Albert Aqarunov adına 154 saylı tam orta məktəb

08/09/2026

"Azərbaycan müəllimi" xəbər verir ki, bunu elm və təhsil naziri Emin Əmrullayev PISA 2025- Şagirdlərin Qiymətləndirilməsi üzrə Beynəlxalq Proqramının nəticələrinin təqdimatı zamanı deyib.

05/07/2026

Azərbaycan Avropanın enerji təhlükəsizliyinin etibarlı təminatçısı kimi mövqeyini möhkəmləndirir

Prezident İlham Əliyevin Avropa Komissiyasının Prezidenti Ursula Fon der Lyayenlə keçirdiyi görüş zamanı enerji sahəsində səsləndirdiyi fikirlər Azərbaycanın Avropa üçün strateji əhəmiyyətinin getdikcə daha da artdığını bir daha nümayiş etdirdi. Son illərdə dünyada baş verən geosiyasi proseslər enerji təhlükəsizliyi məsələsini dövlətlərin milli təhlükəsizliyinin əsas elementlərindən birinə çevirib. Belə bir şəraitdə etibarlı enerji tərəfdaşlarının əhəmiyyəti daha da yüksəlib və Azərbaycan bu istiqamətdə özünü sözün əsl mənasında etibarlı tərəfdaş kimi təsdiqləyib.
Dövlət başçısı qeyd etdi ki, 2022-ci ildə Azərbaycan ilə Avropa İttifaqı arasında enerji sahəsində Strateji Tərəfdaşlıq haqqında Anlaşma Memorandumunun imzalanması əməkdaşlığın yeni mərhələsinin əsasını qoyub. Həmin vaxtdan etibarən Azərbaycanın Avropa İttifaqına təbii qaz ixracı təxminən 65 faiz artıb. Hazırda ölkənin qaz ixracının yarısı Avropa bazarına yönəldilir və Avropa İttifaqının artıq 10 üzv dövləti Azərbaycan qazından istifadə edir. Bu statistika Azərbaycanın enerji ixracatçısı kimi artan rolunu və Avropanın enerji xəritəsində qazandığı mühüm mövqeyi aydın şəkildə göstərir.
Azərbaycanın bu uğuru təsadüfi deyil. Uzun illər ərzində həyata keçirilən ardıcıl enerji siyasəti, milyardlarla dollar həcmində investisiyalar və beynəlxalq tərəfdaşlarla qurulan etibarlı əməkdaşlıq bu nəticələrin əldə edilməsinə imkan verib. Prezident İlham Əliyevin də vurğuladığı kimi, ölkəmiz enerji infrastrukturunun yaradılması üçün böyük siyasi iradə nümayiş etdirib və mühüm maliyyə resursları səfərbər edib. Bu gün həmin strategiyanın bəhrələri həm Azərbaycan, həm də tərəfdaş ölkələr üçün real dividendlər qazandırır.
Bu kontekstdə Cənub Qaz Dəhlizi xüsusi əhəmiyyət daşıyır. Uzunluğu 3500 kilometrə çatan bu nəhəng enerji sistemi Xəzər dənizindən hasil olunan təbii qazı Avropa bazarına çatdıran əsas marşrutdur. Layihə təkcə iqtisadi deyil, həm də geosiyasi baxımdan XXI əsrin ən mühüm enerji təşəbbüslərindən biri hesab olunur. Azərbaycan bu layihənin təşəbbüskarı və əsas iştirakçısı kimi Avropanın enerji təhlükəsizliyinə mühüm töhfə verir.
Prezident İlham Əliyev çıxışında qeyd etdi ki, Azərbaycan qazının ixrac coğrafiyasının daha da genişləndirilməsi üçün ciddi potensial mövcuddur. Bu isə o deməkdir ki, gələcək illərdə daha çox Avropa dövləti ölkəmizin enerji resurslarından faydalana bilər. Xüsusilə mövcud geosiyasi şərait alternativ enerji mənbələri və etibarlı təchizat marşrutlarının əhəmiyyətini daha da artırır. Azərbaycan isə uzunmüddətli müqavilələrə sadiq qalaraq tərəfdaşlarının etimadını qazanan ölkələrdən biridir.
Enerji əməkdaşlığının mühüm xüsusiyyətlərindən biri də onun yalnız iqtisadi mənfəətə əsaslanmamasıdır. Bu əməkdaşlıq qarşılıqlı etimada, öhdəliklərə sadiqliyə və uzunmüddətli strateji maraqlara söykənir. Məhz buna görə də Azərbaycan bu gün Avropa İttifaqının enerji təhlükəsizliyi strategiyasında xüsusi yer tutur.
Prezident İlham Əliyevin bəyanatı bir daha göstərdi ki, Azərbaycan enerji sahəsində əldə etdiyi nailiyyətlərlə kifayətlənmək niyyətində deyil. Ölkəmiz həm mövcud layihələrin genişləndirilməsi, həm də yeni enerji marşrutlarının yaradılması istiqamətində fəaliyyətini davam etdirir. Bu siyasət Azərbaycanın beynəlxalq nüfuzunu daha da gücləndirir, Avropa ilə strateji tərəfdaşlığını möhkəmləndirir və ölkəmizi qlobal enerji bazarında etibarlı oyunçu kimi ön plana çıxarır. Enerji sahəsində formalaşan bu əməkdaşlıq modeli isə uzun illər ərzində həm Azərbaycanın iqtisadi inkişafına, həm də Avropanın enerji təhlükəsizliyinə mühüm töhfələr verməyə davam edəcək.

