Policia Bashkiake Durrës

30/07/2026

Vijon puna për lirimin e parcelave të plazheve publike, me qëllim rikthimin e tyre në shërbim të qytetarëve dhe pushuesve.

Gjatë ditës së sotme, aksioni u zhvillua në sektorin Rinia, në bashkëpunim me përfaqësues të Agjencisë Rajonale të Bregdetit (ARB), Agjencisë së Parqeve Urbane (APU) dhe Ndërmarrjes së Shërbimeve Komunale (NSHK).

👮 Gjatë kontrolleve në terren u konstatuan çadra, shezlongë dhe pajisje të tjera plazhi të vendosura në kundërshtim me ligjin.
Menjëherë u morën masat për heqjen dhe largimin e tyre, duke rikthyer këto hapësira në funksion të qytetarëve dhe pushuesve.

Puna në terren do të vijojë edhe në ditët në vijim, me angazhim të plotë për garantimin e zbatimit të ligjit dhe mbrojtjen e hapësirave publike për të gjithë.

29/07/2026

📢 NJOFTIM

Në zbatim të Urdhrit nr. 314, datë 28.07.2026, "Mbi organizimin e pezullimit të përkohshëm të punimeve ndërtimore në Bashkinë Durrës gjatë sezonit turistik", Policia Bashkiake Durrës njofton se gjatë periudhës 01.08.2026 – 31.08.2026 do të monitorojë në terren dhe do të marrë masa administrative ndaj çdo subjekti apo individi që nuk respekton detyrimet e përcaktuara në këtë urdhër.

Përgjatë kësaj periudhe do të zbatohet pezullimi i përkohshëm i punimeve ndërtimore në akset turistike përgjatë kufirit prej 300 metrash linear nga vija bregdetare, duke përfshirë qytetin e Durrësit dhe Njësitë Administrative Rrashbull, Ishëm, Sukth dhe Katund i Ri.

Nga ky pezullim përjashtohen:
• punimet e brendshme (rifiniturat brenda objekteve);
• punimet që kryhen në zbatim të lejeve për strukturat e shërbimit në stacionet e plazhit, sipas lejeve të miratuara nga AZHT;
• punimet që realizohen në kuadër të kontratave të shërbimeve publike në territorin e Bashkisë Durrës.

Policia Bashkiake fton të gjitha subjektet e ndërtimit, investitorët dhe qytetarët të respektojnë këtë urdhër dhe të bashkëpunojnë me strukturat e kontrollit. Respektimi i këtyre masave është një kontribut i drejtpërdrejtë për garantimin e rendit, sigurisë dhe mbarëvajtjes së sezonit turistik, duke krijuar një mjedis më të qetë dhe më mikpritës për banorët dhe vizitorët e qytetit.

29/07/2026

📍 Policia Bashkiake Durrës, në bashkëpunim me Agjencinë Rajonale të Bregdetit (ARB), Agjencinë e Parqeve Urbane (APU) dhe Ndërmarrjen Shërbime Komunale (NSHK), zhvilloi sot një aksion për lirimin e hapësirave plazh publik në zonën e Gjirit të Lalzit.

👮 Gjatë kontrolleve në terren u konstatuan çadra, shezlongë dhe pajisje të tjera plazhi të vendosura në kundërshtim me hartën e miratuar nga ministria, për administrimin e plazheve publike. Menjëherë u morën masat për heqjen dhe largimin e tyre, duke rikthyer këto hapësira në funksion të qytetarëve dhe pushuesve.

📢 Policia Bashkiake Durrës u bën thirrje të gjitha subjekteve dhe individëve të respektojnë legjislacionin në fuqi dhe të mos zënë apo shfrytëzojnë në mënyrë të paligjshme hapësirat e plazheve publike për qëllime private. Çdo shkelje do të trajtohet në përputhje me legjislacionin në fuqi.

🤝 Të kontribuojmë së bashku për një bregdet të rregullt, të pastër dhe të sigurt, duke respektuar hapësirat publike dhe të drejtën e çdo qytetari për t'i shfrytëzuar ato.

