1940-ականների սկզբին Արաբկիր թաղամասն օրեցօր ընդարձակվում է նաև Հայաստան ներգաղթած հայրենակիցների հաշվին, և առաջանում է թաղամասում նոր դպրոց ունենալու անհրաժեշտություն: Երևանի հ.51 դպրոցը հիմնադրվել է 1949թ.:Իր գոյության 70 տարիների ընթացքում այն ունեցել է վայրէջքի ու վերելքի ժամանակահատվածներ, հյուրընկալել անվանի գիտնականների ու արվեստագետների: 2000 թվականին դպրոցն անվանակոչվել է՝ կրելով ճանաչված
գրող և հրապարակախոս Վարդգես Պետրոսյանի անունը, իսկ գրողի հարթաքանդակի հանդիսավոր բացումը կատարվել է 2006 թվականին: 2016 թվականին շահագործման է հանձնվել դպրոցի կից մասնաշենքը, որն ունի ընդարձակ, լուսավոր դասասենյակներ: 2017-2018 թթ. շահագործման հանձնվեց կից եռահարկ փոքր մասնաշենքը, ուր տեղակայվելու են ՆԶՊ, Տեխնոլոգիա առարկաների դասասենյակները, ինչպես նաև դպրոցի գրադարանը՝ ընդարձակ ընթերցասրահով: Սակայն այն չհասցրեց օգտագործվել, քանի որ ՀՀ կառավարության և Ասիական զարգացման բանկի՝ «Սեյսմիկ անվտանգության բարելավման» ծրագրի շրջանակներում սկսվեցին դպրոցի հիմնական մասնաշենքի վերակառուցման աշխատանքները: 2021 թվականի ապրիլին նախատեսված է այդ աշխատանքների ավարտը: Դպրոցական նոր շենքում առկա են կրթական ժամանակակից նորմերով սահմանված դասասենյակները, ֆիզիկայի, քիմիայի, կենսաբանության լաբորատորիաներ՝ համապատասխան սարքավորումներով ու նյութերով: Դպրոցն ունի երկու մարզադահլիճ և՛ հին, և՛ նոր մասնաշենքերում: Չափազանց կարևոր ու գնահատելի է հանդիսությունների հարմարավետ դահլիճի առկայությունը, որը մեծապես նպաստում է աշակերտների մշակութային և գեղագիտական դաստիարակության զարգացմանը: Դպրոցն այսօր ունի մոտ 1100 աշակերտ: Աշխատում են 72 ուսուցիչներ, որոնք իրենց գործի գիտակն են: Նրանցից շատերը պարգևատրվել են ոսկե մեդալներով ու պարգևներով: Դպրոցն իր հիմնադրման օրից առ այսօր ղեկավարել են 12 տնօրեններ: 2019 թվականի ապրիլից դպրոցը ղեկավարում է Լուսինե Ղասաբօղլյանը:
