15/10/2022
🔸️🔸️🔸️Արտաշատ համայնքի ղեկավար Կառլեն Մկրտչյանի շնորհավորական ուղերձը՝ Արտաշատի հիմնադրման 2211-ամյակի առթիվ
Արտաշատ համայնքի սիրելի՛ բնակիչներ
Այսօր լրանում է Արտաշատի հիմնադրման 2211-ամյակը, ինչի առթիվ ջերմորեն շնորհավորում եմ բոլորիս:
Հիրավի մեծ պատիվ ու հպարտություն է ապրել մի համայնքում, որը երբեմնի հզոր ու զարգացած մայրաքաղաքի, ժամանակի ամենահայտնի քաղաքներից մեկի՝ հինավուրց Արտաշատի իրավահաջորդը, նրա անվան ու անցած պատմական ուղու կրողն է։
Վստահ եմ, որ բոլոր արտաշատցիների համար թանկ ու հարազատ է մեր մեծ համայնքը, և բոլորիս միասնական ու նվիրական ջանքերով այն կդառնա ավելի շեն, բարեկարգ ու զարգացած բնակավայր:
Ուզում եմ վստահեցնել նաև, որ Արտաշատի համայնքապետարանն անում է ամեն ինչ՝ մեր համայնքն ավելի բարեկարգ, ներկայանալի ու գեղեցիկ դարձնելու համար: Համայնքի փողոցների բարեկարգման, բնակելի շենքերի տանիքների հիմնանորոգման, նախադպրոցական հաստատությունների, մշակութային կենտրոնների կառուցման ու նորոգման, ոռոգման համակարգի բարելավման և մյուս ոլորտներին ուղղված մեծածավալ ծրագրեր ունենք, որոնցից մի մասն արդեն հաճելի իրողություն է դարձել, մյուսներն՝ ընթացքի մեջ են: Դրանք և բոլոր այն աշխատանքները, որոնք աստիճանաբար կիրականացվեն համայնքի ողջ տարածքում, միտված են, որպեսզի դուք՝ Արտաշատ համայնքի սիրելի՛ բնակիչներ, ապրեք ավելի լավ ու զարգացած բնակավայրում:
Ցավոք, այսօր չենք կարող քաղաքի օրն ուրախ տոնակատարություններով նշել, քանի որ դարձյալ խաղաղ չեն մեր հայրենիքի սահմանները, ցավոք, մենք դարձյալ գոյության կռիվ ենք տալիս՝ կյանքի գնով պահպանելով մեր հայրենիքի ամեն մի թիզ հողը: Եվ ցավոք, ինչպես 2020 թվականին, այնպես էլ սեպտեմբերյան վերջին դեպքերի ընթացքում դարձյալ սգացինք մեր եղբայրների ու քույրերի թանկ կորուստը, այդ թվում՝ նաև մեր համայնքի: Եվ այսօր ևս մեկ անգամ խոնարհվում և փառք ենք տալիս բոլոր ընկած նահատակներին: Մենք պարտք ունենք ձեր առջև՝ արժանի լինել ձեր հիշատակին ու կառուցել ձեր երազած երկիրը, ձեր երազած համայնքը:
Տոնական այս օրը, շնորհավորանքների հետ մեկտեղ, ուզում եմ իմ և բոլոր արտաշատցիների անունից ամենից առաջ խաղաղ երկինք մաղթել մեր երկրին, բարեկեցություն ու ջերմություն՝ բոլոր օջախներին, թո՛ղ հայ ազգն այլևս որևէ ցավ ու վիշտ չտեսնի, և բոլորս ապրենք ու արարենք ուժեղ ու կայացած Հայաստանում, ուժեղ ու կայացած Արտաշատում:
Շնորհավո՛ր տոնդ, մեր հինավուրց ու նոր քաղաք, թո՛ղ դարերում հավերժ լինի երթդ:
