29/05/2026
Departamento di Aduana ta introduci integracion di IATA Cargo-XML den ASYCUDAWorld 📦🛩️
Riba 13 mei 2026, Aduana, den colaboracion cu e International Air Transport Association (IATA) y e United Nations Conference on Trade and Development (UNCTAD), a tene un seminario/workshop encuanto integracion di un modulo nobo den e plataforma di ASYCUDAWorld, esta e IATA Cargo-XML.
Nos a inicia e implementacion di IATA Cargo-XML den e plataforma di ASYCUDAWorld como parti di nos programa continuo pa modernisa e maneho di carga aereo y fortalece operacionnan pa control di frontera.
E funcionalidad nobo aki ta permiti aerolineanan, express carriers y otro stakeholdernan autorisa den e cadena di suministro di carga aereo, pa entrega informacion di manifiesto di carga electronicamente uzando e normanan internacional reconoci pa IATA Cargo-XML. E mehoracion aki ta aumenta e eficiencia, transparencia y confiabilidad di e proceso di carga aereo na Aruba door di duna nos acceso di antemano na informacion prome cu e carganan yega. E iniciativa lo contribui na un proceso mas rapido di despacho di carga, mehoracion di capacidadnan di maneho di riesgo y fortalece medidanan nacional di seguridad na frontera. Ademas, e implementacion ta promove mas exactitud, consistencia y integridad den entrega di data door di reduci intervencion manual y standarisa e intercambio electronico di informacion entre operadornan di carga y Aduana.
Nos lo sigui traha serca cu stakeholdernan y partnernan internacional pa sigura implementacion exitoso, integracion operacional y futuro expansion di e iniciativa aki.