Rəcəbova Mahru
Suraxanı rayon 154 nömrəli tam orta ümumtəhsil məktəbinin direktoru

03/07/2026

📌 Vətəndaş qəbulu

Bakı şəhəri Albert Aqarunov adına 154 nömrəli tam orta ümumtəhsil məktəbində təsdiq edilmiş qrafikə uyğun olaraq vətəndaş qəbulu keçirilir.
Qəbul zamanı valideynlərin və qanuni nümayəndələrin müraciətləri dinlənilib, onları maraqlandıran məsələlər üzrə ətraflı fikir mübadiləsi aparılır. Qaldırılan məsələlərin qanunvericiliyin tələblərinə uyğun araşdırılması və həlli istiqamətində müvafiq tədbirlərin görülməsi təmin olunur.
Məktəbimizdə vətəndaş qəbulları bundan sonra da mütəmadi olaraq davam etdiriləcəkdir.

01/07/2026

25/06/2026

Valideynlərlə maarifləndirici görüş keçirilib

Yeni təmayül tədris modeli ilə bağlı 154 nömrəli tam orta ümumtəhsil məktəbində Azərbaycan bölməsi üzrə X və XI sinif şagirdlərinin valideynləri ilə maarifləndirici görüş keçirilib.
Görüş 114 nömrəli tam orta ümumtəhsil məktəbinin direktoru Könül Hüseynova tərəfindən aparılıb. Tədbirdə yeni təmayül tədris modelinin məqsədi, şagirdlər üçün yaratdığı imkanlar, ali təhsilə hazırlıq mərhələsində modelin üstünlükləri, təmayül istiqamətlərinin seçilməsi və qeydiyyat prosesi barədə valideynlərə ətraflı məlumat verilib, onları maraqlandıran suallar cavablandırılıb.
Maarifləndirici görüş valideynlərin yeni tədris modeli barədə dolğun məlumat əldə etməsinə, şagirdlərin gələcək təhsil seçimlərinə daha hazırlıqlı yanaşmasına və məktəb–valideyn əməkdaşlığının gücləndirilməsinə xidmət edib.

19/06/2026

18/06/2026

154 nömrəli tam orta ümumtəhsil məktəbinin şagirdləri İqtisadiyyat Müsabiqəsində yüksək nəticə göstəriblər

Bakı şəhəri Suraxanı rayonu Albert Aqarunov adına 154 nömrəli tam orta ümumtəhsil məktəbinin şagirdləri ölkə üzrə keçirilən İqtisadiyyat Müsabiqəsində əldə etdikləri uğurlu nəticələrlə məktəbimizin adını bir daha zirvələrə daşıyıblar.

Məktəblilər arasında iqtisadi savadlılığın artırılması, analitik və tənqidi düşüncə bacarıqlarının inkişaf etdirilməsi məqsədilə təşkil olunan müsabiqənin milli mərhələsində məktəbimizin X sinif şagirdləri Kayınbəyova Nigar Murad qızı və Kayınbəyov Fuad Murad oğlu ölkə üzrə ən yaxşı nəticə göstərən iştirakçılar sırasında yer alaraq Top-10 siyahısına daxil olublar. Bu uğur onların iqtisadi biliklərinin, zəhmətinin və məqsədyönlü hazırlığının bariz göstəricisidir.

