02/06/2026
Azərbaycan: enerji gücündən qlobal nüfuza gedən yol
Bu gün Azərbaycan artıq təkcə enerji istehsal edən ölkə deyil. Azərbaycan qlobal enerji xəritəsini formalaşdıran, söz sahibi olan, əməkdaşlıq yaradan və beynəlxalq proseslərə istiqamət verən bir dövlətdir. Bu reallıq Prezident İlham Əliyevin 2026-cı il 1 iyun tarixində Bakı Enerji Həftəsinin rəsmi açılış mərasimində etdiyi çıxışda bir daha öz təsdiqini tapdı.
“Xəzər Neft və Qaz Sərgisi”nin əsası ilə başlayan yol bu gün genişlənərək “Bakı Enerji Həftəsi”nə çevrilib. Bu platforma Azərbaycanın enerji tarixinin formalaşmasında, iqtisadi inkişafının sürətlənməsində və beynəlxalq enerji əməkdaşlığının genişlənməsində mühüm rol oynayan qlobal bir mərkəzə çevrilmişdir.
Bəli, bu gün qürurla deyirik ki, Azərbaycan dünya enerji sistemində etibarlı tərəfdaş və strateji aktor kimi qəbul edilən ölkələrdən biridir. Bakı–Tbilisi–Ceyhan, Cənub Qaz Dəhlizi və digər qlobal layihələr Azərbaycanın Şərqlə Qərb arasında mühüm enerji körpüsü rolunu daha da gücləndirib və ölkəmizi beynəlxalq enerji təhlükəsizliyinin əsas iştirakçılarından birinə çevirib.
Hazırda Azərbaycan qazı 16 ölkəyə ixrac olunur ki, onların 10-u Avropa İttifaqına üzv dövlətlərdir. Bu göstərici ölkəmizin etibarlı enerji təchizatçısı kimi beynəlxalq miqyasda artan nüfuzunu və strateji əhəmiyyətini açıq şəkildə nümayiş etdirir.
Prezident İlham Əliyev çıxışında qeyd edib ki, Azərbaycanın enerji siyasətinin təməli düzgün investisiya strategiyası, milli maraqlara əsaslanan praqmatik yanaşma və uzunmüddətli inkişaf vizyonudur. Müstəqilliyin ilk illərində ağır iqtisadi şəraitdən çıxan Azərbaycan bu gün sabit və dayanıqlı inkişaf modelinə sahibdir.
Yoxsulluğun və işsizliyin azalması, xarici borcun minimum səviyyəyə endirilməsi, valyuta ehtiyatlarının dəfələrlə artması və iqtisadi sabitliyin təmin olunması Azərbaycanın uğurlu inkişaf strategiyasının nəticəsidir.
Azərbaycan eyni zamanda 30 illik işğala son qoyaraq öz ərazi bütövlüyünü bərpa edib və regionda yeni geosiyasi reallıqlar yaradıb. Bu reallıqlar Cənubi Qafqazda sülhün, əməkdaşlığın və iqtisadi kommunikasiyaların bərpası üçün yeni imkanlar açıb.
Bu gün Azərbaycan yalnız enerji ölkəsi deyil, həm də qlobal əməkdaşlıq platformalarının aparıcı iştirakçısıdır. Ölkənin həyata keçirdiyi enerji diplomatiyası həm regionda sabitliyin möhkəmlənməsinə, həm də beynəlxalq tərəfdaşlığın genişlənməsinə xidmət edir.
Eyni zamanda, bərpaolunan enerji sahəsində həyata keçirilən layihələr Azərbaycanın gələcək enerji strategiyasının daha da şaxələndirildiyini göstərir. Günəş, külək və hidroenerji layihələri ölkənin enerji potensialını daha da gücləndirərək onu yeni inkişaf mərhələsinə aparır.
Prezident İlham Əliyevin rəhbərliyi ilə Azərbaycan beynəlxalq arenada etibarlı tərəfdaş, güclü iqtisadi aktor və qlobal enerji təhlükəsizliyinin mühüm təminatçısı kimi mövqeyini daha da möhkəmləndirir.
Babək Rayon İcra Hakimiyyətinin əməkdaşı
Turan İmanov
#Россия #Энергетика #Дипломатия #Азербайджан
