Հոգեկան առողջության պահպանման ազգային կենտրոն

09/06/2026

Դեպրեսիան նյարդաբանական հիվանդությունների դեպքում ամենահաճախ հանդիպող ուղեկցող (կոմորբիդ) խանգարումներից մեկն է։ Բժշկի ընդունելության ժամանակ «դասական դեպրեսիվ եռյակը» ունեցող պացիենտին հաճախ դժվար չէ ճանաչել։

Սովորաբար պատկերացնում ենք մռայլ, հոռետես, ընկճված տրամադրությամբ, անքնությամբ, ախորժակի բացակայությամբ, մշտապես տառապող և կյանքից ուրախություն ստանալ չկարողացող մարդու։

Սակայն դեպրեսիայի «ատիպիկ» ձևը միշտ չէ, որ հեշտ է հայտնաբերել։

📋 Ամերիկյան հիվանդությունների դասակարգման՝ DSM-5-ի համաձայն, ատիպիկ դեպրեսիայի հիմնական տարբերակիչ առանձնահատկությունը տրամադրության արձագանքն է իրավիճակին։

Օրինակ՝ անսպասելի արձակուրդի լուրը, խանութում զեղչը, ղեկավարի գովասանքը կամ ցանկացած դրական տեղեկատվություն նույնիսկ դրա մասին երևակայելը կարող է ժամանակավորապես բարելավել մարդու հոգեկան ինքնազգացողությունը։ Մարդը որոշ ժամանակ կարող է իրեն զգալ առողջ, մինչև կրկին վերադառնա տխրության և ընկճվածության զգացումը։ Այդ պատճառով այս ձևը երբեմն անվանում են նաև «ժպտացող դեպրեսիա»։ 🎭

Բացի տրամադրության նման արձագանքից, կարևոր է նաև առնվազն երկու հետևյալ ախտանիշների առկայությունը՝

✔️ Հիպերսոմնիա` քունը օրական ավելի քան 10 ժամ, շաբաթական առնվազն 3 օր, 3 ամսից ոչ պակաս տևողությամբ։
✔️ Հիպերֆագիա (գերսնվել)՝ քաշի ավելացում, վերջին 3 ամսվա ընթացքում մոտ 3–5 կգ կամ ավելի շատ ուտելու հետևանքով։
✔️ Անձնային սենսիտիվություն` մերժման նկատմամբ բարձր զգայունություն, որը խանգարում է հասարակական և աշխատանքային լիարժեք գործունեությանը։
✔️ «Կապարե կաթված»` ձեռքերում կամ ոտքերում ծանրության կամ թուլության զգացում, օրական առնվազն 1 ժամ, շաբաթական 3 օրից ոչ պակաս, 3 ամսվա ընթացքում։

🌿 Ախտանիշների ժամանակին ընդունումն ու մասնագիտական օգնությանը դիմելը կարող են դառնալ կյանքի որակը վերականգնելու առաջին ու ամենակարևոր քայլը:

Մասնագետի հետ խորհրդատվության համար կարող եք զանգահարել հիվանդանոցի ընդունարան՝ +374 43 356100 ( 24/7)

01/06/2026

🎈 Հունիսի 1-ը` Երեխաների պաշտպանության միջազգային օրն է:

Շնորհավորում ենք մեր անգին մանուկներին՝ մաղթելով հոգեկան անդորր, անհոգ ծիծաղ ու սիրով լեցուն մանկություն։ 🕊️💖💫

🧸🌱 Այս օրը միայն խաղի ու խնդության տոն չէ, այն հիշեցում է բոլորիս, որ երեխայի լիարժեք ու առողջ մեծանալու գրավականը ոչ միայն ֆիզիկական խնամքն է, այլև նրա հոգեկան ու էմոցիոնալ առողջությունը:

Երեխայի աշխարհընկալումը ձևավորվում է այն միջավայրում, որտեղ նա ապրում է։ Մեր՝ մեծահասակներիս, ծնողների և մասնագետների մեծագույն պարտքն է ստեղծել մի աշխարհ, որտեղ յուրաքանչյուր փոքրիկ կզգա իրեն լսված, սիրված և պաշտպանված: 🏡

👨‍👩‍👧‍👦Հոգեբանական անվտանգությունը, սերն ու ընտանեկան ջերմությունն այն ամուր հիմքն են, որոնց վրա կառուցվում է ամուր, ինքնավստահ և հոգեպես կայուն անհատը։

Առանձնահատուկ շնորհակալություն եմ հայտնում մեր մասնագետներին, ովքեր ամենօրյա նվիրումով աշխատում են երեխաների և պատանիների հոգեկան բարեկեցության ապահովման, նրանց ներաշխարհի խաղաղության և հոգեբանական տրավմաների հաղթահարման ուղղությամբ։

Հոգեկան առողջության պահպանման ազգային կենտրոնի տնօրեն` Արտակ Ջումայան

31/05/2026

Նիկոտինը դեռահասների համար ավելի վտանգավոր է, քան թվում է։ 16-ամյա Գեղամը պատմում է իր փորձի և ընտրության մասին։ 🚭

29/05/2026

Հոգեկան առողջության պահպանման ազգային կենտրոնում տեղի ունեցավ հատուկ դասընթաց մեր բուժաշխատողների համար՝ «Անհետաձգելի բուժօգնություն և հիմնական կենսաապահովման հիմունքներ» թեմայով։

📚 Դասընթացը բաղկացած էր տեսական և գործնական փուլերից։ Մեր մասնագետները նախ ծանոթացան արտակարգ իրավիճակներում գործելու ժամանակակից մոտեցումներին, այնուհետև, հատուկ վարժանքների միջոցով, գործնականում ամրապնդեցին առաջին բուժօգնության ցուցաբերման և հիմնական կենսաապահովման անհրաժեշտ հմտությունները:

🧠 Դասընթացը վարեց «Սուրբ Գրիգոր Լուսավորիչ» բժշկական կենտրոնի Սիմուլյացիոն ուսումնական կենտրոնի ղեկավար, առաջին օգնության միջազգային փորձագետ Զարա Խուդոյանը։

🎯 Մեր բժիշկների և բուժաշխատողների համար նմանօրինակ դասընթացների պարբերական անցկացումն ունի ռազմավարական նշանակություն: Այն ոչ միայն բարձրացնում է անձնակազմի մասնագիտական պատրաստվածությունն ու վստահությունը ճգնաժամային իրավիճակներում, այլև ուղղակիորեն երաշխավորում է մեր պացիենտների անվտանգությունն ու խնամքի որակը:

20/05/2026

Հոգեկան առողջության պահպանման ազգային կենտրոնի տարածքում գործող Art for Art 🎨 արվեստանոցը տարիների ընթացքում դարձել է կայուն ու շարունակական ստեղծագործական միջավայր: Ամեն երեքշաբթի այստեղ տեղի է ունենում անընդհատ ստեղծագործական ընթացք․ սա ժամանակ և տարածք է, որն արդեն երկար տարիներ պատկանում է մասնակիցներին՝ ձևավորելով կայունության, ինքնարտահայտման և ներքին ազատության մթնոլորտ։

🧠 Մեր հեղինակների արվեստը համահունչ է Art Brut ուղղությանը՝ իր անկեղծությամբ և նախնական, անմիջական բնույթով։ Հոգեկան խնդիր ունեցող անձանց մոտ մարդու հոգեբանական աշխարհն ունի իր յուրահատուկ առանձնահատկությունները․ մտածողությունը հաճախ հենվում է թաքնված, ոչ ակնհայտ նշանների վրա, որոնք վառ կերպով արտահայտվում են ստեղծագործություններում։

Եթե հիվանդության ժամանակ ներքին վիճակը կարելի է համեմատել առանց ղեկավար նվագախմբի հետ, որտեղ կերպարները զուրկ են սովորական կապերից, ապա կտավը կատարում է կարևորագույն գործառույթ: Այն դառնում է այն շրջանակը, որտեղ քաոսը ձև է ստանում, իսկ անհատը՝ իր սահմանները:

🖌️ Արվեստանոցի մասնակիցներն ապահովված են ստեղծագործական աշխատանքի համար անհրաժեշտ նյութերով՝ կտավներով և ներկերով, ինչը հնարավորություն է տալիս նրանց շարունակական ստեղծագործական ընթացքի մեջ լինել և նախապատրաստվել 2027 թվականին կայանալիք ցուցահանդեսին:

👩🏻🎨 Խմբակի համակարգող՝

Նարինե Պապյան. ՄՊՀ (МГУ) կլինիկական հոգեբան, IPA հոգեվերլուծողի թեկնածու և նկարիչ:

Կարող եք հետևել մեզ` անցնելով այս հղումներով․https://www.facebook.com/mediahubamhttps://instagram.com/mediahubamhttps://t.me/mediahubamhttps://www.tiktok.com...

15/05/2026

Հոգեկան առողջության խնդիրներ ունեցող անձանց հոգեբուժական օգնությունն իրականացվում է պետության միջոցների հաշվին` պետության երաշխավորած նպատակային ծրագրերի շրջանակներում, մարդասիրության ու մարդու իրավունքների պաշտպանության հիմունքներով:

🛡️ Ի՞նչ է երաշխավորում պետությունը.

✅ անհետաձգելի հոգեբուժական օգնությունը.
✅ հիվանդանոցային և արտահիվանդանոցային պայմաններում խորհրդատվական, ախտորոշման, բուժման ու սոցիալական վերականգնման հետ կապված օգնությունը.
✅ հոգեբուժական փորձաքննության բոլոր ձևերը, ժամանակավոր անաշխատունակության որոշումը.
✅ հոգեկան առողջության խնդիրներ ունեցող անձանց սոցիալ-կենցաղային վիճակին օժանդակությունը.
✅ խնամակալությունը.
✅ իրավական հարցերով օժանդակությունը.
✅ հոգեկան առողջության խնդիրներ ունեցող հաշմանդամների սոցիալ-կենցաղային վիճակին օժանդակությունը, ուսուցումը և խնամքը.
✅ աղետների և վթարների ժամանակ հոգեբուժական օգնության կազմակերպումը:

💚 Մենք Ձեր կողքին ենք

💚 Եթե դուք կամ ձեր հարազատներից մեկը զգում է հոգեբանական աջակցության կարիք, հիշեք՝ դուք միայնակ չեք․ մեր մասնագետները պատրաստ են աջակցել և ուղեկցել ձեզ անհրաժեշտ գործընթացում։

📞 Մասնագետի հետ խորհրդատվության համար կարող եք զանգահարել հիվանդանոցի ընդունարան՝ +374 43 356100 (🕖24/7)

12/05/2026

Սեր, կյանք, նվիրվածություն ու գթասրտություն․ հենց այս արժեքներով է սկսվում իրական հոգատարությունը։ 🍀

12/05/2026

Սիրելի՛ բուժքույրեր,

Ջերմորեն շնորհավորում ենք Բուժքույրերի միջազգային օրվա առթիվ։ 💙

Դուք ամեն օր ոչ միայն իրականացնում եք ձեր մասնագիտական պարտականությունները, այլև գործնականում ապացուցում եք բուժքույրական անձնակազմի կարևոր դերն առողջապահական արդյունքների շարունակական բարելավման գործում։ Հենց ձեր ամենօրյա աշխատանքի շնորհիվ է ապահովվում այնպիսի վստահելի ու անհատակենտրոն խնամք, որն ի զորու է վերափոխել և դիմակայել առողջապահական մարտահրավերներին։

Մենք հաճախ խոսում ենք պացիենտների ցավի ու դժվարությունների մասին, սակայն նույնքան կարևոր է գնահատել նաև այն պատասխանատվությունն ու ծանրաբեռնվածությունը, որն ամեն օր կրում եք դուք։ Ձեր աշխատանքը պահանջում է ոչ միայն մասնագիտական բարձր պատրաստվածություն, այլև մեծ հուզական ուժ, համբերություն և նվիրում։ Այդ ամենի գնահատումն ու ձեր կատարած աշխատանքի հանդեպ անկեղծ շնորհակալությունը չափազանց կարևոր են։

Շնորհակալություն Ձեր մարդասիրության, տոկունության և անփոխարինելի աշխատանքի համար։ 🌸

Սիրով՝

Հոգեկան առողջության պահպանման ազգային կենտրոն

07/05/2026

Յուրաքանչյուրս էլ կյանքի ընթացքում կարող ենք հայտնվել իրավիճակներում, երբ հոգեկան ցավը թվում է անտանելի, իսկ ապագան՝ մշուշոտ: Նման պահերին կարող են հայտնվել մտքեր, որոնք կասկածի տակ են դնում կյանքի արժեքը: Կարևոր է հիշել՝ դուք մենակ չեք, և այդ զգացողությունները ժամանակավոր են:

❓Ինչպե՞ս է ձևավորվում ներքին տագնապը

Մասնագետներն առանձնացնում են ներքին ապրումների մի քանի փուլեր, որոնց ժամանակին գիտակցումը կարող է օգնել կանխելու հետագա բարդությունները.

🔹 Անտիվիտալ (կյանքը չարժևորող) ապրումներ. Սա այն վիճակն է, երբ մարդը սկսում է մտորել, որ «ապրելն անիմաստ է» կամ «դժվար է այսքան տանջվելը»: Սա դեռ գործողություն չէ, այլ հոգնածության և ներքին կոնֆլիկտի ազդանշան, որը հուշում է՝ ձեզ հոգեբանական դադար և աջակցություն է անհրաժեշտ:
🔹 Պասիվ մտքեր. Երբեմն հայտնվում են պատկերացումներ սեփական բացակայության մասին, առանց կոնկրետ քայլերի մտադրության: Սա հոգու «օգնության կանչն է»:
🔹 Ակտիվ փուլ. Երբ մարդը սկսում է լրջորեն մտածել ելքերի մասին: Սա այն կետն է, երբ մասնագիտական միջամտությունը դառնում է կենսական անհրաժեշտություն: 🆘

❓Ինչո՞ւ են առաջանում նման մտքեր

Հոգեկան ծանր վիճակը հաճախ արդյունք է արտաքին ճնշումների կամ ներքին ճգնաժամերի.

📍 Կորուստ և վիշտ. Սիրելի մարդու կորուստը կամ ընտանեկան կոնֆլիկտները կարող են ժամանակավորապես խաթարել մեր հավասարակշռությունը:
📍 Առողջական խնդիրներ. Քրոնիկ հիվանդությունները և մշտական ֆիզիկական ցավը կարող են հյուծել հոգին:
📍 Սոցիալական և տնտեսական ճնշումներ. Անհաջողությունները կարող են ստեղծել փակուղու պատրանք:

❤ Սուիցիդալ վարքը հաճախ կապված է ոչ թե մահանալու ցանկության, այլ անտանելի հոգեկան ցավը դադարեցնելու ձգտման հետ: Այդ ցավը հնարավոր է մեղմել և բուժել:

Ինչպե՞ս վերականգնվել 🌈

Նույնիսկ եթե տեղի է ունեցել ինքնավնասման փորձ, վերականգնումը հնարավոր է: Հետսուիցիդալ շրջանում շատ կարևոր է՝

✅ Քննադատական մոտեցում. Երբ մարդը գիտակցում է կատարվածի վտանգավորությունը և սկսում է նորովի արժևորել կյանքը:
✅ Աջակցող միջավայր. Հարազատների և մասնագետների ջերմ ու անկողմնակալ վերաբերմունքը կտրուկ նվազեցնում է կրկնության ռիսկը:

🤝 Եթե դուք կամ ձեր մտերիմը զգում եք, որ հուզական ապրումները դարձել են անկառավարելի, իսկ ներքին ցավը՝ անտանելի, հիշե՛ք, որ կան գործուն մեխանիզմներ այդ վիճակից դուրս գալու համար: Մեր մասնագետի հետ աշխատանքը հնարավորություն է տալիս.

• Գտնել ներքին կոնֆլիկտների լուծման այլընտրանքային տարբերակներ:
• Ստանալ անհրաժեշտ աջակցություն՝ վիճակը կայունացնելու համար:
• Վերականգնել հոգեկան հավասարակշռությունը անվտանգ և մասնագիտացված միջավայրում:

☎️ Մասնագետի հետ խորհրդատվության համար կարող եք զանգահարել հիվանդանոցի ընդունարան՝ +374 43 356100 ( 24/7)

17/01/2026

Մենք արդեն միացել ենք արյունատվության արշավին․ միացե՛ք և դուք։

🩸Նվիրիր արյուն՝ փոխիր կյանք ❤️