Daha böyük sevinc isə məktəbimizin digər X sinif şagirdi Budaqov İlyas Nizami oğlunun adına yazılıb. İlyas müsabiqədə yüksək nəticə göstərərək Top-3 iştirakçı sırasında qərarlaşıb. Xüsusi qeyd olunmalıdır ki, o, imtahanı tam şəkildə ingilis dilində verərək bu uğura nail olub. Bu nəticə yalnız iqtisadi biliklərin deyil, eyni zamanda xarici dil bacarıqlarının və beynəlxalq standartlara uyğun hazırlığın göstəricisidir. İqtisadiyyat Müsabiqəsində ingilis dilində iştirak edən və ən yüksək nəticə göstərən şagirdlər beynəlxalq final mərhələsində Azərbaycanı təmsil etmək hüququ qazanırlar.

İlyas Budaqov yaxın aylarda Yunanıstanın paytaxtı olan Afina şəhərində keçiriləcək Beynəlxalq Final Mərhələsində ölkəmizi təmsil edəcək. Bu, həm məktəbimizin, həm də Azərbaycan təhsilinin beynəlxalq arenada uğurla təmsil olunması baxımından böyük əhəmiyyət daşıyır.

Bu möhtəşəm nailiyyətlərin arxasında dayanan əsas amillərdən biri də məktəbimizin peşəkar müəllim kollektivinin fədakar əməyi, şagirdlərə göstərdiyi davamlı dəstək və keyfiyyətli tədris prosesidir. Şagirdlərimizin bilik və bacarıqlarının formalaşmasında, onların uğura aparan yolunda böyük zəhməti olan bütün müəllimlərimizə dərin minnətdarlığımızı bildiririk. Bu uğur həm şagirdlərimizin, həm də onların yetişməsində əməyi olan müəllimlərimizin birgə zəhmətinin nəticəsidir.

Şagirdlərimizi bu münasibətilə ürəkdən təbrik edir, onlara yeni nailiyyətlər arzulayırıq. İnanırıq ki, onların əldə etdiyi nəticələr digər məktəblilər üçün də ilham mənbəyi olacaq və məktəbimizin uğur ənənələrini daha da zənginləşdirəcəkdir.

Bu gün qürurla deyə bilərik ki, 154 nömrəli tam orta ümumtəhsil məktəbinin şagirdləri yalnız ölkə səviyyəsində deyil, artıq beynəlxalq arenada da öz sözlərini deməyə hazırdırlar.

14/06/2026

Ulu Öndər Heydər Əliyevin xilaskarlıq missiyası- Dövlətçiliyimizin məhv olmaq təhlükəsindən qurtuluşu

