Jennifer Arends-Reyes

10/06/2026

Parlamentario Jennifer Arends-Reyes:
Delegacion di Aruba a bish*ta Clingendael Instituut pa fortifica conocemento y cooperacion internacional

DEN HAAG (9 di juni 2026) – Como parti di su programa na Hulanda, e delegacion di Aruba consistiendo di miembronan di Comision di Relacionnan di Reino y Relacionnan Exterior di Parlamento di Aruba, bou di presidencia di parlamentario Jennifer Arends-Reyes, a realiza un bish*ta di trabou na Clingendael Instituut na Den Haag.
Durante e encuentro, e delegacion a wordo ricibi pa señor Martijn Pluim, Director di Academy di Clingendael. E bish*ta ta forma parti di e esfuerzonan continuo di Parlamento di Aruba pa fortalece conocemento, amplia perspectiva internacional y promove intercambio di experiencia tocante desaroyonan geopolitico, diplomacia y cooperacion internacional.
Clingendael ta reconoci internacionalmente como un instituto lider den investigacion, formacion y analisis den area di politica exterior, diplomacia, siguridad internacional y relacionnan global. Durante e programa, e delegacion a ricibi un presentacion tocante e rol y e contribucion di e instituto den formacion di lider, funcionario publico y experto den relacionnan internacional.
Un elemento central di e encuentro tabata e intercambio di idea tocante e prioridadnan di Aruba den area di fortalecemento di capacidad, preparacion institucional y e impacto cu desaroyonan global tin riba paisnan chikito manera Aruba.
Durante e discusion, a duna atencion na tema di siguridad regional, migracion, cambio climatico, cooperacion internacional, stabilidad geopolitico y e posicion unico cu Aruba ocupa tanto den Caribe como den Reino Hulandes.
Segun parlamentario Jennifer Arends-Reyes, e tipo di encuentro ta di gran importancia pa representantenan electo por mantene nan mes informa y prepara pa enfrenta e desafionan cu mundo moderno ta presenta.
“Pa Aruba, relacionnan internacional no ta un tema distante. Decision y desaroyonan cu ta tuma luga den diferente parti di mundo tin influencia directo riba nos economia, nos siguridad, nos conectividad y nos bienestar. P’esey ta esencial cu nos ta sigui inverti den conocemento, cooperacion y preparacion strategico,” Arends-Reyes a declara.
Segun e presidente di e comision, paisnan chikito mester ta specialmente alerta na cambionan internacional y busca constantemente oportunidadnan pa fortalece nan capacidad institucional.
“Nos no por controla tur loke ta sosode den mundo, pero nos por prepara nos mes miho. Cu conocemento, dialogo y colaboracion cu institucionnan renombra manera Clingendael, nos por fortalece nos capacidad pa tuma decisionnan informa y proteha interesnan di Aruba,” el a agrega.
E bish*ta a culmina cu un intercambio final entre e participantenan, unda a comparti diferente idea y experiencia tocante e rol cu Parlamento por desempeña den e fortalecemento di relacionnan internacional y gobernacion moderno.
Arends-Reyes a conclui enfatizando cu Parlamento di Aruba lo sigui promove oportunidadnan di aprendisahe, cooperacion y intercambio internacional, mirando cu e futuro di Aruba ta cada bes mas conecta cu loke ta sosode na resto di mundo.
“Conocemento ta poder. Y pa un pais chikito manera Aruba, prepara nos lidernan y institucionnan pa e retonan di mañan ta un inversion cu lo beneficia nos pueblo durante generacionnan pa bin,” Arends-Reyes a conclui.

05/06/2026

Opening di reunionan IPKO juni 2026 na Den Haag, Hulanda.

05/06/2026

IPKO presentatie Aruba juni 2026 den Tweede Kamer na Den Haag🇦🇼

05/06/2026

Jennifer Arends-Reyes den audiencia cu Gobernador:

Bienestar di pueblo mester keda centro di tur decision


ORANJESTAD (4 di juni 2026) – Lider di Fraccion di AVP den Parlamento di Aruba, Jennifer Arends-Reyes, a participa recientemente den un audiencia oficial cu Su Excelencia Gobernador di Aruba. E encuentro ta forma parti di dialogo regular cu lidernan politico y ta ofrece un oportunidad valioso pa intercambia pensamento riba diferente asunto di importancia nacional.

Durante e audiencia, Arends-Reyes a enfatisa e balor di dialogo institucional, respet mutuo y cooperacion entre e diferente organonan cu forma parti di nos democracia. Segun e parlamentario, contacto constructivo entre representante politico y institucionnan fundamental di nos pais ta esencial pa fortalece gobernacion, aumenta transparencia y sigui construi confianza entre gobierno y ciudadano.

Den e combersacion a aborda diferente tema cu ta ocupa un lugar central den e agenda nacional, incluyendo desaroyo economico, oportunidad pa hobennan, bienestar social, vivienda y e futuro desaroyo di Aruba. Tambe a intercambia punto di bista tocante e posicion di Aruba dentro di Reino Hulandes y e importancia di mantene relacionnan basa riba respet mutuo, responsabilidad comparti y cooperacion concreto.

Arends-Reyes a destaca cu Aruba ta pasando den un periodo importante di consolidacion y transformacion. Segun e, e stabilidad financiero cu Aruba a logra den añanan reciente mester sigui traduci den beneficio tangibel pa e ciudadano comun, incluyendo miho servicio publico, mas oportunidad economico, fortalecemento di siguridad social y un futuro sostenibel pa generacionnan venidero.

“Nos ta sigui traha cu seriedad, compromiso y amor pa Aruba. Dialogo cu institucionnan clave manera e Gobernador ta contribui pa mantene nos enfoca riba loke realmente ta conta: e bienestar di nos pueblo y e fortalecemento continuo di nos democracia,” asina Arends-Reyes a expresa.

Lider di Fraccion di AVP a señala cu encuentronan manera esaki ta confirma importancia di liderazgo responsabel, comunicacion habri y colaboracion institucional. E ta reafirma su compromiso pa sigui representa interesnan di Aruba cu dignidad, pone necesidadnan di ciudadano dilanti y contribui activamente na construccion di un pais mas fuerte, moderno y uni.

01/06/2026

Parlamentario di AVP, Jennifer Arends-Reyes:

MOU pa EU Preclearance ta un paso strategico pa futuro di conectividad di Aruba

ORANJESTAD (31 di mei 2026) – Parlamentario Jennifer Arends-Reyes ta considera e reciente firma di e Memorandum of Understanding (MOU) entre Aruba Airport Authority, Gobierno di Aruba, Schiphol Group y KLM como un desaroyo strategico cu por contribui significativamente na futuro di conectividad, competitividad y posicion internacional di Aruba.
Segun Arends-Reyes, e acuerdo ta representa un paso importante den e direccion di un sistema di frontera mas moderno, eficiente y prepara pa e demanda di trafico aereo internacional den añanan benidero. Mas cu un simple acuerdo di cooperacion, e MOU ta habri porta pa Aruba explora posibilidadnan concreto pa fortalece su rol como punto di conexion entre Caribe y Europa.
“Aruba a demuestra durante añanan cu innovacion y vision por coloca nos pais den un posicion sobresaliente den region. E MOU aki ta mustra cu nos ta dispuesto pa sigui mira dilanti y explora oportunidadnan cu por beneficia tanto residente como bish*tante,” Arends-Reyes a declara.
E parlamentario ta enfatisa cu Aruba ya a acumula experiencia valioso cu iniciativanan di facilitacion aeroportuario. Un ehempel importante ta e proyecto Happy Flow, cu a introduci uzo di tecnologia biometrico, incluyendo reconocemento facial, pa simplifica y agilisa e experiencia di biahero na aeropuerto.
Aunke Happy Flow a demostra cu tecnologia por mehora significativamente e proceso di embarke y control, e proyecto no a resulta den implementacion di un sistema completo di EU-Schengen preclearance. Segun Arends-Reyes, e experiencia aki a confirma cu innovacion tecnologico so no ta suficiente pa logra e meta ey.
“Pa yega na un sistema di preclearance europeo, ta necesario mas cu tecnologia. Mester tin acuerdo legal internacional, cooperacion estrecho entre autoridadnan di frontera, garantia di privacidad, inversion continuo, personal capacita y sostenibilidad operacional,” el a splica.
Precisamente pa e motibo ey, Arends-Reyes ta mira e MOU actual como un paso significativo. E acuerdo no ta implica cu un sistema di EU preclearance ta cla pa implementacion inmediato, pero si ta crea e marco necesario pa studia y evalua con Aruba por avansa den facilitacion digital di frontera y eventualmente yega na un modelo di preclearance pa vuelonan cu destino Europa.
Segun e lider di fraccion di AVP, e beneficio potencialnan di un sistema asina ta considerabel. Ademas di reduci tempo di espera y simplifica procedimentonan pa pasaheronan, e por fortalece atractivo di Aruba como destino turistico y como hub di conexion internacional.
Aruba ya conoce e bentahanan cu un sistema di preclearance por ofrece door di su experiencia positivo cu U.S. Preclearance. E modelo ey a contribui pa aumenta comodidad pa biaheronan y pa fortalece posicion competitivo di Aruba den mercado internacional. Un iniciativa similar enfoca riba Europa por crea beneficio comparabel y aumenta eficiencia den trafico aereo entre Aruba y continente Europeo.
Arends-Reyes a enfatisa cu mester maneha e proceso cu seriedad, transparencia y un vision strategico na largo plazo.
“Nos mester sigui traha hunto cu nos partnernan den Reino Hulandes y den Europa pa identifica e miho forma di haci Aruba mas accesibel, mas eficiente y mas competitivo. Si nos kier sigui distingui nos mes como un destino moderno y confiabel, inversion den tecnologia, siguridad, cooperacion internacional y servicio di calidad lo sigui ta indispensable,” el a expresa.
Finalmente, e parlamentario a señala cu e firma di e MOU ta manda un mensahe positivo tocante e ambicion di Aruba pa sigui progresa.
“E MOU pa EU preclearance no ta simplemente un documento administrativo. E ta un señal cla cu Aruba ta kere den innovacion, conectividad y progreso. E ta un oportunidad cu merece atencion y compromiso di tur sector relevante pa sigui construi e Aruba moderno cu nos pueblo ta merece,” Arends-Reyes a conclui.

