Abituriyent jurnalı

30/05/2026

Bu gün Azərbaycanın görkəmli satirik şairi Mirzə Ələkbər Sabirin (30.05.1862–12.07.1911) doğum günüdür.

O, 12 yaşına qədər mollaxanada oxuyub, sonra şair Seyid Əzim Şirvaninin açdığı yeni üsullu məktəbdə təhsilini davam etdirib.

XX əsrin əvvəllərindən Sabirin şeirləri mətbuat səhifələrində görünməyə başlayıb. 1906-cı ildə “Molla Nəsrəddin” jurnalını öz arzularına müvafiq bir dərgi kimi qarşılayıb, onun ən fəal müəlliflərindən biri olub. “Molla Nəsrəddin” jurnalında şair 36 gizli imza ilə çıxış edib.

1908-ci ilin sentyabr ayında Sabir çoxdan arzuladığı "Ümid" məktəbini açmağa müvəffəq olub. Bu məktəbdə 60-a qədər şagird oxuyub.

Sabirin seçilmiş əsərlərinin “Hophopnamə” adlandırılması “Hophop” imzası ilə əlaqədardır. Onun “Fəhlə”, “Əkinçi”, “Oxutmuram, əl çəkin” şeirləri dillər əzbəridir.

Sabir uşaqlar üçün “Gəl, gəl a yaz günləri”, “Uşaq və buz”, “Yalançı çoban” və digər şeirləri yazıb.

Şairin vəfatından bir il sonra – 1912-ci ildə onun şeirləri “Hophopnamə” adı ilə çap olunub.

28/05/2026

Azərbaycanın dövlətçilik tarixinin şanlı səhifələrindən biri olan 28 May - Müstəqillik Günü xalqımızın birliyinin və suverenliyinin rəmzidir.

Müstəqillik Gününüz mübarək!

27/05/2026

Qurban bayramınız mübarək!

26/05/2026

Xüsusi qabiliyyət tələb edən ixtisaslara qəbul olmaq istəyənlər üçün "Abituriyent" jurnalının xüsusi buraxılışı olan vəsaitləri DİM-in inzibati binasından (Bakı şəhəri, Nəsimi rayonu, Akademik Həsən Əliyev küçəsi, 299), “Abituriyent” satış məntəqəsindən (Bakı şəhəri, Nizami rayonu, Davud Aslan küçəsi, 2A), həmçinin kitab mağazalarından almaq, www.abiturient.az saytında və Wolt tətbiqində sifariş etmək mümkündür. https://shorturl.at/B4g0M

Vəsaitlərin elektron versiyasını (PDF formatda) www.abiturient.az saytında əldə edə bilərsiniz.

25/05/2026

Dövlət İmtahan Mərkəzi xüsusi qabiliyyət tələb edən ixtisaslara qəbul olmaq istəyənlər üçün "Abituriyent" jurnalının xüsusi buraxılışı olan vəsaitləri nəşr edib.

Xüsusi qabiliyyət tələb edən ixtisaslara dair materiallar istiqamətlərinə uyğun olaraq 6 vəsaitdə təqdim edilib:

1. Təsviri sənət
2. Musiqi sənəti
3. Jurnalistika • İslamşünaslıq
4. Memarlıq
5. Teatr, kino və xoreoqrafiya sənəti
6. İdman

Vəsaitləri DİM-in inzibati binasından (Bakı şəhəri, Nəsimi rayonu, Akademik Həsən Əliyev küçəsi, 299), “Abituriyent” satış məntəqəsindən (Bakı şəhəri, Nizami rayonu, Davud Aslan küçəsi, 2A), həmçinin kitab mağazalarından almaq, www.abiturient.az saytında və Wolt tətbiqində sifariş etmək mümkündür. https://shorturl.at/B4g0M

Vəsaitlərin elektron versiyasını (PDF formatda) www.abiturient.az saytında əldə edə bilərsiniz.

Nəşrlər barədə ətraflı məlumat www.abiturient.az saytında təqdim edilib.

24/05/2026

Bu gün uşaq ədəbiyyatının görkəmli nümayəndəsi, tanınmış şair, həkim, görkəmli müəllim və maarif xadimi Abbas Səhhətin (24.05.1874-11.07.1918) doğum günüdür.

Tehran Universitetinin Tibb fakültəsini bitirən, rus, ərəb, fars və fransız dillərini mükəmməl bilən Səhhət Şamaxıda həkimlik etməklə yanaşı, məktəblərdə Azərbaycan dilindən də dərs deyib. İxtisasca həkim olduğu üçün "Səhhət" təxəllüsündən istifadə edib.