Azərbaycanın dövlətçilik tarixi bir çox mürəkkəb sınaqlardan keçmişdir. Lakin XX əsrin sonlarında ikinci dəfə əldə etdiyimiz müstəqilliyin ilk illəri xalqımız və dövlətimiz üçün ən həlledici, ən təhlükəli dövr hesab olunur. Bu dövr yalnız siyasi və iqtisadi böhranla deyil, bütövlükdə Azərbaycanın bir dövlət kimi dünya xəritəsindən silinmək, parçalanmaq təhlükəsi ilə xarakterizə edilir. Məhz belə bir ağır və taleyüklü zamanda Ulu Öndər Heydər Əliyevin xilaskarlıq missiyası dövlətçiliyimizi məhv olmaqdan qurtardı və müasir, qüdrətli Azərbaycanın bünövrəsini qoydu.
Azərbaycanda yaranmış problemlər əslində hələ Sovet dövrünün sonlarından baş qaldırmağa başlamışdı. Ulu Öndər Heydər Əliyevin siyasi hakimiyyətdən getməsindən sonra ölkədə problemlər yaşanmağa başladı. Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və şəxsən Baş katib Mixail Qorbaçovun yeritdiyi siyasi xəttə etiraz olaraq tutduğu vəzifələrdən istefa verdi. Bu hadisədən heç iki həftə keçməmiş erməni millətçiləri və onların sovet iqtidarında olan himayədarları Dağlıq Qarabağ Muxtar Vilayətinin Azərbaycanın tərkibindən çıxarılıb Ermənistanın tərkibinə verilməsi məsələsini qaldırdılar və xalqımızın faciələri də o gündən başladı. Əgər o dövrdə Heydər Əliyev hakimiyyətdə təmsil olunsaydı, erməni millətçiləri bu çirkin əməllərə əl atmağa heç vaxt cürət edə bilməzdilər.
Müstəqilliyin bərpasından sonrakı ilk illərdə isə vəziyyət daha da acınacaqlı xarakter aldı. 1991-1993-cü illər ərzində dövlətin müstəqilliyinə və suverenliyinə təhdid yaradan bütün amillər ölkəmizdə tam şəkildə yaşanmışdır. AXC-Müsavat iqtidarının səriştəsizliyi, dövlət idarəçiliyi sisteminin olmaması və silahlı dəstələrin qanunsuz əməlləri separatçılıq meyllərini gücləndirdi. Bütün bunlar ölkənin daxilində qardaş qırğınına və vətəndaş müharibəsinə zəmin yaradaraq Azərbaycanı bir dövlət kimi məhv olmaq təhlükəsi ilə üz-üzə qoymuşdu. Hakimiyyət daxilində qruplaşmalar yarandı, birincilik uğrunda mübarizə aparıldı və nəticədə cəbhədəki durum nəzarətdən çıxdı. Ali Baş Komandan olduğunu unutmuş rəhbərlik nazirlərin fəaliyyətinə belə nəzarət etməyi lazım bilmirdi. AXC-Müsavat cütlüyünün bir illik hakimiyyəti anarxiya, xaos, iqtisadiyyatın çökməsi və torpaqların işğalı ilə nəticələndi. Hakimiyyəti zəbt etmiş qüvvələrin xəyanəti nəticəsində 1993-cü ilin aprel ayında Kəlbəcər işğal edildi.
Heydər Əliyevin fəaliyyətinin əsasında dayanan başlıca prinsip vətəndaş həmrəyliyi və ictimai-siyasi sabitliyin təmini idi. O bəyan etmişdi ki, ictimai-siyasi sabitlik olmasa, heç bir sosial-iqtisadi problemin həllindən söhbət gedə bilməz. Heydər Əliyevin xilaskarlıq missiyası Azərbaycanı parçalanmaqdan xilas etdi. Qısa zaman ərzində asayiş bərqərar edildi, soyğunçuluğa son qoyuldu. Qanunsuz silahlı qruplaşmaların dövlət çevrilişləri cəhdlərinin qarşısı alındı.
Dövlətçiliyin xilasının ən bariz göstəricilərindən biri kimi nizami ordu yaradıldı, Qarabağ müharibəsində atəşkəs əldə edildi və danışıqlara başlandı. İqtisadi tənəzzülün qarşısını almaq üçün neft müqavilələri imzalandı və Azərbaycanın iqtisadi dirçəlişinin əsası qoyuldu. Beynəlxalq əlaqələr formalaşdırıldı və Azərbaycanın dünya birliyinə inteqrasiyası başladı. Bütün bu amillər Ulu Öndərin Azərbaycan dövlətçiliyini məhv olmaqdan xilas etməsinin və tərəqqi yoluna çıxarmasının əyani sübutları idi. Ulu Öndərin xalqımız qarşısında ən böyük xidmətləri məhz kəskin ziddiyyətlər şəraitində dövlətçiliyimizi xilas etməsi idi.
Tarix sübut etdi ki, xalqımızın sarsılmaz inamı və dəstəyi ilə həyata keçirilən bu missiya Azərbaycanın müstəqilliyini əbədi və dönməz etdi. Bu gün müasir Azərbaycan məhz Ulu Öndər Heydər Əliyevin görmək istədiyi azad, müstəqil, ərazi bütövlüyü tam təmin olunmuş ölkədir. Onun ordu quruculuğu istiqamətində müəyyənləşdirdiyi strategiya sayəsində bu gün ordumuz dünyanın ən güclü ordularından biridir. Ulu Öndərin ən böyük arzusu olan Şuşanın, Qarabağın və Zəngəzurun azad edilməsi isə onun siyasi kursunun uğurlu davamçısı, Prezident İlham Əliyev tərəfindən Vətən müharibəsində qazanılan möhtəşəm Zəfərlə reallaşdırıldı. Qurtuluşla başlayan bu çətin, lakin şərəfli yol Azərbaycanın tam suverenliyinin bərpası və qlobal müstəvidə nüfuzlu dövlət kimi qərarlaşması ilə tarixə əbədi olaraq həkk olundu.

Rəcəbova Mahru
Suraxanı rayonu 154 nömrəli tam orta ümumtəhsil məktəbinin direktoru

13/06/2026