20/07/2026

📊 Bilanci i veprimtarisë së Policisë Bashkiake Durrës | Prill – Korrik 2026

Gjatë periudhës prill–korrik 2026, Policia Bashkiake Durrës ka intensifikuar kontrollet dhe shërbimet në terren, me fokus garantimin e rendit administrativ, mbrojtjen e hapësirave publike, disiplinimin e qarkullimit rrugor dhe rritjen e cilësisë së shërbimit ndaj qytetarëve.

📞 Ankesa të ardhura nga qytetarët:

✅ 815 telefonata të trajtuara nga Salla Operative;
✅ 511 ankesa të administruara përmes aplikacionit "Hapësira Ime Publike";
✅ 11 ankesa të trajtuara përmes Portalit të Bashkëqeverisjes;
✅ 8 ankesa dhe kërkesa të administruara përmes postës elektronike;
✅ 68 kërkesa dhe ankesa të trajtuara përmes korrespondencës zyrtare.

🚔 Masat administrative të vendosura
• 11.777 masa për shkelje të rregullave të qarkullimit rrugor;
• 538 masa për shkelje të Urdhrit nr. 246, datë 22.06.2026, "Mbi organizimin e planit të lëvizjes së automjeteve në qytetin e Durrësit ne kuader te sezonit turistik, për periudhën 01.07.2026-31.08.2026";
• 309 masa për zënie të paligjshme të hapësirave publike;
• 39 masa për ndotje të mjedisit dhe administrim të mbetjeve;
• 9 masa ndaj tregtarëve ambulantë të paautorizuar;
• 2 masa për ndërtime pa leje;
• 2 masa për dëmtim të infrastrukturës rrugore.

🏖️ Gjatë sezonit turistik u monitoruan vendbazimet e plazhit, u liruan 15 parcela plazhesh publike të zëna në mënyrë të paligjshme dhe u morën masa administrative ndaj subjekteve që nuk respektuan detyrimet ligjore për sigurinë në plazh.

🤝 Policia Bashkiake Durrës mbetet e angazhuar për një qytet më të sigurt, më të pastër dhe më të rregullt, duke bashkëpunuar ngushtë me qytetarët dhe institucionet në mbrojtje të interesit publik.

📲 Për të raportuar problematika ose për të kërkuar ndërhyrjen e Policisë Bashkiake Durrës, qytetarët mund të kontaktojnë përmes:
☎️ Sallës Operative: +355 52 232 250
📧 [email protected]
📱 Aplikacionit "Hapësira Ime Publike"
📘 Faqes zyrtare në Facebook: Policia Bashkiake

15/07/2026

🚔 Gjatë sezonit turistik, Policia Bashkiake vijon zbatimin e masave të parashikuara në Urdhërin nr. 246, datë 22.06.2026, "Mbi organizimin e planit të lëvizjes së automjeteve në qytetin e Durrësit", i cili është në fuqi nga data 01.07.2026 deri më 31.08.2026.

👉Me qëllim riorganizimin e qarkullimit dhe garantimin e një lëvizjeje sa më të sigurt dhe të rregullt të mjeteve të transportit të përzier (ATP), shërbimet e Policisë Bashkiake ushtrojnë çdo ditë kontrolle në terren për monitorimin dhe kontrollin e tyre.

📌Në çdo rast të konstatimit të shkeljeve, ndaj subjekteve që nuk respektojnë detyrimet e përcaktuara merren masat administrative me gjobë.

👉Ju ftojmë të gjithë të bashkëpunoni duke respektuar sinjalistikën dhe udhëzimet e autoriteteve. Vetëm me përgjegjësi të përbashkët mund të sigurojmë një sezon turistik të qetë dhe një qarkullim të rregullt për të gjithë. 🤝

30/06/2026

🚦 NJOFTIM PËR KUFIZIMIN E QARKULLIMIT NË QYTETIN E DURRËSIT

Për të përmirësuar qarkullimin e automjeteve dhe për të menaxhuar fluksin e lartë të trafikut gjatë sezonit veror, nga 1 korriku deri më 31 gusht 2026 do të zbatohen kufizime të përkohshme të lëvizjes për automjetet e transportit në disa nga rrugët kryesore të qytetit të Durrësit.

🔹 Automjetet ATP (transport i përzier) deri në 3.5 ton:
🗓️ E hënë – e premte: ⏰ 09:00–13:00 dhe 16:00–22:00
🗓️ E shtunë: ⏰ 09:00–22:00
🗓️ E diel: ⛔ Ndalim qarkullimi ⏰ 24:00.