26/05/2026

Parlamentario Jennifer Arends-Reyes:

Modernisacion di LNT ta necesario pa retene talento local y fortifica institucionnan

ORANJESTAD (25 di mei 2026) - Lider di Fraccion AVP y parlamentario Jennifer Arends-Reyes a expresa su apoyo pa e intencion di adapta e Landsverordening Normering Topinkomens (LNT), describiendo e iniciativa como un paso importante den direccion di un mercado laboral mas competitivo y un gobierno cu por retene e miho talento local na Aruba.
Segun Arends-Reyes, Aruba ta enfrenta un reto creciente relaciona cu fuga di talento, unda hopi profesional altamente capacita ta busca oportunidad den exterior debi na condicionnan laboral y perspectivanan di crecemento cu frecuentemente ta mas atractivo cu loke Aruba por ofrece actualmente.
“Nos no por papia di desaroyo economico y fortalecemento institucional si nos mes profesionalnan no ta haya oportunidad pa progresa y desaroya nan carera aki mes na Aruba,” Arends-Reyes a declara. “Si nos kier construi un pais fuerte y competitivo, nos mester crea circunstancianan caminda talento local kier keda y aporta na e futuro di nos comunidad.”
E parlamentario a indica cu un revision responsabel y realistico di e normanan salarial por contribui na retene experto den areanan strategico manera salud, enseñansa, finansas, tecnologia y administracion publico. Segun Arends-Reyes, e realidad actual ta mustra cu Aruba ta competi pa talento no solamente cu paisnan den region, sino tambe cu mercado internacional cu regularmente ta ofrece condicionnan mas atractivo pa profesionalnan altamente cualifica.
Arends-Reyes a enfatisa cu e proposito di e adaptacion no ta pa promove salarionan exorbitante ni uzo iresponsabel di recurso publico, sino pa establece un marco legal cu ta refleha e realidad economico actual y cu ta permiti institucionnan publico funciona cu e liderazgo y conocemento necesario pa enfrenta e desafionan di futuro.
“Un sistema salarial moderno y ekilibra ta parti di bon gobernacion. Ora nos inverti den nos propio hende, nos ta inverti den calidad di servicio publico, den continuidad institucional y den capacidad di nos pais pa crece y progresa,” el a expresa.
E lider di fraccion AVP a señala cu na Hulanda e ekivalente di e ley, e Wet Normering Topinkomens (WNT), ta revisa y actualisa anualmente tumando na cuenta desaroyonan economico y costo laboral. Pa 2026, e maximo general na Hulanda a subi te €262.000 pa aña, precisamente pa mantene competitividad den sector publico.
Den contraste, e maximo salarial contempla den e LNT di Aruba a keda fija na Afl. 329.000 pa aña desde juni 2022 y ta vincula na un periodo di transicion di cinco aña. Segun Arends-Reyes, e experiencia di e ultimo añanan tambe a mustra situacionnan caminda profesionalnan treci di exterior por haya contratonan cu no necesariamente ta cay bou di e disposicionnan actual di e ley, mientras profesionalnan local frecuentemente ta confronta limitacionnan diferente.
“Nos mester evalua si e sistema actual ta logra e resultado cu originalmente a busca. Aruba no por permiti cu su propio talento keda den desbentaha ni cu institucionnan perde capacidad pa atrae y retene e persona adecua pa posicionnan clave,” Arends-Reyes a señala.
E parlamentario a indica cu lo sigui monitor di cerca e proceso di elaboracion y implementacion di cualkier adaptacion na e ley, enfatizando cu transparencia, responsabilidad fiscal y interes publico mester permanece elemento central den tur decision.
“Nos prioridad semper lo ta un gobierno eficiente, transparente y responsabel cu ta maneha placa publico cu cuidou. Na mesun tempo, nos mester crea e espacio necesario pa profesionalnan local por keda, crece y sigui aporta na desaroyo di Aruba. Esey ta un inversion den nos pueblo y den nos futuro,” Arends-Reyes a conclui.

22/05/2026