18/07/2026
AzMİU tələbələri İstanbul Su və Kanal İdarəsində yay təcrübə proqramında iştirak edirlər
Azərbaycan Memarlıq və İnşaat Universitetinin (AzMİU) tələbələri növbəti dəfə Türkiyənin İstanbul Böyükşəhər Bələdiyyəsinə bağlı olan İstanbul Su və Kanal İdarəsində (İSKİ) təşkil olunan yay təcrübə proqramında iştirak edirlər.Proqrama AzMİU-nun bakalavr və magistratura təhsil səviyyələrində təhsil alan tələbələri cəlb olunublar. Təcrübədə İnşaat mühəndisliyi, Şəhər infrastrukturunda ağıllı texnologiyalar, Su ehtiyatlarının idarə olunması və mühafizəsi, Meliorasiya sistemləri, Tullantıların emal texnologiyaları və Ekologiya mühəndisliyi ixtisaslarında təhsil alan tələbələr iştirak edirlər.Təcrübə proqramı çərçivəsində tələbələr ixtisasları üzrə nəzəri biliklərini praktik fəaliyyətlə möhkəmləndirir, su təsərrüfatı və şəhər infrastrukturunun idarə olunması sahəsində tətbiq edilən müasir texnologiyalar və qabaqcıl təcrübə ilə yaxından tanış olurlar. Onlar İstanbulun su təchizatı sistemi, su ehtiyatlarının idarə olunması və mühafizəsi, tullantı sularının toplanması, təmizlənməsi və axıdılması, həmçinin tullantıların idarə edilməsi sahəsində həyata keçirilən innovativ həllər barədə praktiki biliklər əldə edirlər.Təcrübənin ilk günlərində tələbələr üçün İstanbulun zəngin tarixi və mədəni su irsi ilə tanışlıq proqramı təşkil olunub. Onlar şəhərin su ehtiyatlarının formalaşması və tarixi su infrastrukturu barədə məlumat əldə edib, Miniatürk və Panorama 1453 Tarix Muzeyini ziyarət ediblər. Eyni zamanda, İstanbulun mühüm tarixi su qurğularından olan Moğlova Su Kəməri və Uzunkemer kimi memarlıq abidələrinə, Tarixi Yerkos su muzeyinə ekskursiyalar təşkil olunub. Bu səfərlər tələbələrin tarixi su mühəndisliyi nümunələri ilə tanış olmalarına və su təsərrüfatının inkişaf mərhələlərini yaxından öyrənmələrinə imkan yaradıb.
25 iyul tarixinədək davam edəcək proqram çərçivəsində tələbələr İSKİ-nin müxtəlif struktur bölmələrində və istehsalat sahələrində təcrübə keçəcək, su və kanalizasiya sistemlərinin idarə olunması, ekoloji təhlükəsizlik, müasir monitorinq və ağıllı idarəetmə texnologiyalarının tətbiqi ilə yaxından tanış olacaqlar.