Maraqlı dərs təcrübəsinə malik olan Abbas Səhhət tələbələri tərəfindən sevilərdi. Bir dəfə ondan "siz həkimsiniz, niyə uzun illərdir müəllimlik edirsiniz?" - deyə soruşublar. O isə belə cavab verib: "Mən müəllimlik etməklə xalqımın ən ağır xəstəliyini, onun savadsızlığını müalicə edirəm...".

O, uşaqlar üçün “Ana və bala”, “Ata və oğul”, “Yay”, “Ayı və şir”, “Quşlar” və onlarla başqa şeirlər yazıb.

22/05/2026

20/05/2026

Bu gün ədəbiyyatşünas, mətnşünas alim, mollanəsrəddinçi satirik Salman Mümtazın (20.05.1884–06.09.1941) doğum günüdür.

Salman Mümtaz Azərbaycan klassik irsinin toplanması və tədqiqi sahəsində misilsiz xidmətlər göstərən fədakar ziyalılardandır. Ərəb, fars, urdu və rus dillərini müstəqil şəkildə öyrənən Salman Mümtaz həm mətbu, həm də pedaqoji sahədə dəyərli irs qoyub. O, “Molla Nəsrəddin” jurnalı başda olmaqla bir çox mətbuat orqanlarında satirik yazıları ilə çıxış edib, Azərbaycan klassikləri haqqında ətraflı tədqiqatlar aparıb.

Repressiya illərinin qurbanı olan Salman Mümtaz ədəbiyyatşünaslığımızın inkişafında əvəzsiz rol oynayıb, ömrünü milli-mənəvi irsimizin qorunmasına həsr edib. Onun zəngin elmi və bədii irsi bu gün də öz aktuallığını qoruyur.

19/05/2026

Bu gün Azərbaycan ədəbiyyatının parlaq simalarından biri Xalq şairi Rəsul Rzanın (19.05.1910–01.04.1981) doğum günüdür.

Rəsul Rza həm də ədəbi tənqidçi, dramaturq və tərcüməçi kimi də geniş fəaliyyət göstərib. Şairin yaradıcılığı XX əsr Azərbaycan poeziyasının inkişafında mühüm yer tutur. Onun şeirləri mövzuların müxtəlifliyi və məzmun zənginliyi ilə yanaşı, obrazların orijinallığı ilə də seçilir. Ən məşhur əsərlərindən biri olan "Vətən" şeiri müharibənin ağır illərində xalqın qəhrəmanlıq ruhunu əks etdirir.

Rəsul Rzanın yaradıcılığı həm də onun ədəbi tənqid və publisistika sahəsindəki fəaliyyətindən bəhrələnib. O, həyatı dərindən analiz edərək cəmiyyətin və insanın mənəvi vəziyyətini şeir və məqalələrində qələmə alıb. Xüsusilə 1960-cı illərdən sonra şairin poeziyasında daha çox fəlsəfi mövzular və intellektual yanaşmalar güclənib. Onun "Rənglər" silsiləsi XX əsr insanının mənəvi aləmini rənglər və onların assosiasiyaları vasitəsilə açaraq şairin poetik üslubunu yeni zirvəyə qaldırıb.

Həmçinin Rəsul Rza dünyanın ən tanınmış şairlərinin əsərlərini Azərbaycan dilinə tərcümə edərək mədəniyyətlərarası körpü yaradıb. Onun tərcümə əsərləri dünya ədəbiyyatının incilərini Azərbaycan oxucularına tanıdıb. Şairin yaradıcılığı təkcə poetik sahədə deyil, həm də cəmiyyətin mənəvi və əxlaqi inkişafında dərin izlər qoyub.

18/05/2026

Hər il mayın 18-i dünya ölkələrində Beynəlxalq Muzeylər Günü kimi qeyd edilir.

Beynəlxalq Muzeylər Günü Beynəlxalq Muzeylər Şurasının (ICOM) təşəbbüsü ilə 1977-ci ildə təsis edilib. Bu günün məqsədi muzeylərin cəmiyyətin həyatında nə dərəcədə mühüm rol oynadığını göstərməkdir.

Bu bayram qədim tarixə və zəngin mədəniyyətə malik Azərbaycanda da geniş miqyasda qeyd edilir. Azərbaycan dövlətinin uğurlu mədəniyyət siyasəti nəticəsində son illər muzeylərimizin dünyanın nüfuzlu muzeyləri ilə əlaqələri genişlənib, bu sahədə beynəlxalq əməkdaşlıq sahəsində yeni nailiyyətlər əldə edilib.

Beynəlxalq Muzeylər Günü hər il müxtəlif deviz altında keçirilir. Bu il “Bölünmüş dünyanı birləşdirən muzeylər” devizi altında keçirilən bayram muzeylərin cəmiyyətlərarası dialoq, qarşılıqlı anlaşma və mədəni əməkdaşlığın inkişafındakı rolunu ön plana çıxarır.