🔹 Automjetet e transportit mbi 3.5 ton:
🗓️ E hënë – e shtunë: ⏰ 08:00–22:00.
🗓️ E diel: ⛔ Ndalim qarkullimi ⏰ 24:00.

📍 Kufizimi i qarkullimit do të zbatohet në:
Rrugën "Adria", "Dëshmorëve", "Aleksandër Goga" (nga Drejtoria Vendore e Policisë deri te Prefektura), bulevardet "Dyrrah" dhe "Epidamn", si dhe rrugët "Taulantia", "Currila", "Egnatia", "Mars 91 ", "Hysen Kërtusha", "Mujo Ulqinaku", "Glaukia", "Stefan Kaçulini", "Pavarësia" dhe rruga dytësore Plepa – Përroi i Agait.

🤝 Ftojmë të gjithë drejtuesit e mjeteve të respektojnë këto kufizime dhe sinjalistikën rrugore, duke kontribuar në një qarkullim më të sigurt dhe më të lehtë për qytetarët dhe vizitorët gjatë sezonit turistik.

29/06/2026

📢 NJOFTIM

🌇 Për t'i dhënë qytetit një atmosferë më të sigurt dhe më të këndshme gjatë sezonit turistik, nga 📅 1 korriku deri më 31 gusht 2026, çdo mbrëmje nga 🕕 ora 19:00 deri në 23:00, Bulevardi "Epidamn" do të kthehet në një hapësirë tërësisht 🚶‍♀️🚶‍♂️ pedonale.

🚗 Për të lehtësuar qarkullimin gjatë këtij orari, do të zbatohen disa ndryshime në lëvizjen e automjeteve. Rrugët "Karl Topia" dhe "Gjergji Komnino" do të funksionojnë me ➡️ një sens lëvizjeje në drejtim të Vilës së Zogut, ndërsa rrugët "Telha Çela" dhe " 11 Dëshmorët e Stanit" do të jenë me ⬅️ një sens lëvizjeje zbritje në drejtim të Muzeut të Dëshmorëve.

⛔ Gjithashtu, nga 🕖 ora 19:00 deri në 23:00, do të ndalohet parkimi i automjeteve në rrugët si më poshtë si vijon:

📌Rruga "Anastas Durrsaku" me segment lëvizje nga Kisha Ortodokse deri te Shkolla "Gjergj Kastrioti";

📌Rruga"Karl Topia" dhe "Gjergji Komnino";

📌 Rruga "Hysen Matlija".

🤝 Këto masa synojnë të përmirësojnë qarkullimin, të rrisin sigurinë dhe t'u ofrojnë qytetarëve dhe vizitorëve mundësinë të shijojnë shëtitjen në zemër të Durrësit gjatë mbrëmjeve verore. 🌊✨

13/06/2026

11/06/2026

👮‍♂️ Policia Bashkiake Durrës, në bashkëpunim me Ndërmarrjen e Shërbimeve Komunale (NSHK), po zhvillon njoftime dhe takime informuese pranë subjekteve private në të gjithë territorin e Bashkisë Durrës, me qëllim ndërgjegjësimin dhe zbatimin e detyrimeve ligjore për administrimin e mbetjeve.

📌 Në zbatim të VKB nr. 41, datë 09.05.2022, “Për miratimin e Rregullores së Administrimit të Mbetjeve në Bashkinë Durrës”, rikujtojmë se çdo subjekt privat, si restorante, bar-kafe, njësi tregtare dhe aktivitete të tjera shërbimi, është i detyruar të mbajë vazhdimisht të pastër ambientin ku ushtron aktivitetin, si dhe hapësirat publike përreth.

♻️ Subjektet duhet të sigurojnë që pas përfundimit të shërbimit të mos mbetet asnjë lloj mbetjeje në hapësirat publike dhe të shmangin hedhjen e mbetjeve jashtë vendeve të përcaktuara për këtë qëllim.

🤝 Respektimi i këtyre detyrimeve kontribuon në një qytet më të pastër, më të sigurt dhe më mikpritës për të gjithë qytetarët dhe vizitorët.