28/08/2026
🐑🐄Qoyunu 7 manata, inəyi 24 manata sığortalamaq olar – ŞƏRTLƏR, MƏBLƏĞLƏR.
Azərbaycanda dövlət dəstəyi ilə təqdim edilən sərfəli aqrar sığorta mexanizmi vasitəsilə əkin sahələri ilə yanaşı, kənd təsərrüfatı heyvanlarını da sığortalamaq mümkündür.
Buraya iribuynuzlu mal-qara (südlük və ətlik inəklər, camış) və xırdabuynuzlu heyvanlar (qoyun və keçilər) aiddir.
Aqrar Sığorta Fondu bu heyvanları çoxsaylı risklərdən – təbii fəlakətlər, yoluxucu xəstəliklər, yem, ot və kimyəvi məhsulların təsirindən zəhərlənmə, yanğın, ilan və həşərat sancması, vəhşi heyvanların hücumu, 3-cü şəxslərin hərəkəti, avtomobillə vurulma, daşınma zamanı qəza nəticəsində tələf olma və ya məcburi kəsim, oğurluq, quldurluq və sair hallardan sığortalayır.
Qanunvericiliyə əsasən, sığorta haqqının 50%-i dövlət tərəfindən ödənildiyinə görə, heyvanların sığortası fermerlər üçün daha əlçatandır.
Belə ki, 1000 manatlıq iribuynuzlu mal-qaranın sığortası üçün fermerin ödəməli olduğu məbləğ seçilmiş sığorta zərfindən asılı olaraq 24–39 manat, qiyməti 2000 manat olan heyvanların illik sığortası isə 48–78 manat arasında dəyişir.
Xırdabuynuzlu heyvanlara (qoyun və keçilər) gəlincə, qiyməti 300 manat olan heyvanın sığortası fermerə 7–11 manata, 500 manatlıq heyvanın sığortası isə 12–18 manata başa gəlir.
Qeyd edək ki, fermer və təsərrüfatlar öz heyvanlarını 1 il, 2 il və 3 illik müddətə sığorta etdirə bilərlər. Sığorta müddəti artdıqca, illik sığorta haqqı da azalır.
Məsələn, 1000 manatlıq iribuynuzlu mal-qaranın 3 illik müddətə sığortalanması zamanı illik sığorta haqqı 22,8–36,5 manat təşkil edir.
Hadisə baş verdikdə heyvanın dəyərinin 10%-lik hissəsi azadolma şəklində çıxılır və fermerə kənd təsərrüfatı heyvanının dəyərinin 90%-i həcmində ödəniş həyata keçirilir.
Qeyd edək ki, kənd təsərrüfatı heyvanlarını artıq 11 günlük yaşından başlayaraq müxtəlif yaş hədlərinədək sığortalamaq mümkündür. Südlük mal-qara 7 yaşadək, ətlik heyvanlar 3 yaşadək, xırdabuynuzlu heyvanlar isə 5 yaşadək sığortalanır.
Xatırladaq ki, indiyədək Aqrar Sığorta Fondu tərəfindən heyvandarlıq sığortası üzrə 3,5 milyon manat sığorta ödənişi həyata keçirilib.
