14/03/2025
Պետական բյուջեի միջոցներով կառուցված «Զանգակ» մանկապարտեզն իր հարկի տակ կընդունի 75 երեխայի:
Մանկապարտեզի բացման հանդիսավոր արարողությանը մասնակցել են Տարածքային կառավարման և ենթակառուցվածքների նախարար Դավիթ Խուդաթյանը, Գյումրու համայնքապետի պաշտոնակատար Սարիկ Մինասյանը, Շիրակի մարզպետ Դավիթ Առուշանյանն ու այլք:
Ողջույնի իր խոսքում Սարիկ Մինասյանը նշել է, որ Գյումրու բոլոր մանկապարտեզներն ունենալու են նույն հնարավորությունները, հագեցվելու են համապատասխան գույքով, երեխաների անվտանգության և հարմարավետության համար արվելու է առավելագույնը:
Առաջիկայում Գյումրիում 2 նոր մանկապարտեզ կկառուցվի, մեկը Բուլվարային թաղամասում, մյուսը՝ Երևանյան խճուղում:
«Ոչինչ չենք խնայելու երեխաների համար: Ավելին, 2026 թվականից Գյումրու բոլոր մանկապարտեզները դառնալու են անվճար: Որքան էլ փորձեն սա որոշ մարդիկ շահարկել, փաստն այն է, որ ես երբ դեռ ԱԺ պատգամավոր էի, այդ բարձր ամբիոնից եմ խոսել այս մասին: Մենք հստակ հաշվարկ ունենք, ամսական մոտ 15 մլն դրամ է կազմում ծախսը, որը հանրապետության երկրորդ քաղաքը կկարողանա իր երեխաների համար ապահովել: Այդ գումարները կան, տեղերը գիտենք, մեր բյուջեն ավելանալու է: Վստահ ասում եմ, որ դա հնարավոր է»,- լրագրողների հետ զրույցում ասել է Սարիկ Մինասյանը: