Անձնական տվյալների պաշտպանության գործակալություն / Armenian PDPA

01/06/2026

🎈Անձնական տվյալների պաշտպանության գործակալությունը ջերմորեն շնորհավորում է Երեխաների պաշտպանության միջազգային օրվա առթիվ:

Արդի թվային դարաշրջանում երեխաների իրավունքների պաշտպանությունը բոլորիս կոլեկտիվ պատասխանատվությունն է՝ պետության, ծնողների, կրթողների և ողջ հասարակության:

Երեխայի իրավունքների պաշտպանությունը սկսվում է նրա գաղտնիության և թվային անվտանգության հանդեպ հարգանքից։ Մեր ընդհանուր նպատակն է ստեղծել այնպիսի ապահով միջավայր, որտեղ յուրաքանչյուր երեխա կարող է վստահորեն երազել ու բացահայտել աշխարհը:

Վերոգրյալի համատեքստում, Գործակալության կողմից նախկինում մշակվել են երեխաների վերաբերյալ անձնական տվյալների մշակման թեմայով ուղեցույցներ, որոնք նախատեսված են աջակցելու պետական մարմիններին, կրթական հաստատություններին, մասնագետներին, լրատվամիջոցներին և այլ դերակատարներին՝ այս հարցերում առավել զգույշ և իրավաչափ գործելու համար։

Մաղթում ենք մեր մանուկներին խաղաղ, ժպիտներով ու անվտանգությամբ լեցուն մանկություն:

Ուղեցույցները հասանելի են հետևյալ հղումներով

1.https://pdpa.am/public/uploads/12.pdf
2.https://pdpa.am/public/uploads/6.pdf
3.https://pdpa.am/public/uploads/1.pdf

20/05/2026

Վերջին շրջանում անչափահասների մասնակցությամբ հանրային հնչեղություն ստացած դեպքերի վերաբերյալ տարածվող տեղեկությունները և դրանց շուրջ ձևավորված հանրային արձագանքը վերահաստատում են երեխաներին վերաբերող տեղեկությունների հրապարակման հարցում առավել բարձր զգուշավորության և պատասխանատու մոտեցման անհրաժեշտությունը։

ՀՀ արդարադատության նախարարության Անձնական տվյալների պաշտպանության գործակալությունը կոչ է անում պետական մարմիններին, կրթական հաստատություններին, լրատվամիջոցներին և հանրության բոլոր ներկայացուցիչներին՝ երեխաների վերաբերյալ ցանկացած տեղեկություն հրապարակելիս և տարածելիս առաջնորդվել առավելագույն զգուշությամբ։

Երեխաների մասին տվյալների մշակումը պահանջում է հատուկ պատասխանատվություն։ Պետք է բացառել այնպիսի տեղեկությունների հրապարակումը, փոխանցումը կամ վերարտադրումը, որոնք չեն բխում հստակ նպատակից և երեխայի լավագույն շահից, կամ կարող են հանգեցնել երեխայի ուղղակի կամ անուղղակի նույնականացման, անձնական կյանքի խախտման և այլ բացասական հետևանքների։

Կրկին հիշեցնում ենք, որ նույնիսկ առանձին վերցված չեզոք թվացող տեղեկությունների համադրության արդյունքում կարող է բացահայտվել երեխայի ինքնությունը։ Այդ պատճառով հատկապես կարևոր է խուսափել այնպիսի տվյալների հրապարակումից, որոնք կարող են նույնականացնել երեխային կամ բացահայտել նրա անձնական կյանքի մանրամասները։

Գործակալության կողմից նախկինում մշակվել են երեխաների վերաբերյալ անձնական տվյալների մշակման թեմայով ուղեցույցներ, որոնք նախատեսված են աջակցելու պետական մարմիններին, կրթական հաստատություններին, մասնագետներին, լրատվամիջոցներին և այլ դերակատարներին՝ այս հարցերում առավել զգույշ և իրավաչափ գործելու համար։

ՀՀ արդարադատության նախարարությունը` ի դեմս Անձնական տվյալների պաշտպանության գործակալության, պատրաստակամ է համագործակցել գործընկեր կառույցների հետ, կազմակերպել իրազեկման աշխատանքներ և անհրաժեշտության դեպքում տրամադրել մասնագիտական խորհրդատվություն։

Երեխայի լավագույն շահը պետք է լինի առաջնահերթ բոլորի համար։

Ուղեցույցները հասանելի են հետևյալ հղումներով

1.https://pdpa.am/public/uploads/12.pdf
2.https://pdpa.am/public/uploads/6.pdf
3.https://pdpa.am/public/uploads/1.pdf

11/05/2026

Անձնական տվյալների պաշտպանության գործակալությունը նախընտրական շրջանում ստացվող ահազանգերի կապակցությամբ հիշեցնում է, որ քաղաքացիներին նախընտրական թեմաներով զանգեր, կարճ հաղորդագրություններ, էլեկտրոնային նամակներ կամ այլ ուղիղ հաղորդակցություն իրականացնելը պետք է կատարվի բացառապես օրինական հիմքով և անձնական տվյալների պաշտպանության պահանջների պահպանմամբ։

Վերջին շրջանում ստացվում են ահազանգեր այն մասին, որ որոշ քաղաքական ուժեր կամ դրանց հետ առնչվող անձինք քաղաքացիներին և իրավաբանական անձանց ուղարկում են նախընտրական բովանդակությամբ զանգեր, հաղորդագրություններ և փոստային նամակներ։ Հատկապես մտահոգիչ են այն դեպքերը, երբ տվյալ անձինք նախկինում որևէ կապ չեն ունեցել համապատասխան ուժերի հետ, չեն տրամադրել իրենց կոնտակտային տվյալները այդ նպատակով օգտագործելու համար և տեղեկացված չեն, թե իրենց անձնական տվյալները որտեղից և ինչ եղանակով են ձեռք բերվել։

Գործակալությունը շեշտում է, որ անձնական տվյալների, այդ թվում՝ հեռախոսահամարների, էլեկտրոնային փոստի հասցեների և այլ կապի միջոցների օգտագործումը նախընտրական նպատակներով չի կարող իրականացվել կամայական կերպով։ Անթույլատրելի է անձնական տվյալների հավաքումը, օգտագործումը կամ փոխանցումը, եթե բացակայում է դրա օրինական հիմքը, իսկ տվյալների սուբյեկտը տեղեկացված չէ իր տվյալների աղբյուրի, օգտագործման նպատակի և հիմքերի մասին։

Առանձնակի ուշադրության է արժանի նաև այն հանգամանքը, որ իրավաբանական անձանց, մասնավորապես՝ անհատ ձեռնարկատերերին ուղարկվող հաղորդակցություններում ևս կարող են օգտագործվել նույնականացնող կամ կապի տվյալներ, որոնց մշակումը նույնպես պետք է համապատասխանի օրինականության և համաչափության պահանջներին։

Կոչ ենք անում բոլոր քաղաքական ուժերին, նախընտրական շտաբներին, նրանց անունից գործող անձանց, ինչպես նաև տվյալների հնարավոր մշակողներին՝ խստորեն պահպանել անձնական տվյալների պաշտպանության օրենսդրության պահանջները և զերծ մնալ այնպիսի գործողություններից, որոնց դեպքում անհայտ է տվյալների ծագումը, բացակայում է օրինական հիմքը կամ անձը ողջամտորեն չի կարող ակնկալել նման հաղորդակցություն ստանալ։

Միաժամանակ քաղաքացիներին և անհատ ձեռնարկատերերին կոչ ենք անում նման դեպքեր արձանագրելու դեպքում հնարավորինս պահպանել ստացված զանգերի, հաղորդագրությունների կամ նամակների վերաբերյալ տվյալները և համապատասխան ուսումնասիրություն իրականացնելու նպատակով դիմել Անձնական տվյալների պաշտպանության գործակալություն՝ ք. Երևան, Կոմիտաս 54Բ հասցեով, կամ նամակ ուղարկել [email protected], [email protected] էլեկտրոնային հասցեներին։

06/05/2026

📌Վերջին օրերին հանրային տեղեկատվական դաշտում քննարկման առարկա են դարձել Վեդի համայնքում անչափահասների վերաբերյալ շրջանառվող տեղեկությունները:

Ուսումնասիրելով լրատվական դաշտը, պետական իրավասու մարմինների հայտարարությունները, ինչպես նաև սոցիալական հարթակներում առանձին օգտատերերի մեկնաբանությունները դեպքի վերաբերյալ` Անձնական տվյալների պաշտպանության գործակալությունը կոչ է անում բոլոր պետական մարմիններին, լրատվամիջոցներին, սոցիալական հարթակների օգտատերերին, ինչպես նաև այլ շահագրգիռ անձանց՝ զերծ մնալ անչափահասների վերաբերյալ զգայուն անձնական տվյալների հրապարակումից և տարածումից, հատկապես այնպիսի տեղեկությունների, որոնք թեկուզ անուղղակիորեն կարող են հանգեցնել նրանց նույնականացման։

Անչափահասների անձնական կյանքի, առողջական վիճակի, հոգեբանական առանձնահատկությունների, ընտանեկան հանգամանքների, հնարավոր տուժողի կարգավիճակի կամ այլ զգայուն տեղեկությունների հրապարակումը կարող է խախտել նրանց անձնական տվյալների պաշտպանության իրավունքը, վնասել նրանց արժանապատվությունը, մասնավոր կյանքը և լավագույն շահը, ինչպես նաև առաջացնել կրկնակի զոհականացում։

Հատկապես մտահոգիչ է այնպիսի տվյալների տարածումը, որոնք առանձին վերցված գուցե չեն նույնականացնում անչափահասին, սակայն այլ տեղեկությունների հետ համադրությամբ կարող են հնարավորություն տալ պարզելու նրա ինքնությունը։ Այդպիսի տվյալներ կարող են լինել բնակության վայրը, տարիքը, ընտանիքի կազմը, առողջական կամ կրթական առանձնահատկությունները, դեպքի ժամանակը և վայրը, ինչպես նաև այլ նկարագրական տվյալներ։

Գործակալությունը հիշեցնում է, որ անչափահասների վերաբերյալ ցանկացած հաղորդակցություն պետք է իրականացվի առավելագույն զգուշությամբ՝ առաջնորդվելով երեխայի լավագույն շահով, անձնական տվյալների նվազագույն օգտագործման սկզբունքով և չհրապարակելու անհրաժեշտությամբ այն ամենը, ինչը կարող է ուղղակի կամ անուղղակի կերպով բացահայտել երեխայի ինքնությունը։

Կոչ ենք անում բոլոր կողմերին ցուցաբերել բարձր պատասխանատվություն, պահպանել մասնագիտական և էթիկական սահմանները, ինչպես նաև հանրային հաղորդակցության մեջ բացառել անչափահասների զգայուն անձնական տվյալների ցանկացած հրապարակում կամ վերարտադրում, եթե դա կարող է հանգեցնել նույնականացման։

Անձնական տվյալների պաշտպանության գործակալությունը շարունակելու է հետևել անչափահասների անձնական տվյալների պաշտպանության պահանջների պահպանմանը և իր լիազորությունների շրջանակում ձեռնարկել անհրաժեշտ քայլեր։

13/04/2026

Հարգելի՛ քաղաքացիներ, տեղեկացնում ենք, որ էլեկտրաէներգիայի անջատման պատճառով Գործակալության հեռախոսահամարները չեն աշխատում:

25/02/2026

Հարգելի’ քաղաքացիներ, Անձնական տվյալների պաշտպանության գործակալության կատարած աշխատանքների վերաբերյալ 2025 թվականի տարեկան հաշվետվությանը կարող եք ծանոթանալ հետևյալ հղումով👉

25/02/2026

🔏Օրինականության սկզբունքն անձնական տվյալների մշակման առաջին ու ամենակարևոր սկզբունքն է։ Ո՞ր դեպքում է տվյալների մշակումը համարվում օրինական. իրազեկվե’ք և եղե’ք պաշտպանված։

Enjoy the videos and music that you love, upload original content and share it all with friends, family and the world on YouTube.

25/02/2026

Հետևե’ք անձնական տվյալների պաշտպանության կարևորագույն կանոններին՝ այդպիսով պաշտպանելով ինքներդ ձեզ տարաբնույթ խարդախություններից ու տվյալների կորստից։

Enjoy the videos and music that you love, upload original content and share it all with friends, family and the world on YouTube.

15/02/2026

Գրիգոր Ներսիսյանի 2026 թվականի փետրվարի 10-ի դիմումի հիման վրա, 2026 թվականի փետրվարի 13-ին ընդունված Հայաստանի Հանրապետության վարչապետի թիվ 120-Ա որոշմամբ Գրիգոր Ներսիսյանը 2026 թվականի փետրվարի 24-ից ազատվել է Անձնական տվյալների պաշտպանության գործակալության պետի պաշտոնից։

Ազատումն իրականացվել է՝ ղեկավարվելով «Անձնական տվյալների պաշտպանության մասին» ՀՀ օրենքի 25-րդ հոդվածի 7-րդ մասի 1-ին կետով, համաձայն որի՝ Անձնական տվյալների պաշտպանության լիազորված մարմնի ղեկավարը պաշտոնից ազատվում է գրավոր դիմումի հիման վրա։
https://pdpa.am/hy/post/view/74