുകയെന്നും അദ്ദേഹം കൂട്ടിച്ചേർത്തു.
സേവന മനോഭാവവും സാമൂഹിക ഉത്തരവാദിത്തവും ഉയർത്തിപ്പിടിക്കുന്ന സംഘടനകൾക്കാണ് കാലത്തിന്റെ വെല്ലുവിളികളെ ഫലപ്രദമായി നേരിടാനും സമൂഹത്തിന് ഉപകാരപ്പെടുന്ന മാതൃകാപരമായ പ്രവർത്തനങ്ങൾ കാഴ്ചവയ്ക്കാനും സാധിക്കുക. പ്രവർത്തകരുടെ തുടർച്ചയായ പഠനം, നേതൃത്വ പരിശീലനം, പുതിയ തലമുറയുടെ പങ്കാളിത്തം എന്നിവ സംഘടനകളുടെ ഭാവി കരുത്തുറ്റതാക്കുന്ന പ്രധാന ഘടകങ്ങളാണെന്നും ഡോ. അബൂബക്കർ കുറ്റിക്കോൽ വ്യക്തമാക്കി.
ചടങ്ങിൽ ദുബൈ കെ.എം.സി.സി കാസർഗോഡ് ജില്ലാ കമ്മിറ്റിയുടെ സ്നേഹോപഹാരം ഡോ. അബൂബക്കർ കുറ്റിക്കോലിന് സമർപ്പിച്ചു. ജില്ലാ കമ്മിറ്റിക്ക് വർഷങ്ങളായി നൽകിവരുന്ന പിന്തുണയ്ക്കും സംഘടനാ പ്രവർത്തനങ്ങൾക്ക് നൽകുന്ന വിലപ്പെട്ട മാർഗനിർദേശങ്ങൾക്കും ആദരസൂചകമായാണ് ഉപഹാരം നൽകിയത്. ദുബൈ കെ.എം.സി.സി സെക്രട്ടറിയും ലീഗൽ സെൽ ചെയർമാനുമായ അഡ്വ. ഇബ്രാഹിം ഖലീൽ ഉപഹാരം കൈമാറി.
ദുബൈ പ്രൈം ടവറിൽ നടന്ന പരിപാടിയിൽ ജില്ലാ പ്രസിഡന്റ് സലാം കന്യപ്പാടി അധ്യക്ഷത വഹിച്ചു. ജില്ലാ ജനറൽ സെക്രട്ടറി ഹനീഫ് ടി.ആർ. സ്വാഗതം പറഞ്ഞു.
വൈസ് പ്രസിഡന്റ് അബ്ദുല്ല അരങ്ങാടി, സെക്രട്ടറിമാരായ അഫ്സൽ മേട്ടമ്മൽ, സുബൈർ അബ്ദുല്ല, ആസിഫ് ഹൊസങ്കടി തുടങ്ങിയവർ സംബന്ധിച്ചു. ജില്ലാ ട്രഷറർ ഡോ. ഇസ്മായിൽ മൊഗ്രാൽ നന്ദി പറഞ്ഞു
