31/08/2024
پبلک اگاہی ۔۔۔۔
یہ سانپ غور سے دیکھیے۔ یہ سانپ سنگ چُور (کامن کریٹ) کہلاتا ہے اور ہمارے ملک کے تمام حصوں میں سب سے زیادہ پایا جانے والا اور انتہائی زہریلا سانپ ہے۔ اس کے نام کا تمثیلی مطلب یہ ہے کہ اس کا خطرناک زہر پتھر بھی چکنا چُور کرسکتا ہے۔ ہمارے ملک کے چار سب سے زہریلے سانپوں ( بگ فور) میں سے ایک ہے جس کے ڈسنے سے سب سے زیادہ اموات ہوتی ہیں۔ یہ سانپ اس حوالے سے انسانوں کے لیے سب سے زیادہ خطرناک ہے کہ انسانی آبادیوں میں کثرت سے پایا جاتا ہے اور ناگ اور وائپر کی طرح پھنکار کر ڈرائے بغیر خاموشی سے ڈستا ہے اور سب سے خطرناک بات یہ ہے کہ اس کے کاٹنے سے بہت معمولی سی چبھن ہوتی ہے اور اکثر ڈسے گئے شخص کو پتا ہی نہیں چلتا۔ نتیجہ یہ ہے کہ جب تک پتا چلے، بہت دیر ہوچکی ہوتی ہے اور انسان کی زندگی بچانا بہت مشکل ہوجاتا ہے۔ اس سانپ کی ایک اور خطرناک عادت یہ ہے کہ یہ رات کو اپنے ٹھکانے سے باہر نکلتا ہے اور زیادہ تر اناج کے گوداموں، مویشیوں کے باڑوں میں جانے والے انسان اور کھیتوں میں پانی لگانے والے کسان اس کا نشانہ بنتے ہیں۔تاہم زیادہ تر ہلاکتوں کی وجہ یہ ہے کہ سنگ چُور، بلکہ ناگ اور وائپر جیسے زہریلے سانپوں کا کاٹنے کا علاج بھی دیسی ٹوٹکوں سے کرنے کی کوشش کی جاتی ہے۔بدقسمتی سے ہم اس اکیسویں صدی میں بھی انیسویں صدی کی جہالت ترک کرنے کو تیار نہیں ہیں۔ حالاں کہ اب تو لوگوں کو سمجھ آجانا چاہیے اور ایسے جاہلانہ طریقوں سے غریبوں کی زندگی سے کھیلنا بند کردینا چاہیے۔ اب تو سب جانتے ہیں کہ ایک سو میں سے صرف بیس پچیس فیصد سانپ زہریلے ہوتے ہیں اور ان کا علاج صرف تریاق (اینٹی وینم سیرم) کا جلد ازجلد انجکشن ہے۔ کسی بابے کے دم کرنے یا نام نہاد جوگی کے زہر چوسنے اور چیرا لگاکر زہریلا خون نکالنے کے طریقے سے وہی لوگ بچ پاتے ہیں جنھیں غیر زہریلے سانپ نے ڈسا ہو یا کوبرا جیسے سانپ نے ڈرائی اٹیک ( بغیر زہر کے ڈسنا) کا نشانہ بنایا ہو۔ ایسے لوگوں کی زندگی کو کوئی خطرہ نہیں ہوتا جب کہ زہریلے سانپ کے ڈسے مریض سنیاسی بابوں اور جوگیوں کی ان شعبدہ بازیوں کے باوجود مرجاتے ہیں اور لوگ یہ کہہ کر انھیں دفنادیتے ہیں کہ جو خدا کی مرضی۔ حالاں کہ زہریلے سانپ کے ڈسنے پر مریض کو جلد ازجلد ہسپتال پہنچا کر اس کی جان بچائی جاسکتی ہے۔
