21/07/2026
Konstitusiya Məhkəməsində keçirilən Könüllülük Proqramında iştirak edən gənclərə sertifikatlar təqdim edilib.
https://constcourt.gov.az/az/details/1995
“Könüllü fəaliyyəti haqqında” Azərbaycan Respublikasının Qanununa uyğun olaraq, Azərbaycan Respublikasının Konstitusiya Məhkəməsində həyata keçirilən Könüllülük Proqramını uğurla başa vuran bir qrup gəncə sertifikatlar təqdim olunub. İki ay müddətində proqram çərçivəsində fəaliyyət göstərən könüllülər Konstitusiya Məhkəməsinin iş prinsipləri və fəaliyyəti ilə yaxından tanış olmaq imkanı əldə etmiş, onlara gələcək peşə fəaliyyətlərində faydalı olacaq nəzəri və praktiki biliklər qazandırılmışdır.
Məhkəmənin fəaliyyətində iştirak edən könüllülər Bakı Dövlət Universitetinin, ADA Universitetinin, M.V.Lomonosov adına Moskva Dövlət Universitetinin, Dubay əmirliyinin “De Montfort” Universitetinin, London şəhərinin “City University of London” Universitetinin hüquqşünaslıq ixtisası üzrə təhsil alan tələbələridir.
Proqram müddətində könüllülər Konstitusiya Məhkəməsi Aparatının müxtəlif şöbə və sektorlarının fəaliyyəti ilə yaxından tanış olmuş, səlahiyyətli struktur bölmələrində praktiki təcrübə keçmiş, habelə məhkəməyə daxil olan sorğu və müraciətlərə baxılması prosesində iştirak etmişlər.
Eyni zamanda bildirilir ki, Azərbaycan Respublikasının Konstitusiya Məhkəməsində həyata keçirilən Könüllülük Proqramında iştirak etmək arzusunda olan gənclərin müraciətlərinin qəbulu davam etdirilir.
